«U kajdankach i na łancuhu pryviali ŭ zału suda». Historyja adnaho zatrymańnia ŭ Biešankovičach

Maja sprava zakončyłasia tym, što mianie abvinavacili ŭ pikiecie pad bieła-čyrvona-biełym ściaham i prysudzili štraf u pamiery 2420 rubloŭ.

Byŭ aryštavany moj mabilny telefon i kampjutar, u chacie pravodziŭsia pieratrus. Ale padstavaŭ, kab raspačać jašče adnu spravu nie znajšłosia. Aryštavanuju techniku viarnuli praz dva miesiacy.

Z taho času minuŭ hod, i ciapier milicyjanty časta naviedvajucca «ŭ hości». Dvojčy za apošnija paŭhoda pryjazdžaŭ KDB. Zrazumieła, što ŭsia sprava tyčycca majho śvietapohladu, jaki nie ŭkładvajecca ŭ ich ramki.

Mianie nie mohuć abvinavacić u tym, što ja vychodziŭ na pratesty suprać falsifikacyi vybaraŭ. Ja heta nie rabiŭ anivodnaha razu. A tamu ŭsie najezdy mahu razhladać tolki jak baraćbu ź inšadumstvam i jak parušeńnie našaj Kanstytucyi, jakaja harantuje mnie svabodu majoj dumki.

Ale na hety raz milicyjanty zajavili, što jany nie da mianie, a da majoj žonki, piensijanierki Łarysy Paŭłaŭny Stankievič.

Maja žonka — čałaviek apalityčny. Jana navat nie zachodzić na sajt, jaki viadu ja. U jaje svajo koła intaresaŭ. Napiaredadni, 9 krasavika, jana źviarnułasia da mianie, kab ja pahladzieŭ, čamu nie adčyniajucca jaje adnakłaśniki. Akazałasia, što jaje staronka ŭzłamanaja.

I kali milicyjanty z paroha zajavili pra toje, što sa staronki Łarysy Paŭłaŭny ŭ adnakłaśnikach ažyćciaŭlalisia ekstremisckija dziejańni, usio stała zrazumiełym.

U 13 hadzin 12-ha krasavika jaje zabrali ŭ Biešankovicki RAUS, kab skłaści pratakoł ab administracyjnym parušeńni.

Ale, kali ja tudy pryjechaŭ u 18:30, mnie adkazali, što jana budzie zatrymanaja da suda, jaki adbudziecca nieviadoma kali.

Ja paprasiŭ dazvołu zabrać jaje dachaty, papiaredziŭ dziažurnaha ab słabym žončynym zdaroŭi, ab tym, što jany biaruć na siabie vialikuju adkaznaść, tamu što jana moža navat pamierci.

Ź mianie tolki paśmiajalisia, skazali, što vykličuć «chutkuju dapamohu».

Nazaŭtra ranicaj u RAUS mnie adkazali, što sud adbudziecca 13 krasavika, ale ŭ jaki čas — nieviadoma. «Jak tolki sudździa aznajomicca sa spravaj».

Sud raspačaŭsia 13.04.2023 paśla 16:00, a ŭžo ŭ 17:10 Łarysu Stankievič vyzvalili z pratakołam 30 bazavych štrafu.

Jaje abvinavacili ŭ tym, što jana ŭ adnakłaśnikach raźmiaściła na sajcie «Historyja Voršy ŭ fotazdymkach» ekstremiskija materyjały.

Što ž, płacić štrafy dla našaj siamji sprava pryvyčnaja.

Ale kali Łarysa Paŭłaŭna raspaviała, jak ź joj abychodzilisia ŭ Biešankovickim RAUS, mnie stała zrazumieła, što heta była naŭmysnaja akcyja, z metaj źniščeńnia čałavieka sa słabym zdaroŭjem.

Pavialičyć

Jaje trymali noč u chałodnym pakoi, dzie pastajanna hareła śviatło. Praź dźvie ci try hadziny raspranali dahała, nadziavali na ruki kajdanki i vyvodzili ŭ kalidor dla vobšuku.

U tych ža kajdankach i na łancuhu, jak niebiaśpiečnaha złačyncu, jaje pryviali ŭ zału suda.

Vialiki dziakuj sudździ Natalli Reut, jakaja adrazu papiaredziła milicyjantaŭ ab pieravyšeńni imi svaich paŭnamoctvaŭ i prymusiła ich źniać kajdanki.

Złačynstva 62-hadovaj piensijanierki, maci traich dziaciej, jakaja pieraniesła niekalki apieracyj, zaklučałasia ŭ tym, što jana sama, (mahčyma, vypadkova), abo «chtości» za jaje naŭmysna pastaviŭ ŭ siecivie ŭ volny dostup «ekstremiscki materyjał».

14 krasavika nam pryjšłosia jechać u balnicu, dzie daktary paśla daśledavańnia pastavili dyjahnaz: «padazreńnie na infarkt», z sumam reziumavaŭ Hieorhij Stankievič.

«Kali my akazalisia ŭ akopach pa roznyja baki, to ŭsio adno musiać być praviły». Labiedźka pra toje, čamu ŭłady šantažujuć jaho zatrymańniem syna

Jašče adzin fihurant spravy «Majontka Padarosk» vyjšaŭ pad paručalnictva

Dyrektarka «Słaŭcentra» Iryna Zimnieva znachodzicca na Akreścina. Jaje muža aryštavali na 14 sutak

• 3
• 0
• 2
• 4
• 3
• 9
• 86
• 0