Ja daviedvajusia pra seksualnuju aryjentacyju novych znajomych praź internet.
Naprykład, niadaŭna tak vyrašyła svaje pakuty adnosna novieńkaha na moŭnych kursach. Krok pieršy — znajści jaho profil na Fejsbuku. Krok druhi — znajści ŭ profili punkt «Pieravahi». Krok treci — pračytać u hetym punkcie «mužčyny» i zrazumieć, što novy znajomy — hiej.
Razvod z‑za interneta? Taksama nie pytańnie dla sučasnaha čałavieka.
U Brytanii dniami źjaviłasia čarhovaja nacyjanalnaja hierainia. 61‑hadovaja Šerył Robierts stvaryła falšyvy profil u necie, kab pravieryć «na vašyvaść» muža. Jana napisała, što joj 14, i pačała ź im pierapisvacca. 68‑hadovy Devid Robierts i nie padazravaŭ, što surazmoŭca siadzić u susiednim pakoi. Paśla taho jak jon prapanavaŭ joj zaniacca seksam, žančyna patelefanavała ŭ palicyju. Ciapier Devid Robierts staić na ŭliku jak patencyjalny piedafił, nu a jahonaja ŭžo byłaja žonka atrymała łaŭry słavy i padziaku ad palicyi. Vidavočna, brytanskaja strymanaść zastałasia ŭ časach Vilhielma IV, a čapurystyja brytanki stali, tak by mović, more hot.
Maje znajomyja taksama karystajucca internetam u karyślivych metach naprava i naleva.
Adna z dapamohaj sietki «Ukantakcie» znajšła byłuju dziaŭčynu svajho bojfrenda. Nie majučy mahčymaści jaje «ŭ reale» abmierkavać ź siabroŭkami, jana skinuła spasyłki na jejnuju staronku nam u hrupavym čacie skajpa. A inšy znajomy rehularna znachodzić sabie dziaŭčat na noč praz «Adnakłaśniki». Zaraz nie patrabujuć pašpart — šukajuć profil i znachodziać bolš karysnuju infarmacyju.
Z‑za sacyjalnych sietak u internecie zdarajucca rasčaravańni, razvody i navat zabojstvy na hlebie reŭnaści. Internet uvajšoŭ u našyja łožki. My stali jaho zakładnikami. Kali raniej vy mahli zastukać svajho muža/žonku z kimści ŭ łožku, zaraz isnuje vialikaja ryzyka znajści intymnuju pierapisku ŭ skajpie ci ICQ. Tak, darečy, i raźviałasia adna z maich znajomych par.
U časy Vilhielma IV, miarkuju, było bolš intryh i zahadkavaści. Ciapier usio praściej.
