«U mianie źjaviłasia mahčymaść spaznać sapraŭdnuju siabie». Niekali viadomaja žurnalistka i błohierka Asia Papłaŭskaja ŭžo čatyry hady žyvie ŭ katalickim klaštary
U svoj čas viadomaja ŭ Biełarusi žurnalistka i błohierka Asia (Halina) Papłaŭskaja ciapier paśpiachova prachodzić navicyjat — pieryjad pasłušnictva, vyprabavańnia pierad ustupleńniem u manaski orden. Heta stała zrazumieła z paviedamleńnia katalickaj kanhrehacyi Siaścior Słužebnic Jezusa ŭ Jeŭcharystyi (Jeŭcharystak), u jakim pieradali pryvitańnie ad Asi i apublikavali jaje fota, paviedamiła vydańnie Katolik.life.
Kaliści Asia Papłaŭskaja viała aktyŭnaje śvieckaje žyćcio, ale čatyry hady tamu vyrašyła stać manaškaj i patłumačyła, što choča «być naturalnaj, pramianistaj, žyvoj».
«Naša Niva» tady pytałasia ŭ jaje, ci praŭda heta, na što Papłaŭskaja adkazała: «Mahčyma. Mahčyma, razdumvaju pra heta ci pajšła». Bolš padrabiazna pra heta jana tady havaryć admoviłasia: «Viedacie, ja b nie chacieła pra heta hutaryć z žurnalistami, heta vielmi intymnaja, asabistaja sprava. Ja bierahu svoj spakoj i svajo pryvatnaje žyćcio».
Asia ŭžo amal hod nie abnaŭlała svaich sacsietak — paśla taho, jak paviedamiła ab pryniaćci jaje ŭ navicyjat. Hetaha momantu jana čakała try hady.
Heta značyć, ahułam užo čatyry hady Asia žyvie ŭ klaštary, ź ich 10 miesiacaŭ — u navicyjacie, jaki doŭžycca minimum hod. Zatym kandydatka prynosić časovyja šluby, a paśla — viečnyja.
Raniej jana viała aktyŭnaje śvieckaje žyćcio, ale ŭsio źmianiłasia, kali Asia pryjšła ŭ Katalickuju carkvu. Spačatku jana stała padarožničać pa Biełarusi i raspaviadać u błohach pra viadomyja chramy. A nieŭzabavie paviedamiła pra žadańnie stać manaškaj, kali joj byŭ 31 hod.
Z tych časoŭ mnohija adhavorvali jaje iści ŭ klaštar, vykazvali ŭpeŭnienaść, što manaskaje žyćcio — nie dla jaje. Adnak prajšło ŭžo čatyry hady, jak Asia pryśviaciła siabie Bohu. Svaju pazicyju jana tłumačyła tak:
«Mnohija ličać, što pajści ŭ klaštar — značyć uciačy ad siabie i ad realnych prablem. Ucioki ad žyćcia. Kažuć: za ścienami klaštara lohka schavacca! A ty pasprabuj naradzić dzicia i vyraścić jaho ŭ hetym žorstkim śviecie! ( … ) Chavacca ŭ klaštary — nie vyjście, heta iluzija, bo žyćcio ŭsiudy adnolkavaje, jano nikoli nie byvaje lohkim (…).
U mianie źjaviłasia mahčymaść spaznać sapraŭdnuju siabie. Spaznać biezumoŭnuju luboŭ Ajca. Ubačyć, što takoje sapraŭdnaja luboŭ, jakaja nie patrabuje, nie raŭnuje i nie kryŭdzicca, nikoli nie spyniajecca.
Klaštar — heta nie ŭcioki. Žyćcio tut dla mianie — heta sustreča. U mianie dastatkova času, kab spaznać siabie i pabudavać hłybokija adnosiny z Boham. U žyćci «ŭ śviecie» ciažej znajści taki čas dla dušy. Žadaju ŭsim nam šukać iścinu. Tady my budziem volnyja i ščaślivyja! U relihijnym abo śvieckim žyćci».
Taksama Asia adkazvała na pytańni ŭ svaim Instagram pra toje, čamu vyrašyła stać manaškaj, ci ciažka było raźvitvacca ź Minskam i tak rezka źmianić žyćcio.
A ŭ svaim Youtube-kanale Asia vykładvała videa ź vieršam, u jakim tłumačyła, što joj chočacca «być naturalnaj, pramianistaj, žyvoj, nie pierśpiektyŭnaj i maładoj u pošukach novych pusteč», «vyzvalicca ad lubych aznačeńniaŭ, rolaŭ i acenak, jak paśla dnia chady pazbavicca ad abcasaŭ, jakija ścierli nohi da kryvi».
Kanhrehacyja Jeŭcharystak zajmajecca pracaj ź dziećmi, moładździu i darosłymi: pravodzić katechizacyju, rychtuje ich da sakramientaŭ, jeździć u łahiery padčas kanikuł, arhanizuje masu mierapryjemstvaŭ, rekalekcyj, malitoŭnych i navat tancavalnych sustreč. Taksama siostry słužać ludziam, jakim heta asabliva treba: sirotam, invalidam, chvorym, adzinokim.
Sudziać hiendyrektara BiełAZa. Pahražaje da 15 hadoŭ9
Kamientary
nu dyk praŭdu ž kažuć
i heta taksama praŭda. pryčym u manastyry, jak va ŭsiakaj zakrytaj supolnaści, byvaje navat horš, čym u t.zv. volnym śviecie