Я даведваюся пра сэксуальную арыентацыю новых знаёмых праз інтэрнэт.
Напрыклад, нядаўна так вырашыла свае пакуты адносна новенькага на моўных курсах. Крок першы — знайсці яго профіль на Фэйсбуку. Крок другі — знайсці ў профілі пункт «Перавагі». Крок трэці — прачытаць у гэтым пункце «мужчыны» і зразумець, што новы знаёмы — гей.
Развод з‑за інтэрнэта? Таксама не пытанне для сучаснага чалавека.
У Брытаніі днямі з’явілася чарговая нацыянальная гераіня. 61‑гадовая Шэрыл Робертс стварыла фальшывы профіль у нэце, каб праверыць «на вашывасць» мужа. Яна напісала, што ёй 14, і пачала з ім перапісвацца. 68‑гадовы Дэвід Робертс і не падазраваў, што суразмоўца сядзіць у суседнім пакоі. Пасля таго як ён прапанаваў ёй заняцца сэксам, жанчына патэлефанавала ў паліцыю. Цяпер Дэвід Робертс стаіць на ўліку як патэнцыяльны педафіл, ну а ягоная ўжо былая жонка атрымала лаўры славы і падзяку ад паліцыі. Відавочна, брытанская стрыманасць засталася ў часах Вільгельма IV, а чапурыстыя брытанкі сталі, так бы мовіць, more hot.
Мае знаёмыя таксама карыстаюцца інтэрнэтам у карыслівых мэтах направа і налева.
Адна з дапамогай сеткі «Укантакце» знайшла былую дзяўчыну свайго бойфрэнда. Не маючы магчымасці яе «ў рэале» абмеркаваць з сяброўкамі, яна скінула спасылкі на ейную старонку нам у групавым чаце скайпа. А іншы знаёмы рэгулярна знаходзіць сабе дзяўчат на ноч праз «Аднакласнікі». Зараз не патрабуюць пашпарт — шукаюць профіль і знаходзяць больш карысную інфармацыю.
З‑за сацыяльных сетак у інтэрнэце здараюцца расчараванні, разводы і нават забойствы на глебе рэўнасці. Інтэрнэт увайшоў у нашыя ложкі. Мы сталі яго закладнікамі. Калі раней вы маглі застукаць свайго мужа/жонку з кімсьці ў ложку, зараз існуе вялікая рызыка знайсці інтымную перапіску ў скайпе ці ICQ. Так, дарэчы, і развялася адна з маіх знаёмых пар.
У часы Вільгельма IV, мяркую, было больш інтрыг і загадкавасці. Цяпер усё прасцей.
