Žančyna ŭ aeraporcie (Valensija, Ispanija). Fota: Jose A. Bernat Bacete / Getty Images
Skipłahinh — heta braniravańnie rejsa ź pierasadkaj, kali punktam vašaha pryznačeńnia jość horad, u jakim adbyvajecca pierasadka. A potym vy prosta admaŭlajeciesia ad druhoha etapu padarožža.
Veb-sajt braniravańnia avijabiletaŭ Skiplagged.com navat pabudavaŭ biznes na hetaj kancepcyi, stvaryŭšy płatformu, jakaja papiaredžvaje padarožnikaŭ ab takich prapanovach.
Adnak avijakampanii zmahajucca z hetaj źjavaj jak mohuć: naprykład, zaklučajuć z pasažyrami abaviazkovyja damovy pra toje, što nielha prapuścić rejs, abo pahražajuć, što ŭ vyniku nievykarystańnia bileta kampanija naohuł zabaronić braniravać u jaje kvitki. Niadaŭna American Airlines anulavała bilet padletka, jaki nie źbiraŭsia lacieć u kancavy punkt pryznačeńnia.
Dzieviać hadoŭ tamu United Airlines i turystyčny veb-sajt Orbitz padali ŭ sud na hienieralnaha dyrektara sajta Skiplagged Aktarara Zamana. U pazovie jon abvinavačvaŭsia ŭ «niadobrasumlennaj kankurencyi i padmannych pavodzinach». Kampanii zajavili, što veb-sajt pa skipłahinhu kaštavaŭ im 75 tysiač dalaraŭ stračanaj vyhady.
Sprava była raspačataja ŭ štacie Ilinojs, ale jaje adchilili, bo sud nie mieŭ jurysdykcyi nad Zamanam, jaki pracavaŭ i žyŭ u Ńju-Jorku, što znachodzicca ŭ inšym štacie.
Na sajcie ž Skiplagged havaryłasia, što praktyka skipłahinhu «całkam zakonnaja».
Namier avijakampanij — zapałochać pasažyraŭ i viarnuć toje, što jany ličać stračanym prybytkam. Adnak ekśpierty kažuć, što prablemu stvaryli sami avijakampanii, jakija farmirujuć ceny na bilety takim čynam, što heta padachvočvaje da skipłahinhu.
Zakony hieamietryi nie zaŭsiody pracujuć
Skipłahinh mahčymy tolki tamu, što cenaŭtvareńnie avijabiletaŭ nie padparadkoŭvajecca adnamu z asnoŭnych zakonaŭ hieamietryi — pra niaroŭnaść trochvuholnika.
Suma daŭžyń lubych dvuch bakoŭ trochvuholnika bolšaja, čym daŭžynia jaho treciaha boku. Hetaje praviła pracuje amal va ŭsich śfierach paŭsiadzionnaha čałaviečaha dośviedu. Ale heta nie datyčyć pieralotaŭ.
Fotazdymak z błoha matematyka Brajana Chiejsa, dzie jon pakazvaje, što cana palotu z Bostana ŭ Fiładelfiju składaje 562 dalary, ale kali lacieć praz Detrojt — palot abydziecca ŭsiaho ŭ 276 dalaraŭ. Pry hetym samy tanny naŭprostavy kvitok z Bostana ŭ Detrojt kaštuje 1224 dalary. Takim čynam, samy tanny sposab trapić u Detrojt — nabyć kvitok u Fiładelfiju praz Detrojt. Fota: bit-player.org
My mahli b čakać, što taryfy avijakampanij buduć bolš-mienš prytrymlivacca hetaha praviła i dziejničać jak mietryka adlehłaści pamiž haradami.
Z ulikam paliva, techničnaha absłuhoŭvańnia i apłaty pracy ekipaža palot na samalocie z Varšavy ŭ Stambuł z nastupnym pieralotam sa Stambuła ŭ Tbilisi pavinien kaštavać bolš, čym palot naŭprost z Varšavy ŭ Tbilisi.
Ale heta nie tak, bo, viadoma, pramyja rejsy karystajucca bolš vysokim popytam, čym ź pierasadkami, — i avijakampanii vystaŭlajuć na ich bolš vysokija ceny.
Kali ž bieśpierasadačnyja rejsy całkam zahružanyja, ale zastajucca volnyja miescy na maršrutach ź pierasadkaj, avijakampanii zapaŭniajuć ich pa ŭžo nie takoj vysokaj canie.
Čytajcie jašče:
Kab vandroŭka nie pieratvaryłasia ŭ svarki: jak pavodzić siabie, kali padarožničaješ u kampanii
Nas čakaje bolš stresaŭ u palotach: z-za źmieny klimatu turbulentnaść stanovicca bolš častaj źjavaj
Pasažyru nadakučyli śmiardziučyja nohi susiedki. Jon vyrašyŭ prablemu aryhinalna
