«Paŭzkom, na kaleniach». Što Łukašenka abiacaŭ na minułym pasłańni narodu i svaim deputatam
U piatnicu Alaksandr Łukašenka źvierniecca z pasłańniem da parłamienta i naroda. Vyrašyli zhadać, jakija abiacańni jon razdavaŭ minuły raz i jak situacyja skłałasia ŭ realnaści.
Vajna. «My vierniem Ukrainu ŭ łona našaha słavianstva»
Letaś Łukašenka źviartaŭsia da svaich deputataŭ i naroda 28 studzienia. Jon zajaŭlaŭ, što «hramadskuju dumku rychtujuć da niepaźbiežnaści vajny».
«Dyk budzie vajna ci nie? Tak, jana budzie, — razvažaŭ jon. — Ale tolki ŭ dvuch vypadkach: kali suprać Biełarusi budzie ździejśnienaja pramaja ahresija, kali suprać našaj Biełarusi budzie raźviazanaja haračaja vajna… Kali na našaha sajuźnika, Rasijskuju Fiederacyju, ažyćciaviać niepasredny napad».
Mienš čym praź miesiac rasijskija vojski ŭvarvalisia va Ukrainu ŭ tym liku z terytoryi Biełarusi, naša kraina stała suahresaram. Heta nie było adkazam na napad — Rasija abviaściła pra nieabchodnaść «denacyfikacyi» Ukrainy.
Tady Łukašenka prahnazavaŭ, što «my vierniem našu Ukrainu ŭ łona našaha słavianstva, my heta abaviazkova zrobim». Ale Ukraina nie tolki vystajała hod vajny, ale i rychtujecca da viasieńniaha kontrnastupu.
Łukašenka taksama pužaŭ «kalektyŭny Zachad»: «Kali na našu krainu budzie ździejśnienaja ahresija, tut buduć sotni tysiač rasijskich vojskaŭ, jakija z sotniami tysiač biełarusaŭ buduć adstojvać hetuju śviaščennuju ziamlu».
Rasijskich sałdat u Biełarusi sapraŭdy stała bolš — u kastryčniku Łukašenka zajaviŭ pra razhortvańnie rehijanalnaj hrupoŭki vojsk. Rasijskija vajskoŭcy stali pryjazdžać treniravacca na biełaruskija palihony, a biełaruskija sustrakali ich z chlebam-sollu. Čakałasia, što ich budzie kala 9 tysiač. Aproč sałdat, pierakidali i techniku.
Sankcyi. «Zrobim usio, kab prosty čałaviek nie adčuŭ nastupstvaŭ»
Hod tamu Łukašenka nazyvaŭ sankcyi «inkvizicyjaj našaha času».
«Sankcyi — tradycyjnaja praktyka suśvietnaha manapalista ZŠA i ich sajuźnika Jeŭrapiejskaha sajuza. Mienavita takim čynam zaŭsiody sprabavali rašać pytańni z kankurentami. Tak jany zmahajucca suprać Kitaja, Rasii, Irana, Vienieseuły, Siryi, a ciapier i Biełarusi», — vykazvaŭsia jon.
Ale paabiacaŭ, što dziaržava ludziej ad sankcyj abaronić.
«Zrobim usio, kab prosty čałaviek nie adčuŭ na sabie nastupstvaŭ ciapierašniaha źniešniaha cisku», — pierakonvaŭ Łukašenka publiku.
Što my majem? Pa vynikach 2022 hoda VUP krainy ŭpaŭ na 4,7%.
Biełaruś stračvaje svaje pazicyi jak tranzitnaha chaba. Kali za 2021 hod ekspart transpartnych pasłuh prynios u kaznu 1,8 miljarda dalaraŭ, to letaś — 1,3 miljarda.
Hadavaja inflacyja ŭ Biełarusi pa vynikach 2022 hoda skłała 12,8%. Ułady sprabavali spynić jaje ŭručnuju: 6 kastryčnika Łukašenka zabaraniŭ pavyšać ceny. Siłaviki kinulisia vykonvać zahad pa baraćbie z «nieabhruntavanym pavyšeńniem cenaŭ» i ŭzbudzili diasiatki kryminalnych spraŭ.
