Biełaruski komik raskazaŭ pra stendap pierad adździełam kryminalnaha vyšuku i toje, jak vyhladaje «prezidenckaja» hrymiorka

Karparatyvy: zarobki i siurpryzy

Michaś Iljin zhadvaje, što jaho samy pravalny stendap byŭ pierad supracoŭnikami adździeła kryminalnaha vyšuku Leninskaha RAUS horada Bresta.

«Ja vystupiŭ tam vypadkova. Mianie terminova paklikali vystupić na karparatyvie. Ja pryjechaŭ, i za piać chvilin da vychadu na scenu mnie kažuć, što ŭ zale siadziać supracoŭniki kryminalnaha vyšuku. Zrazumieła, što možna było admovicca. Ale ja padumaŭ, što, moža, z hetaha vyjdzie niejki pierformans. Ja vyjdu, pažartuju na svaje temy, u tym liku pra Łukašenku».

Čym skončyłasia, Michaś nie raskryŭ — prapanuje pryjści na jaho stendap i pačuć kancoŭku.

Iljin adznačaje, što za ŭsio žyćcio vystupiŭ pryblizna na piaci karparatyvach. A apošnija paŭhoda jon vystupaje tolki na biełaruskaj movie. 

«Ja razumieju, što hetym ja śviadoma adrezaŭ siabie ad takich mahčymaściaŭ zarobku», — zaŭvažaje stendap-komik.

Pa jahonych słovach, za ŭznaharodžańnie ad vystupu na adnym karparatyvie možna apłacić košt arendy kvatery ŭ Varšavie za pałovu miesiaca. «Heta nie tyja hrošy, praź jakija možna admovicca ad svajoj asnoŭnaj pracy», — ličyć Iljin.

Pra razmovy ź siłavikami ŭ hrymiorcy

Iljin zhadvaje pra toje, jak u 2011 hodzie paśla padziejaŭ Płoščy 19 śniežnia 2010 hoda da jaho prychodziŭ kadebist.

«Ja niedzie na niejkim zdymku zaśviaciŭsia. I praź miesiacy try paśla hetaj padziei jon pryjšoŭ da mianie na pracu. Maja načalnica paprasiła padyści ŭ hrymiorku, jakaja aficyjna nazyvałasia «prezidenckaj» (na joj tak i było napisana). Heta zvyčajnaja hrymiorka. Tolki kanapy ŭ joj bolš darahija — skuranyja.

Kali ja tudy zajšoŭ, to pabačyŭ mužčynu, pa jakim usio stała zrazumieła. Tam ža siadzieła maja načalnica. Heta vyklikała ŭ mianie ŭśmiešku, bo vyhladała, byccam maci vyklikali da zavuča».

Michaś zhadvaje, što jon nie byŭ napužany, bo termin pryciahnieńnia da administracyjnaj adkaznaści ŭžo minuŭ. Akramia hetaha, jon razumieŭ, što jaho naŭrad ci buduć vierbavać, bo pry razmovie prysutničaje načalnica.

«Mianie taksama paviesialiła toje, što jany siadzieli za stałom, a kresła dla mianie pastavili asobna, pasiaredzinie pamiaškańnia. Ja viedaŭ hetyja prykoły, bo jašče maładafrontaŭcam udzielničaŭ va ŭsialakich treninhach «Hramadzianin i śledstva», jakija rabiŭ pravaabaronca Uścinaŭ.

Jon raskazvaŭ pra toje, jak pracujuć siłaviki: adzin z pryjomaŭ — heta pastavić kresła niedzie pasiaredzinie pakoja. A jany buduć siadzieć za stałom i nazirać za tvajoj nievierbalnaj reakcyjaj. I kab tabie było niazručna, kab mieć psichałahičnuju pieravahu nad taboju», — dzielicca Iljin.

Stendap-komik adznačaje, što byŭ ździŭleny, što sustreča adpaviadaje tamu, što jamu raskazvali na treninhach, što ŭsio praŭda, «jak pa mietadyčcy». Michaś uziaŭ kresła i prysieŭ da stała.

«Była dziŭnaja hutarka. Mnie pakazali razdrukoŭku fotazdymka vielmi drennaj jakaści. Ja padumaŭ, jaki biedny brescki KDB. Potym była hutarka kštałtu «nu navošta vam heta treba, nie zajmajciesia hetym, Michaił Alaksandravič». Chacia na toj momant ja dla siabie vyrašyŭ, što vybary minuli i ja z usioj zmaharskaj dziejnaściu zaviazvaju i pieraklučajusia na pracu», —

zhadvaje Iljin i adznačaje, što ŭ toj čas jon vučyŭsia na žurfaku i ŭžo supracoŭničaŭ ź niekatorymi miedyja.

«Ja razumieŭ, što budu pracavać u žurnalistycy, jakaja sa zmaharstvam nie sumiaščajecca. Ale dla mianie było pryncypovym nie pahadžacca z tym, što jon kaža. Naprykład, ci budu ja siabie dobra vieści. Ja ličyŭ, što heta moža mianie niejak dyskredytavać. Moža, napišuć, što ja ź im vusna zaklučyŭ niejkuju damovu. Ja adkazaŭ niešta kštałtu «ja vas pačuŭ». I na hetym hutarka skončyłasia», — zhadvaje Michaś.

Iljin adznačaje, što byŭ vielmi ździŭleny, što na takuju drobiaź čałaviek marnuje svoj čas.

Hladzicie całkam:

• 1
• 2
• 1
• 0
• 3