U Biełaruś prybyŭ kardynał Valter Kaśpier

8 listapada ŭ Minsk pa zaprašeńni Mitrapalita Fiłareta, Patryjaršaha Ekzarcha ŭsiaje Biełarusi, prybyŭ kardynał Valter Kaśpier.

Vizit staršyni Papskaj rady spryjańnia chryścijanskamu adzinstvu raspačaŭsia z celebracyi śviatoj Imšy ŭ minskim archikatedralnym kaściole. Razam z vatykanskim ijerarcham prybyŭ kardynał Teador MakKarryk, arcybiskup Vašynhtonski na piensii.

Na pačatku śviatoj liturhii Mitrapalit Tadevuš Kandrusievič pryvitaŭ zamiežnych ijerarchaŭ, Apostalskaha Vizitatara dla hreka‑katolikaŭ u Biełarusi archimandryta Siarhieja Hajeka, śviataroŭ i šmatlikich viernikaŭ. Zatym arcypastyr zaprasiŭ vatykanskaha kardynała ŭznačalić Eŭcharystyju.

Padčas hamilii kardynał Kaśpier nahadaŭ pra metu svajho vizitu ŭ Biełaruś: «Heta ŭžo druhi moj vizit u Minsk. Siońnia ja prybyŭ, kab sustrecca z Najdastojniejšym Mitrapalitam Fiłaretam i vykładčykami Instytuta teałohii BDU. Na praciahu šmatlikich hadoŭ adbyvajecca supracoŭnictva pamiž Papskaj radaj spryjańnia chryścijanskamu adzinstvu, Mitrapalitam Fiłaretam i Instytutam teałohii. My stali dobrymi siabrami i nas jadnaje adna meta: razam pracavać,

kab dasiahnuć poŭnaj jednaści Katalickaha Kaścioła i Pravasłaŭnaj Carkvy».

Na zakančeńnie śviatoj Imšy adbyłosia aśviačeńnie novych stacyj Kryžovaha šlachu. Napačatku była pračytana malitva, paśla čaho kardynał Kaśpier akrapiŭ stacyi Muki Pana, a kardynał MakKarryk akadziŭ ich.

Paśla cyrymonii aśviačeńnia Kryžovaha šlachu skulptar Andryjenka Uładzimir Alaksandravič i achviaradaŭcy byli ŭznaharodžany padziačnymi hramatami.

Vielmi ciopłyja słovy ŭ adras arcybiskupa Kandrusieviča skiravaŭ kardynał MakKarryk, jaki adznačyŭ, što

Kaścioł u Biełarusi maje dobraha lidera.

Amierykanski ijerarch pažadaŭ viernikam być sapraŭdnymi śviedkami Jevanhiella i paabiacaŭ pamiatać pra ich u svajoj malitvie.

Kardynał Kaśpier, pierad tym jak udzialić prysutnym błasłaŭleńnie papy Benedykta XVI, adznačyŭ, što «Kaścioł u Biełarusi kvitnieje i maje budučyniu».

Paśla śviatoj Imšy adbyłosia nabaženstva Kryžovaha šlachu. Hetu malitvu vatykanski ijerarch zaklikaŭ achviaravać u intencyi plonnaha dyjałoha pamiž Katalickim Kaściołam i Pravasłaŭnaj Carkvoj u Biełarusi, a taksama za kanfierencyju, pryśviečanuju chryścijanska‑iudejskamu dyjałohu, jakaja budzie prachodzić z 9 pa 11 listapada ŭ Minsku na bazie Mižnarodnaha adukacyjnaha centra imia J. Rau.

• 0
• 0
• 0
• 0
• 0
• 0
• 0
• 0