«Usio heta nahadvała film «Terminał» z Tomam Chenksam». Historyja biełarusa, jakoha zatrymali ŭ Armienii
Jaŭhien Hucałaŭ z 2021 hoda žyvie ŭ Turcyi, kudy źjechaŭ paśla represij na radzimie. U krasaviku 2023 hodu Jaŭhien palacieŭ u Armeniju, dzie jaho zatrymała palicyja. U hutarcy sa «Svabodaj» jon raskazvaje pra svaje pryhody.
«Kryminalnuju spravu zaviali za satyryčnaje videa ŭ Instagram»
Jaŭhiena Hucałava nazyvali «Biełaruskim Forestam Hampam». U 2019 hodzie jon za 10 dzion prabieh Biełaruś z poŭnačy na poŭdzień, adoleŭšy 650 kilametraŭ. Z 2015 hodu arhanizoŭvaŭ pachody pa Tureččynie, vadziŭ hrupy pa cikavych miaścinach. U 2020 hodzie Jaŭhiena za ŭdzieł u maršach pratestu zatrymlivała milicyja ŭ Viciebsku. Paśla hetaha ŭ 2021-m jon pierabraŭsia ŭ Tureččynu. Pierajechaŭšy, daviedaŭsia, što na Radzimie na jaho zaviali kryminalnuju spravu — za «Źniavahu dziaržaŭnych symbalaŭ» (artykuł 370 Kryminalnaha kodeksu).
«Heta było satyryčnaje videa, jakoje ja źniaŭ i vykłaŭ u Instagram. Milicyjanty spachapilisia, kali ja byŭ užo ŭ Tureččynie. Śledčy pisaŭ mnie paviedamleńni, kab ja viarnuŭsia i pryjšoŭ na dopyt», — raskazvaje Jaŭhien.
U Tureččynie jon atrymaŭ časovy dazvoł na žycharstva. Paśla ziemlatrusu 2023 hodu Jaŭhien uklučyŭsia ŭ valanterskuju dziejnaść, źbiraŭ dapamohu paciarpiełym. U krasaviku jon vyrašyŭ vyjechać z Tureččyny ŭ Jerevan, kab «abnulić» čas znachodžańnia ŭ krainie j paśla padać dakumenty na novy dazvoł na žycharstva. Ale ŭ Armenii biełarusa zatrymali prosta ŭ aeraporcie. Pryčynaj nazvali toje, što jon znachodzicca ŭ vyšuku ŭ Biełarusi.
«Patłumačyli, što vyšuk — u miežach EAEZ, Eŭrazijskaha ekanamičnaha źviazu. Pamiežniki zatrymali adrazu na pašpartnym kantroli, skazali čakać palicyi», — raskazvaje Jaŭhien.
«U izalatary pytalisia: «Ženia-džan, chočaš jeści?»
U aeraporcie, pa słovach Jaŭhiena, da jaho pryjšła palicyja ź pierakładčykam. Jamu patłumačyli pra vyšuk, pakazali adpaviednyja papiery. Potym zavieźli ŭ izalatar časovaha ŭtrymańnia. Tam Jaŭhien prabyŭ dvoje sutak.
«Abychodzilisia dobra. Takoha bydlačaha staŭleńnia, jak u Biełarusi ad milicyi, nie było. Kazali i palicejskija, i ludzi pry sustrečach, što viedajuć pra palityčnuju sytuacyju ŭ Biełarusi. Łukašenku jany čamuści nazyvali «Mister Bulba», — kaža Jaŭhien.
U kamery jon byŭ adzin. Kaža, što tam byŭ tolki kran ź pitnoj vadoj, prybiralni nie było, ale ŭ jaje vadzili na patrabavańnie, jak i ŭ duš.
«Karmili narmalna. Tolki ja nie zrazumieŭ, jak ježu davali pa časie. Bo prychodzili j pytalisia: «Ženia-džan, chočaš jeści?» Nu, davajcie. Jašče i dabaŭku prapanoŭvali», — zhadvaje biełarus.
U vyniku prakuratura Armenii vydała pastanovu adpuścić Jaŭhiena, bo pavodle armianskaha zakanadaŭstva takija złačynstvy, jak «Źniavaha dziaržaŭnych symbalaŭ», nie karajucca pazbaŭleńniem voli, jak u Biełarusi.
«Usio heta nahadvała film «Terminał»
Choć ź izalatara Jaŭhiena adpuścili, ale na hetym pryhody nia skončylisia, jak raskazvaje mužčyna. Vyjaviłasia, što jamu nielha vyjechać z Armenii.
«Skazali, što ja ŭ vyšuku, tamu mianie nia mohuć vypuścić. Mnie heta nahadvała film «Terminał». Ja j kažu pamiežnikam, što ci hladzieli jany jaho? A jany mnie: «Tam byŭ tolki terminał, a ŭ ciabie — usia kraina. Ženia-džan, jedź, vyvučaj Armeniju!» — kaža biełarus.
«Vyvučaŭ» jon Armeniju paŭtara miesiaca: pisaŭ zvaroty ŭ milicyju, prakuraturu, Słužbu nacyjanalnaj biaśpieki, upaŭnavažanamu pa pravach čałavieka. Jaŭhien kaža, što z Hieneralnaj prakuratury jamu dali dakument, što nia majuć pretenzij. Z hetaj papieraj jon sprabavaŭ znoŭ vyjechać z Armenii, ale niaŭdała.
«Skazali: «Chaj inicyjatar vyšuku zdymaje jaho, bo ty jość u prahramie, i my nia možam ciabie vypuścić». Znoŭ pačaŭ pisać pa instancyjach. U vyniku atrymaŭ papieru ad Słužby nacyjanalnaj biaśpieki, što armianie ŭ adnabakovym paradku zdymajuć ź mianie vyšuk», — zhadvaje biełarus.
Jon dadaŭ, što navat sprabavaŭ padacca na palityčny prytułak u Armenii, bo bajaŭsia ekstradycyi ŭ Biełaruś. «Ale, musić, jany padumali, što navošta im takija prablemy — davać status uciekača biełarusu, chaj lepš jedzie kudy choča», — miarkuje Jaŭhien.
Jaŭhien kaža, što ŭ Armenii sustrakaŭ šmat rasiejcaŭ, jakich pieraśledujuć na ich radzimie za antyvajennyja lozunhi ci vykazvańni.
«Niekatoryja ŭciakajuć ad mabilizacyi i atrymali artykuły za «dezercirstva». Ich taksama zatrymlivali, jak i mianie. I potym jany nie mahli vyjechać z Armenii. Ale ŭrešcie im dapamahli pravaabarončyja arhanizacyi», — raskazvaje biełarus.
Ciapier Jaŭhien Hucałaŭ viarnuŭsia ŭ Tureččynu i budzie rabić časovy dazvoł na žycharstva.
«Svaboda» źviarnułasia ŭ Ministerstva ŭnutranych spraŭ Armenii z prośbaj prakamentavać zatrymańnie Jaŭhiena Hucałava. Viedamstva pakul nie prakamentavała sytuacyju.
«Prosta zalivaješsia ślaźmi i dumaješ: za što?» Iryna Ščasnaja i jaje čatyry balučyja hady za kratami7
Kamientary