Kaalicyja Abjadnanych demakratyčnych sił bolš nie isnuje, zajaviŭ na svaim pasiadžeńni 21 listapada ŭ Minsku sojm Partyi BNF.
Jak patłumačyŭ dadzienaje rašeńnie namieśnik staršyni partyi Ihar Lalkoŭ, ustanoŭčyja dakumienty ab stvareńni ADS ciapier nie vykonvajucca i faktyčna stracili svaju siłu. Pavodle jaho słoŭ,
asnoŭny kirujučy orhan ADS — palitrada — nie źbirajecca z 2008 hoda, a ŭsie pryncypovyja rašeńni prymajucca «tolki niekalkimi členami prezidyuma palitrady».
Siabra sojma Partyi BNF Vincuk Viačorka ličyć niasvoječasovym pryniaćcie takoj pastanovy ŭ adnosinach da ADS. Pavodle jaho słoŭ, rašeńnie partyi ab faktyčnym spynieńni isnavańnia kaalicyi budzie niehatyŭna ŭspryniataje jak unutry krainy, hetak i za jaje miežami.
«Stvareńnie ADS dazvoliła biełaruskaj apazicyi isnavać u vyhladzie adzinaha subjekta pry pieramovach z uładami. Mienavita ŭ hetym vyhladzie struktura ŭsprymałasia i za miažoj.
Adsutnaść uzhodnienaj pazicyi moža pazbavić apazicyju miesca ŭ parłamienckaj struktury Uschodniaha partniorstva», — skazaŭ jon.
Sa svajho boku staršynia partyi
Alaksiej Janukievič zajaviŭ, što ADS za miažoj užo nichto nie razhladaje ŭ jakaści adzinaha vyraźnika dumki apazicyi.
U svajoj pastanovie sojm Partyi BNF daručyŭ staršyni i jaho namieśnikam pačać pieramovy z usimi palityčnymi siłami Biełarusi ab stvareńni pastajanna dziejučaj kansultacyjnaj placoŭki.
Abjadnanyja demakratyčnyja siły (ADS) — kaalicyja palityčnych partyj u Biełarusi — była stvorana ŭ 2005 hodzie na kanhresie demakratyčnych sił.
U ADS tady ŭvajšli Partyja BNF, Abjadnanaja hramadzianskaja partyja, Biełaruskaja sacyjał-demakratyčnaja partyja, Biełaruskaja partyja pracy, Partyja kamunistaŭ Biełarusi, Biełaruskaja partyja žančyn i ruch «Za svabodnaje raźvićcio pradprymalnictva». Aficyjny sajt ADS www.udf.by.
