Skandał u śviecie biaśpieki: miesiendžar, jaki abiacaŭ «zvyšbiaśpieku», zachoŭvaŭ źviestki karystalnikaŭ dastupnymi dla ŭsich i dazvalaje rasšyfravać paviedamleńni

Havorka pra miesiendžar Converso. «Converso pryznačany dla ludziej, jakija žadajuć absalutnaj kanfidencyjnaści i svabody ad luboj formy sačeńnia — urada abo karparacyi», — kazali stvaralniki. Ekśpiert pa infarmacyjnaj biaśpiecy, jaki piša pad niknejmam Crnkovic, vyrašyŭ heta pravieryć i atrymaŭ niesuciašalnyja vysnovy.

Crnkoviča raźjušyła, jak zaciata stvaralniki miesiendžara raspaviadali pra toje, jaki ichni miesiendžar biaśpiečny, dy jašče i prydumvali plotki pra stvaralnikaŭ inšych miesiendžaraŭ.

«Nie zachoŭvaje vašych źviestak i vykarystoŭvaje ŭnikalnuju schiemu šyfravańnia, jakuju niemahčyma ŭzłamać»

Stvaralniki śćviardžali, što Converso źviazvaje pryłady naŭprost, biez pasiarednikaŭ. Jany nazyvali svaju prahramu «budučyniaj pryvatnaści», a ŭ rekłamie śćviardžałasia, što «ŭsie inšyja miesiendžary vyhladajuć jak stvoranyja śpiecsłužbami ŭ paraŭnańni z Converso».

Bolšaść śćviardžeńniaŭ kampanii akazalisia niapraŭdaj. Kali vieryć Crnkoviču, miesiendžar na spravie vykarystoŭvaje sastarełaje i nie nadta nadziejnaje šyfravańnie, maje centralizavanuju klijent-sierviernuju architekturu i źbiraje źviestki karystalnikaŭ (u tym liku praz pamyłku ŭ kodzie vydaje starońnim resursam IP-adrasy karystalnikaŭ).

Kali karystalnikaŭ źviazvajuć z dapamohaj niejkaha centralnaha sierviera, jak u Telegram, Viber, Elements i ŭsich inšych bolš-mienš viadomych miesiendžarach. Źviazvać pryłady naŭprost vielmi składana, bo dahetul zastajucca niavyrašanymi dźvie hałoŭnyja prablemy - jak pryładam šukać adna-adnu, kab jany mahli źviazacca i jak dastaŭlać paviedamleńni, kali pryłada nie ŭ sietcy. Prostaha rašeńnia prablemam niama, a inšyja abo robiać vykarystańnie prahramaŭ vielmi składanymi (da prykładu, kab źviazacca ź siabram vam treba było b viedać dakładny adras jahonaj pryłady i čakać, pakul jon uvojdzie ŭ sietku, amal jak pry razmovie pa haradskim telefonie), abo vielmi składanyja ŭ realizacyi.

Pavialičyć

Spravy akazalisia našmat horšymi

Ale ekśpiert pajšoŭ dalej. Unutry koda jon zaŭvažyŭ spasyłki na vobłačnuju bazu danych. I vyrašyŭ pahladzieć, što ŭ joj, bo źviarnuŭ uvahu na toje, što ŭ jaje zapisvajecca padazrona šmat źviestak.

Akazałasia, što hetaja absalutna adkrytaja dla luboha čałavieka baza zachoŭvała poŭny śpis karystalnikaŭ i ŭsich ichnich dziejańniaŭ u miesiendžary — da prykładu, pakazvaje, jaki karystalnik kamu piša abo telefanuje, kali jon zarehistravaŭsia i na jaki numar. 

Paśla hetaha jon pasłaŭ zapyty ŭ inšyja tablicy bazy i atrymaŭ usie mietadanyja videa— i aŭdyjazvankoŭ (chto kamu telefanuje, ź jakoha adrasu i kolki doŭžyłasia razmova) i poŭny śpis unutranych identyfikataraŭ karystalnikaŭ u bazie danych. Taksama tam byli źviestki pra čaty i paviedamleńni, ale jany choć byli schavanyja ad usich achvotnych.

Pavialičyć

Ale Crnkovič vyrašyŭ daśledavać i paviedamleńni, jakich byvaje dva typy: niezašyfravanyja i zašyfravanyja. Ź pieršymi ŭsio jasna — siervier bačyć ich jak adkryty tekst. To-bok, kali niechta ŭzłamaje siervier Converso, to atrymaje da ich dostup (zdajecca, tak budzie i kali ŭzłamajuć sierviery Telegram).

Zašyfravanyja pieradajucca i zachoŭvajucca zašyfravanymi. Ale jość niuans: parol, jaki vykarystoŭvaŭsia pry šyfravańni — heta ŭnutrany identyfikatar karystalnika, jaki, jak my kazali vyšej, byŭ dastupny ŭsim achvotnym. To-bok, kali chakier zdoleŭ by pierachapić zašyfravanaje paviedamleńnie, to zdoleŭ by i rasšyfravać jaho.

Paśla ŭzhadnieńnia publikacyi z Sonverso kampanija padziakavała daśledčyku za «ŭvahu da ŭraźlivaściaŭ» ažno dvojčy i paabiacała jak chutčej vypravić usie chiby. Ale paśla pačałosia dziŭnaje.

Suzasnavalnik miesiendžaraŭ napisaŭ daśledčyku i paraiŭ «vydalić materyjał, kab nie mieć prablem z zakonam». Jon admoviŭsia, ale hetaja historyja tolki dadała jašče bolej papularnaści jahonamu artykułu. Pry hetym stvaralniki Sonverso pačali vydalać chłuśniu sa svajho sajta i rekłamnych materyjałaŭ.

«Dziela vašaj biaśpieki nie varta vykarystoŭvać Converso dla adpraŭki paviedamleńniaŭ, jakija vy nie hatovyja apublikavać u Twitter», — padsumoŭvaje Crnkovic.

• 0
• 30
• 0
• 18
• 4
• 4
• 6