Minuły hod aznamienavaŭsia masavym sychodam mižnarodnych kampanij i brendaŭ ź Biełarusi. Z samych hučnych — McDonald's, jaki pracavaŭ u Biełarusi 26 hadoŭ. Pra jaho sychod ź biełaruskaha rynku stała viadoma ŭ listapadzie. Spačatku płanavałasia, što sietka piarojdzie pad franšyzu «Vkusno — i točka», a ŭ vyniku restarany pracujuć pad šyldaj «My otkryty».
Minułaj viasnoj prypynili svaju dziejnaść servisy anłajn-braniravańnia atelaŭ Booking.com i servis karotkaterminovaj arendy žylla Airbnb. Syšoŭ servis taksi Bolt, jaki pryjšoŭ u krainu tolki ŭ 2020 hodzie.
Niamieckaja kampanija Henkel i chimičny kancern BASF zharnuli svaju dziejnaść u Biełarusi, jak i Siemens, jaki pastaŭlaŭ na naš rynak abstalavańnie i zapčastki dla enierhietyčnaj śfiery. Siarod tych, chto prypyniŭ dziejnaść u krainie, — taksama amierykanskija vytvorcy elektronnych prystasavańniaŭ i kampjutarnych kampanientaŭ Intel i AMD, łahistyčnaja kampanija United Parcel Service (UPS), dacki hruzapieravozčyk Maersk, kampanija ekspres-dastaŭki hruzaŭ i dakumientaŭ DHL.
Viadomyja płaciožnyja sistemy — Western Union, American Express, Wise — syšli ź biełaruskaha rynku.
U dadatak da ŭsiaho zakrylisia kramy brenda modnaj vopratki H&M, premium-brendaŭ Tommy Hilfiger i Calvin Klein, a taksama krama abutku Timberland.
Biełaruski IT-biznes, u svaju čarhu, aktyŭna rełakavaŭsia za miažu. Pa źviestkach Biełstata, tolki za 11 miesiacaŭ minułaha hoda adtok śpiecyjalistaŭ ź IT-śfiery skłaŭ 15 tysiač čałaviek.
Wargaming pieradaŭ biełaruski i rasijski ofisy pad kiravańnie picierskaj firmy Lesta Studio i začyniŭ svaju studyju ŭ Minsku. Svaje jurasoby ŭ krainie likvidavali kampanija Flo, jakaja stvaryła mabilny prahramu pra žanočaje zdaroŭje, i startap Wannaby. I heta tolki niekatoryja prykłady.
Anons kamisii pa viartańni. «Paŭzkom, na kaleniach»
Hod nazad Łukašenka ahučyŭ ideju pa viartańni emihrantaŭ.
«Pierš čym vy, kamu treba, chto hetaha zasłužyŭ pa zakonie, adsiadzicie ŭ miescach nie takich addalenych, my stvorym hramadskuju kamisiju. Nu, naprykład, sustaršyniami mohuć być hienieralny prakuror, nu i naš viaščalnik — Ryhor Azaronak. Dalej budzie horš, tamu dadomu na kaleniach, paŭzkom», — vykazvaŭsia jon.
U lutym 2023-ha Łukašenka padpisaŭ ukaz pra stvareńnie kamisii pa viartańni. Kamisiju ŭznačaliŭ hienprakuror Andrej Švied, u skład uvajšli siarod inšych staršynia KHB Ivan Cierciel i prapahandyst Ryhor Azaronak. U pryncypie, usio, jak i abiacaŭ Łukašenka.
Praŭda, ažyjatažu ideja nie vyklikała. Jak pryznavaŭ namieśnik hienprakurora Alaksiej Stuk, pa stanie na 6 sakavika ŭ kamisiju pastupili tolki 23 zajavy, pryčym pieravažnaja bolšaść nie adpaviadała zajaŭlenym standartam.
Vyrašać, kamu možna viarnucca, a kamu nie, budzie śpiecyjalnaja kamisija na čale z hienprakuroram
U Biełarusi majuć namier pryciahnuć da adkaznaści ŭsich, chto suprać Łukašenki
Łukašenka ŭ 2022-m: «Ja nie płanuju raźmiaščać jadziernuju zbroju. Takoha nikoli nie było». Pucin u 2023-m: «Alaksandr Ryhoravič daŭno prasiŭ raźmiaścić jadziernuju zbroju»
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary
Z pavažańniem, Vaš Starkoŭ