Vyjava: vecteezy
Pryłada Meta dla stvareńnia muzyki pad nazvaj MusicGen, dema-viersiju jakoj možna samastojna pasprabavać tut, pieraŭtvaraje vaša tekstavaje apisańnie (naprykład, «drajvovaja pop-pieśnia 80-ch ź ciažkimi barabanami i sintezatarami») prykładna ŭ 12-siekundny aŭdyjatrek. Pry žadańni vy zmožacie dać padkazku pryładzie MusicGen u vyhladzie sapraŭdnaj pieśni (kali chočacie, kab zhienieravany trek hučaŭ padobna da niejkaj kankretnaj kampazicyi) — i ŭ hetym vypadku prahrama pasprabuje prytrymlivacca jak apisańnia, tak i miełodyi-padkazki.
U Meta kažuć, što MusicGen navučałasia na 20 000 hadzinach muzyki, u tym liku na 10 000 «vysakajakasnych» licenzijnych muzyčnych trekach i 390 000 instrumientalnych trekach ź vialikich muzyčnych miedyjatek. Kampanija nie pakazała koda, jaki jana vykarystoŭvała dla navučańnia madeli, ale zrabiła dastupnymi papiarednie padrychtavanyja madeli, jakija moža zapuścić kožny, chto maje patrebnaje abstalavańnie — u asnoŭnym hrafičny pracesar z prykładna 16 HB pamiaci.
Hienieratyŭnaja muzyka, stvoranaja ŠI, vidavočna palapšajecca (dastatkova ŭspomnić pryłady dla stvareńnia ŠI muzyki kštałtu Riffusion, Dance Diffusion ci Jukebox OpenAI), choć pakul i nie moža poŭnaściu zamianić muzykaŭ-ludziej. Ale, prynamsi, dla stvareńnia fonavaha muzyčnaha supravadžeńnia dla liftaŭ ci supiermarkietaŭ hienieratyŭnyja pryłady ŭžo prydatnyja.
Pry hetym asnoŭnyja etyčnyja i jurydyčnyja prablemy jašče nie vyrašany. Usio čaściej treki, zroblenyja ŭ chatnich umovach i pry dapamozie ŠI, stanoviacca virusnymi. Štučny intelekt vykarystoŭvaje kampazicyi, što ŭžo napisanyja, dla stvareńnia padobnych hukaŭ, jakija možna vydać za sapraŭdnyja ci, prynamsi, dastatkova blizkija. Muzyčnyja łejbły pakul nie dajuć siabie kryŭdzić, patrabujučy vydalać padobnyja «pieśni» ŭ suviazi z mažlivymi prablemami ź intelektualnaj ułasnaściu, ale pa-raniejšamu niama pravavoj jasnaści nakont taho, ci parušaje deepfake-muzyka aŭtarskija pravy vykanaŭcaŭ, łejbłaŭ i inšych pravaŭładalnikaŭ.
Chutčej za ŭsio, nie spatrebicca šmat času, pierš čym źjaviacca instrukcyi pa hetym pytańni, adznačaje TechCrunch. Jasnaść moža dadać niekalki sudovych iskaŭ, što buduć datyčyć pravoŭ vykanaŭcaŭ, čyja praca vykarystoŭvajecca dla navučańnia sistem ŠI bieź ich viedama abo zhody. Padobnyja sudovyja precedenty biassprečna mohuć źjavicca nieŭzabavie i buduć tolki viaršyniaj ajśbierha.
Sa svajho boku Meta, jakaja nie nakładaje abmiežavańniaŭ na toje, jak možna vykarystoŭvać MusicGen, kaža, što ŭsia muzyka, jakoj navučaŭsia MusicGen, «achoplena jurydyčnymi pahadnieńniami z pravaŭładalnikami», u tym liku ździełkaj z Shutterstock.
Čytajcie taksama:
Muzyka, stvoranaja štučnym intelektam, ździvić vas
Biełarusu ŭdałosia dabicca ad Meta prychavańnia źviestak pra svoj danat praz fejsbuk
Bolš za ŭsio ad raźvićcia štučnaha intelektu paciarpiać rabotniki razumovaj pracy — analityki
