«Naša Niva» atrymała takuju infarmacyju ad čatyroch nie źviazanych miž saboj krynic sa śfiery miedycyny i dziaržaŭnaha kiravańnia.
«Pamior Uładzimir Makiej» — takoje paviedamleńnie ŭ 16:35 26 listapada raspaŭsiudziła BiełTA sa spasyłkaj na pres-sakratara Ministerstva zamiežnych spraŭ Biełarusi. U paviedamleńni nie było ani typovaj dla aficyjnaha stylu biełaruskich uład formuły «Raptoŭna pamior», ani inšaj typovaj formuły «Paśla praciahłaj chvaroby pamior».
Źviartała ŭvahu taksama toje, što łukašenkaŭskija ŚMI doŭha nie mieli ŭkazańnia pra ton i charaktar aśviatleńnia śmierci šmathadovaha ministra zamiežnych spraŭ Biełarusi Uładzimira Makieja.
Tak, u «SB. Biełaruś siehodnia» ŭviečary toj suboty ŭsio jašče nie było praktyčna ničoha pra śmierć adnoj z najvyšejšych asob, heta stajała navat nie druhoj i nie treciaj navinoj.
Narešcie, ministr zamiežnych spraŭ Rasii Siarhiej Łaŭroŭ nie pryjechaŭ na pachavańnie biełaruskaha kalehi.
Raspaŭsiudžanaja viersija pieršych dzion — pryčynaj śmierci Makieja staŭ praihnaravany infarkt. Ale paźniej u Minsku ŭsio ž stali viadomyja inšyja abstaviny śmierci.
Čatyry krynicy «Našaj Nivy» ŭ śfierach dziaržaŭnaha kiravańnia i miedycyny nazvali pryčynaj śmierci suicyd.
Što mahło pryvieści da samahubstva? Vyhladaje, što niejkaj adnoj, asnoŭnaj pryčyny niama — sprava ŭ sukupnaści faktaraŭ.
Ale my ŭstrymajemsia ad publikacyi niekatorych detalaŭ: prava ich ahučyć majuć, napeŭna, tolki blizkija.
Apošnija hady žyćcia ministra jaho supravadžali jak palityčnyja, tak i asabistyja dramy.
Znajomyja Makieja kažuć, što jon baluča pieražyvaŭ krušeńnie taho kursu, jaki pravodziŭ. Časta adčuvaŭ siabie niepatrebnym, a miescami i prosta niedarečnym.
Dastatkova zhadać jahonuju zajavu napiaredadni vajny pra vyvad rasijskich vojskaŭ z terytoryi Biełarusi paśla vučeńniaŭ. Praź niekalki dzion z terytoryi Biełarusi była pačata samaja kryvavaja ŭ Jeŭropie vajna paśla Druhoj suśvietnaj.
Makiej viedaŭ i toje, što ŭ Administracyi Alaksandra Łukašenki pačali pryhladacca da kandydatur na zamienu jamu.
«Jamu było apošnim časam admoŭlena ŭ asabistaj uvazie, dla jaho heta vielmi adčuvalna», — kaža jaho kaleha.
«Heta nie aznačaje, što jaho źniali b zaŭtra. Ale jon razumieŭ, što raniejšaje vysokaje stanovišča padychodzić da kanca. A jon, paśla svaich vysotaŭ, užo nidzie siabie bolš nie bačyŭ», — kaža adzin z našych surazmoŭcaŭ.
Na heta taksama nakłalisia prablemy ŭ siamji. Častka ich była publičnaja, a častka — niepubličnaja.
Pa infarmacyi «Našaj Nivy», u dzień śmierci Uładzimir Makiej viarnuŭsia ŭ svoj dom u Drazdach adzin. Jaho žonka Viera Palakova z małodšym synam zastalisia ŭ ich inšaj kvatery.
Pa infarmacyi «Našaj Nivy», pieršym niežyvoha ministra znajšoŭ starejšy syn Palakovaj, jaki pajechaŭ u Drazdy paśla niaŭdałych sprob svajakoŭ źviazacca ź im pa telefonie.
Sproby reanimavać ministra ni da čoha nie pryviali.
Surazmoŭcy «Našaj Nivy» nie bačać prykmiet, što heta było zabojstva, zamaskavanaje pad suicyd.
64-hadovy Uładzimir Makiej naležaŭ da libieralnaha kryła łukašenkaŭcaŭ i byŭ adzinym u viarchušcy, chto čas ad času havaryŭ pa-biełarusku. U saviecki čas Makiej byŭ aficeram savieckaha HRU, u niezaležnaj Biełarusi jon pačaŭ dypłamatyčnuju karjeru. Na pasadu kiraŭnika Administracyi prezidenta i paźniej ministra zamiežnych spraŭ Makiej pryjšoŭ praz kabiniet asabistaha pamočnika Alaksandra Łukašenki, jaki zaniaŭ u 2000 hodzie — heta było paśla źniknieńnia Viktara Hančara i Juryja Zacharanki, u pierałomnym momancie ŭ charaktary biełaruskaha režymu.
25 listapada, za dzień da infarmacyi pra śmierć, paviedamlałasia pra sustreču Makieja z vatykanskim nuncyjem Jozičam.
Niekalkimi dniami raniej, 22 listapada, Uładzimir Makiej razam ź dziaržsakratarom Rady Biaśpieki Valfovičam lotali ŭ Jerevan na vajskovym transpartnym samalocie Ił-76MD. U Armienii čynoŭniki ŭziali ŭdzieł u siesii Rady kalektyŭnaj biaśpieki ADKB.
«Dumaju, usie ŭ hetaj zale vydatna pamiatajuć jaho vystup na Usiebiełaruskim narodnym schodzie, jaki jon skončyŭ słovami: «Lublu Biełaruś!» Hetyja dva, zdajecca, prostyja, ale vielmi važnyja słovy byli sapraŭdy matyvam usiaho jaho žyćcia, — skazaŭ na raźvitańni z Uładzimiram Makiejem jaho siabar i budučy pierajemnik Siarhiej Alejnik. — Jon unios vialiki ŭkład u raźvićcio biełaruskaj dziaržaŭnaści, jaje stanaŭleńnie, umacavańnie našaha suvierenitetu, zachavańnie miru i stabilnaści na našaj biełaruskaj ziamli. Jon byŭ ščyrym i fantastyčnym, sapraŭdnym čałaviekam».
Ale takuju acenku Makieja padzialajuć nie ŭsie.
«Toje, što jaho načalnik [Alaksandr Łukašenka] takim sfarmiravaŭsia, u mnohim jaho zasłuha. Ën padpiavaŭ i patakaŭ jaho nie samym čałaviečnym instynktam i matyvam pavodzin. Heta važniej za naładžvańnie suviaziaŭ z Zachadam ci ŭdaskanalvańnie biurakratyčnaj sistemy, za jakija jamu možna addać naležnaje», — skazaŭ nam adzin z dypłamataŭ, jaki ŭžo pakinuŭ słužbu.
«Nie pamiataju, chto heta skazaŭ, ale kali być pakaranym śmierciu, to lepš być pakaranym za viernaść, čym za zdradu», — skazaŭ Uładzimir Makiej 1 krasavika 2022 hoda, kali stała jasna, što płan Rasii pa zachopie Ukrainy pravaliŭsia.
* * *
Kali majecie dastaviernuju i važnuju infarmacyju pra tyja ci inšyja padziei, pišycie redaktaru «Našaj Nivy» ŭ TH @nn_editor, na [email protected] ci [email protected].
«Naša Niva» — bastyjon biełaruščyny
PADTRYMAĆ
Kamientary