Кааліцыя Аб'яднаных дэмакратычных сіл больш не існуе, заявіў на сваім пасяджэнні 21 лістапада ў Мінску сойм Партыі БНФ.
Як патлумачыў дадзенае рашэнне намеснік старшыні партыі Ігар Лялькоў, устаноўчыя дакументы аб стварэнні АДС цяпер не выконваюцца і фактычна страцілі сваю сілу. Паводле яго слоў,
асноўны кіруючы орган АДС — палітрада — не збіраецца з 2008 года, а ўсе прынцыповыя рашэнні прымаюцца «толькі некалькімі членамі прэзідыума палітрады».
Сябра сойма Партыі БНФ Вінцук Вячорка лічыць нясвоечасовым прыняцце такой пастановы ў адносінах да АДС. Паводле яго слоў, рашэнне партыі аб фактычным спыненні існавання кааліцыі будзе негатыўна ўспрынятае як унутры краіны, гэтак і за яе межамі.
«Стварэнне АДС дазволіла беларускай апазіцыі існаваць у выглядзе адзінага суб'екта пры перамовах з уладамі. Менавіта ў гэтым выглядзе структура ўспрымалася і за мяжой.
Адсутнасць узгодненай пазіцыі можа пазбавіць апазіцыю месца ў парламенцкай структуры Усходняга партнёрства», — сказаў ён.
Са свайго боку старшыня партыі
Аляксей Янукевіч заявіў, што АДС за мяжой ужо ніхто не разглядае ў якасці адзінага выразніка думкі апазіцыі.
У сваёй пастанове сойм Партыі БНФ даручыў старшыні і яго намеснікам пачаць перамовы з усімі палітычнымі сіламі Беларусі аб стварэнні пастаянна дзеючай кансультацыйнай пляцоўкі.
Аб'яднаныя дэмакратычныя сілы (АДС) — кааліцыя палітычных партый у Беларусі — была створана ў 2005 годзе на кангрэсе дэмакратычных сіл.
У АДС тады ўвайшлі Партыя БНФ, Аб'яднаная грамадзянская партыя, Беларуская сацыял-дэмакратычная партыя, Беларуская партыя працы, Партыя камуністаў Беларусі, Беларуская партыя жанчын і рух «За свабоднае развіццё прадпрымальніцтва». Афіцыйны сайт АДС www.udf.by.
Каментары