Biełaruska Viktoryja Azaranka paśla paražeńnia ad polki Ahnieški Radvańskaj pakidaje vynikovy za hod turnir u Dosie (Katar).
Radvańska akazałasia apošniaj supiernicaj Viki ŭ hrupie, bo dźvie rasijanki — Dynara Safina i Viera Zvanarova — źnialisia praz traŭmy z turniru.
Pierad hetym matčam u Azaranki była adna pieramoha (nad Jankavič) i paraza (ad Vaźniacki). I dla taho, kab vyjści ŭ paŭfinał treba było abaviazkova pieramahać.
Vika adrazu ŭziała padaču supiernicy, ale z takoj samaj chutkaściu addała i svaju. Tym nie mienš, było bačna, što naša tenisistka vałodaje inicyjatyvaj. Pieršy set zastaŭsia za joj ź likam 6:4.
U druhim taksama pačynaŭsia dla biełaruski biaschmarna. Jana vyjhravała ź likam 4:0. Ale, jak i ŭ matč z Vaźniacki, niešta stałasia Vičynaj psichałohijaj. Prajhrała padaču, zatym druhuju, potym pačalisia prablemy z nahoj. I voś Azaranka ŭžo prajhraje set — 5:7.
Treci doŭha nie pačynaŭsia, bo biełaruscy akazvali miedyčnuju dapamohu — nie dapamahło. Vika spačatku nie mahła dahnać karotkija miačy.
Zatym uvohule było bačna, jak kožny ruch joj dajecca ź jakim bolem.Vyjhrać u takich umovach było niemahčyma. Pry liku 1:4 na karyści polki Vika źniałasia z matču.Biełaruska nie vytrymlivała, płakała, ale nie zdavałasia. Napeŭna, tysiačy ludziej u hetyja momanty zachaplalisia mužnaści našaj tenisistki.
Takim čynam situacyja ŭ našaj hrupie vyhladaje nastupnym čynam: Jelena Jankavič — 2 pieramohi, Karalin Vaźniacki — 2, Viktoryja Azaranka — 1, Ahnieška Radvańska — 1.
***
U paŭfinałach zaŭtra Karalin Vaźniacki (№4 WTA) sustreniecca ź Vienus Uiljams (№7), a Jelena Jankavič (№8) — ź Sierenaj Uiljams (№2). Nivodnaja z čatyroch rasijanak u paŭfinał nie trapiła.
