U minskim CUMie pradajuć tavary z ukrainskich terytoryj, niadaŭna akupavanych Rasijaj
U minskim CUMie ŭ prodažy źjavilisia tavary, vyrablenyja na akupavanych terytoryjach Ukrainy. Čytačy kanała Motolko.help zaŭvažyli ŭ hetaj kramie vyrablenuju na akupavanaj častcy Zaparožskaj vobłaści chlebnuju formu z aluminiju.
Hety tavar byŭ vyrableny nie ŭ sakaviku 2023 hoda, jak śviedčyć śviežaja nalepka na im, a značna raniej. Praz novuju nalepku navat prahladajecca realnaja data vytvorčaści — sakavik 2021 hoda.
Staraja tavarnaja etykietka, na jakuju naklejenaja novaja nalepka, utrymlivała infarmacyju na dźviuch movach (ruskaj i ŭkrainskaj), śviežaja — tolki na ruskaj. Taksama na toj etykietcy inšy štrych-kod. A tekstam paznačana, što Zaparožskaja vobłaść — heta, maŭlaŭ, Rasija.
Taksama na staroj etykietcy prysutničaŭ ukrainski sajt vytvorcy — kampanii «Siłumin» — silumin.com.ua.
Ciapierašnim vytvorcam paznačanaja ŭsio taja ž kampanija TAA «Siłumin», jakaja znachodzicca pa adrasie: Zaparožskaja vobłaść, pht Pryazoŭskaje, vuł. Uschodniaja, 10. Na ciapierašni momant hety haradski pasiołak akupavany Rasijaj.
Imparcioram u Biełaruś na etykietcy paznačanaje TAA «Karya». U błoku «asartymient prapanavanaj pradukcyi» na sajcie TAA jość i posud z adlivanaha aluminiju ad užo zhadanaj ukrainskaj kampanii «Siłumin».
Padobna na toje, što sajt daŭno nie abnaŭlaŭsia, i možna mierkavać, što supracoŭničała «Karya» z ukrainskaj kampanijaj davoli daŭno. Nie vyklučana, što ŭ ich na składzie zastavałasia pradukcyja, pastaŭlenaja jašče da pačatku vajny.
Ciapier ža, pa ŭsioj bačnaści, biełaruski imparcior prosta na nalepku sa źviestkami na ŭkrainskaj movie na toj ža tavar lepić źviestki ŭžo na ruskaj — ź inšym šrychkodam i paznačeńniem akupavanaj častki vobłaści.
Čytajcie taksama:
ŚMI: Homielskaje pradpryjemstva moža rabić dla Rasii «zuby drakona»
Rasija zavablivaje mihrantaŭ z Centralnaj Azii na pracu na akupavanych terytoryjach
Kamientary