«Kali vy zajšli siudy, to vy znaŭca jakaści i kamfortu». MUS adkryŭ kramu, u jakoj pradajucca rečy, stvoranyja ŭ kałonijach
Ceny ŭ joj ździŭlajuć, asabliva ŭ paraŭnańni z zarobkami viaźniaŭ.
U dziaržaŭnych ŚMI źjavilisia anonsy adkryćcia kramy, u jakoj buduć pradavacca rečy, stvoranyja ŭ kałonijach, — u tym liku palitviaźniami. «Kali vy zajšli siudy, to vy znaŭca jakaści i kamfortu», — vitaje apisańnie na sajcie kramy. Adkryćcio płanujuć 20 krasavika.
Vałodaje damienam i kramaj dziaržaŭnaje pradpryjemstva «Jedinica». Jano znachodzicca kala lačebna-pracoŭnaha prafiłaktoryja №6 u Dziaržynsku i zajmajecca realizacyjaj tavaraŭ, stvoranych u niavoli. «Šourum» kramy adkryjuć u vioscy Rabinaŭka Dziaržynskaha rajona, jakaja za 40 kiłamietraŭ ad Minska i za paru kiłamietraŭ ad Dziaržynska. U 2022 hodzie ŭ vioscy žyli 9 čałaviek.
Krama abiacaje vielmi nizkija ceny, ale nasamreč tavary tam kaštujuć stolki ž, kolki ad nieturemnych vytvorcaŭ. Da prykładu, voś takaja łaŭka z sasny pradajecca za 423 rubli.
Zroblenaja jana ŭ 20-j kałonii ŭ Mazyrskim rajonie. Ciapier tam utrymlivajuć nie mienš za piać palitviaźniaŭ, siarod jakich Cichan Osipaŭ i Siarhiej Jaraševič.
Pradukcyja 20-j kałonii taksama idzie na ekspart u Rasiju pad brendam fabryki «Čaradziejnaja sasna». Pryčym na sajcie kampanii niama anijakich zhadak pra toje, što meblu robiać źniavolenyja. U Rasii takaja łaŭka-kufar kaštuje ad 450 da 600 rubloŭ.
U Rasiju ekspartujucca i inšyja tavary, stvoranyja źniavolenymi. Pryčym niekatoryja ź ich kaštujuć navat tańniej. Da prykładu, hety stełaž patańnieŭ pry «pierajeździe» ŭ Maskvu na 100 rubloŭ. Znoŭ na sajcie niama infarmacyi pra toje, što mebla stvoranaja źniavolenymi, a kałoniju saramliva nazyvajuć «dziaržaŭnaje pradpryjemstva ź Biełarusi».
A voś hety nabor bializny, stvorany ŭ homielskaj žanočaj kałonii №4 (ciapier tam nie mienš za 85 palitviazynak), kaštuje navat bolej, čym anałahičny pa madeli ŭźbiekski.
A boty vytvorčaści PK-17, u jakoj siońnia ŭtrymlivajuć nie mienš jak 74 palitviaźniaŭ, kaštujuć stolki ž, kolki i boty zvyčajnych firmaŭ.
Pry hetym ludzi, jakija pracujuć u kałonijach, atrymlivajuć kapiejki, faktyčna možna skazać, što im nie płaciać ničoha. Da prykładu, adzin z byłych viaźniaŭ PK-17 vysłaŭ nam svaju daviedku pra zarobak — za miesiac jahonaja siaredniaja zarpłata skłała kala 2 rubloŭ. Natalla Chierše pisała ŭ listach, što za adzin ź miesiacaŭ joj naličyli 6,66 rubla.
Niekatoryja inšyja byłyja viaźni zarablali bolš, ale apytanyja nami nie pieraadolvali płanku ŭ 30 rubloŭ za 24-dzionny pracoŭny miesiac. To-bok, za pracu, časta z adnym vychadnym, nie ŭličvajučy abaviazkovych haspadarčych rabot, čałaviek atrymlivaje litaralna kapiejki.
«Naša Niva» — bastyjon biełaruščyny
PADTRYMAĆ«Atrymała zarobak — 6,66 rubla za miesiac». Jakija ŭmovy ŭ kałonijach, dzie siadziać palitviaźni
«Dla kaho ty tut maluješsia?» — «Dla siabie». Byłaja palitźniavolenaja Volha Kłaskoŭskaja raskazała, jak heta —žančynie sačyć za saboj u katoŭniach
Ambicyjnyja płany. «Biellehpram» choča apranuć kala 2 młn zimbabvijskich školnikaŭ i vycisnuć z hetaha rynku kitajcaŭ
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary