Studenty Biełaruskaha dziaržaŭnaha miedycynskaha ŭniviersiteta. Ilustracyjnaje fota: bsmu.by
Kali paraŭnoŭvać ustupnuju kampaniju — 2023 z ustupnaj kampanijaj minułaha hoda, to adrazu bačna, što istotna vyrasła kolkaść abituryjentaŭ, jakija buduć vučycca na ŭmovach metavaj padrychtoŭki. U 2022 hodzie na metavy pryjom pa ŭsich napramkach vyłučałasia roŭna pałova biudžetnych miescaŭ. A ŭ 2023 hodzie karcina z metavym pryjomam inšaja:
— lačebny fakultet — 60%;
— piedyjatryčny fakultet — 80%;
— stamatałahičny fakultet — 80%;
— miedyka-prafiłaktyčny fakultet — 60%;
— farmaceŭtyčny fakultet — 60%.
Nahadajem: tym, chto vučyŭsia pa metavym nakiravańni, paśla vučoby treba budzie piać hadoŭ adpracavać pa raźmierkavańni ŭ arhanizacyi achovy zdaroŭja, ź jakoj raniej była zaklučana damova.
Vierahodna, pavialičvajučy nabor studentaŭ pa metavym nakiravańni, biełaruskija ŭłady raźličvajuć vyrašyć pytańnie ź niedachopam lekaraŭ. Apošnija try hady kolkaść miedycynskich rabotnikaŭ u krainie skaračajecca. Na fonie pastajannych represij mnohija miedyki vyrašajuć źjechać pracavać za miažu.
Siońnia ahulnarespublikanski bank vakansij vydaje bolš za 6,5 tysiačy vakansij doktara i bolš za 4 tysiačy vakansij dla miedycynskich siaścior.
Dla taho, kab zrabić pastupleńnie dla metavych abituryjentaŭ bolš prostym, sioleta prydumali novaŭviadzieńnie: im nie treba było zdavać CT. Prachadny bał metavikoŭ składaŭsia nie z čatyroch kampanientaŭ, jak u zvyčajnych abituryjentaŭ (siaredni bał atestata, vyniki troch CT i CE), a ŭsiaho z dvuch (siaredni bał atestata i vynik unutranaha ispytu pa chimii ci bijałohii, jaki pravodziŭ sam BDMU).
I voś jakimi byli prachadnyja bały ŭ metavikoŭ:
— lačebny fakultet — ad 110 (Viciebskaja vobłaść) da 179 (Bresckaja i Minskaja vobłaści) bałaŭ;
— piedyjatryčny fakultet — ad 99 (Homielskaja vobłaść) da 138 (Bresckaja vobłaść) bałaŭ;
— stamatałahičny fakultet — ad 158 (Viciebskaja vobłaść) da 184 (Hrodzienskaja vobłaść) bałaŭ;
— farmaceŭtyčny fakultet — ad 167 (Minskaja vobłaść) da 195 (Bresckaja vobłaść).
Atrymlivajecca, što budučamu piedyjatru z Homielskaj vobłaści, jaki mieŭ siaredni bał atestata chacia b 6 bałaŭ, dastatkova było zdać unutrany ispyt na 4 pa 10-balnaj sistemie.
Dla paraŭnańnia: hod tamu, kab pastupić na piedyjatryčny fakultet metaviku, treba było nabrać ad 259 da 309 bałaŭ z 400 mahčymych. Atrymlivajecca, u 2022 hodzie ŭmoŭnamu piedyjatru-metaviku ź siarednim bałam atestata 6 (60 bałaŭ) treba było zdać try centralizavanyja teściravańni nie mienš čym na 50 bałaŭ kožnaje.
Niezadavolenaść metavikami miedycynskich VNU Łukašenka vykazvaŭ jašče ŭ mai:
«Zdajecca, rychtujem dastatkova lekaraŭ i miedsiaścior, a ŭ rajonach nie zatrymlivajucca navat metaviki. Šukajuć sabie miesca ŭ stalicy ci, što jašče horš, za miažoju. Raźbiaryciesia z metavikami. Raźbiaryciesia, kaho vy tudy nabirajecie».
Źvierniem uvahu i na toje, što jon dadaŭ: «Ty pavinien tam piać hadoŭ adpracavać. Zamuž, jašče niekudy tam… Heta nie prymajecca. Piać hadoŭ idzi adpracuj. My tracim kałasalnyja hrošy na padrychtoŭku miedykaŭ. Ni ŭ adnoj śfiery takich vydatkaŭ niama, a ŭ nas usio volnica».
Adna ź pieršakurśnic, jakaja ŭ hetym hodzie pačnie vučycca pa metavym nakiravańni, paviedamiła «Našaj Nivie» cikavuju reč: u damovie, jakuju jana padpisała, paznačana, što ŭ vypadku, kali jana padčas adpracoŭki pojdzie ŭ dekretny adpačynak, hety termin nie budzie zaličany ŭ termin abaviazkovaj adpracoŭki.
Chacia ŭ Kodeksie ab adukacyi napisana, što pa žadańni maładoha śpiecyjalista ŭ termin abaviazkovaj adpracoŭki zaličvajecca pieryjad znachodžańnia ŭ adpačynku pa dohladzie dziciaci da jaho troch hadoŭ.
Niekalki vypusknic BDMU paćvierdzili, što raniej niekatoryja karystalisia padobnaj chitraściu dla taho, kab nie pracavać pa raźmierkavańni ŭvieś termin u miescy, jakoje tabie nie padabajecca. «Jašče hadoŭ siem tamu maja siabroŭka-adnahrupnica śpiecyjalna vyličvała, kali joj lepš zaciažaryć. Tady dastatkova było vyjści chacia b na adzin pracoŭny dzień pa raźmierkavańni, kab uvieś dekretny adpačynak potym zaličyli ŭ termin raźmierkavańnia», — śćviardžaje adna z našych surazmoŭcaŭ.
Čytajcie taksama:
Ustupnaja kampanija: da IT i jurydyčnaj spravy stała mienš cikavaści
