Roznyja pakaleńni pasvarylisia pamiž saboj u tvitary nakont viadomaha muzyki i biełaruskaj kultury.
Sprečku spravakavaŭ dopis u fejsbuku žurnalista i muzyčnaha ahladalnika Alaksandra Čarnuchi, jaki viadzie youtube-kanał «Ministerstva siepultury», pryśviečany biełaruskaj muzycy. Svoj dopis za 8 lipienia jon prymierkavaŭ da hłabalnaj kampanii #ByCultureGlobal23 — «Raskazać Biełaruś» i z rasčaravańniem raskazaŭ pra varty žalu stan biełaruskaj kultury, dzie pieśnia pa-biełarusku dahetul mocnaja infanahoda, ludzi zamiest Naviband chodziać na «tanny kłon Łabady», a taksama napisaŭ, što ŭ Biełarusi vyrasła novaje pakaleńnie, jakoje nie viedaje, chto taki Lavon Volski.
Dopis sabraŭ niamała kamientaryjaŭ u fejsbuku, ale sapraŭdnaja bojka razharełasia ŭ tvitary, dzie Čarnucha pradublavaŭ svaje tezisy. Tvit sa zhadkaj pra zabyćcio Volskaha padchapiŭ z kamientaryjem «I heta dobra» inšy muzyka, Artur Dzivia, vykanaŭca arkiestravaj muzyki z elemientami biełaruskaha fołka i mietała. Svajo mierkavańnie jon rastłumačyŭ tak:
«Kožnaje pakaleńnie prydumvaje štości svajo. Heta ŭ pryncypie nie niejki artyst pakaleńnia, a artyst dla maleńkaj apazicyjna-muzyčnaj tusovački. Jakoha viedajuć tolki ŭ hetaj tusovačcy».
Hetyja słovy začapili za žyvoje mnohich biełaruskich karystalnikaŭ tvitara. Na ich dumku hety muzyka nie pakaleńnia, a cełaj epochi, a kolkaść aŭdytoryi ničoha nie kaža pra jakaść jahonaj muzyki. Pierapała ad ich niekaplimientarnych acenak i tvorčaści Dzivia. Heta ŭžo ŭ svaju čarhu nie spadabałasia inšym tvitarčukam, jakija stali abaraniać Artura Dzivia i aburacca ahresiŭnym napadkam «tusovački» na muzykanta, z čyim mierkavańniem jana nie zhodnaja.
Urešcie Arturu daviałosia vydalić svoj sprečny tvit i padrabiaźniej tłumačyć svaju pazicyju nakont rok-muzyki, ale heta ŭžo nie mieła sensu, bo staŭleńnie da tvorčaści Volskaha padzialiła tvibaj na dva nieprymiralnyja łahiery. Dla kahości heta nizkajakasny «haŭnarok» z tryma «nadakučlivymi akordami», a chtości adznačaŭ, što sens Volskaha ŭ lirycy, što jon «vostra adčuvaŭ Biełaruś i mocnymi jarkimi vobrazami apisvaŭ toje, jak pačuvajucca ludzi, jakim blizkaja biełaruščyna».
Źjavilisia i trecija, jakija nahadali pra inšy tezis Čarnuchi, što biełarusy nie słuchajuć ni Volskaha, ni jakich inšych biełaruskich vykanaŭcaŭ. I heta, jak vyjaviłasia, sapraŭdy tak: topy biełaruskich čartaŭ składajuć rasijskija hurty i vykanaŭcy.
Skandał u tvitary mieŭ i stanoŭčy vynik. U adnym z tvitaŭ usio toj ža Čarnucha prapanavaŭ usim napisać 10 svaich upadabanych biełaruskich hurtoŭ i vykanaŭcaŭ. Na jaho tvitarčuki, uciahnutyja da hetaha ŭ «bitvu za Volskaha», žyva adhuknulisia vialikaj kolkaściu retvitaŭ sa svaimi ŭłasnymi śpisami.
Mnohija byli ŭściešanyja tym, što dziakujučy sprečcy biełarusy narešcie abmiarkoŭvajuć svaju kulturu, daviedajucca pra isnavańnie novych biełaruskich muzykaŭ, pra jakich nikoli raniej nie čuli, naprykład pra taho ž Dzivia.
A jakija ŭ vas 10 ulubionych biełaruskich hurtoŭ ci muzykantaŭ? Napišycie ŭ kamientaryjach.
«Naša Niva» — bastyjon biełaruščyny
PADTRYMAĆ«Ja taja jašče pamidorka». Što Ihar Tur piša ŭ telehram-čatach sa svajho asnoŭnaha akaŭnta8
Kamientary
I što za ludzi ŭsurjoz karystajucca tvitaram?