«Kab Pucin nie vyhladaŭ dziedam». U Kramli vyznačylisia, chto budzie sparynh-partniorami na prezidenckich vybarach 2024 hoda

U palityčnym błoku Administracyi prezidenta RF, jakim kiruje Siarhiej Kiryjenka, vyznačylisia sa «sparynh-partniorami», jakija buduć «kankuravać» z Uładzimiram Pucinym na prezidenckich vybarach 2024 hoda. Pa słovach dźviuch krynic «Mieduzy», blizkich da Kramla, adnym z hałoŭnych kryteryjaŭ ich adboru staŭ uzrost, paviedamlaje vydańnie.

Siarod zarehistravanych kandydataŭ nie pavinna być palitykaŭ, maładziejšych za 50 hadoŭ. Pavodle acenki čynoŭnikaŭ AP, najaŭnaść takich kandydataŭ u biuleteni moža prymusić rasijan zadumacca pra toje, što 70-hadovy Pucin — «užo nie toj čałaviek, jaki prychodziŭ da ŭłady ź ćviordaj rukoj».

Na hety momant u AP raźličvajuć, što na vybary, akramia Pucina, pojduć pradstaŭniki troch parłamienckich partyj: KPRF, ŁDPR i «Novych ludziej» (lidar «Spraviadlivaj Rasii» Siarhiej Mironaŭ abviaściŭ, što jaho partyja nie budzie vyłučać kandydata i padtrymaje Uładzimira Pucina).

Kandydatam ad KPRF Kreml bačyć Hienadzia Ziuhanava.

«Nijakich ciomnych konikaŭ typu [vyłučanaha kamunistami ŭ 2018 hodzie biznesoŭca Paŭła] Hrudzinina. Ziuhanaŭ zvykły prezidentu, u jaho vysoki status lidara partyi, jaho proźvišča znajomaje kožnamu vybarščyku. Pry hetym u jaho jość stol — kandovy elektarat KPRF, novych vybarščykaŭ jon pryciahvać nie budzie», — patłumačyŭ adzin z surazmoŭcaŭ «Mieduzy», blizkich da AP.

U 2008 hodzie na vybarach prezidenta Ziuhanaŭ atrymaŭ 17%, u 2012 hodzie — 18%.

Takaja stabilnaść rejtynha važnaja dla Kramla — płanujecca, što na budučych vybarach Pucin nabiare «rekordny vynik». Pucin pavinien atrymać bolš za 80% hałasoŭ ź jaŭkaj bolš za 70%.

Hetamu hipatetyčna mahło pieraškodzić paŭtareńnie historyi z Hrudzininym — tady ŭzhodnieny z Kramlom kandydat pačaŭ niečakana nabirać rejtynh, i AP pryjšłosia vieści suprać jaho paŭnavartasnuju kampaniju pa čornym pijary.

«Z abrydłym Ziuhanavym takich ekscesaŭ nie budzie», — upeŭnieny blizki da AP surazmoŭca «Mieduzy». Ciapier rejtynh davieru Ziuhanavu pavodle «Levada-centra» składaje 3%, rejtynh KPRF pavodle VCIOM — 10,2%.

Kandydatam ad ŁDPR, pa zadumcy Kramla, pavinien stać lidar partyi Leanid Słucki.

Sa słoŭ krynicy, blizkaj da AP, Słucki i sam choča paŭdzielničać u vybarach, «bo lubić pijar». Surazmoŭca, blizki da kiraŭnictva ŁDPR, paćvierdziŭ hetuju infarmacyju i dadaŭ, što Słucki «lubić śviacicca na publicy» i maje namier «padniać asabistuju viadomaść». Z hetaj ža metaj, sa słoŭ krynicy, Słucki ciapier uznačalvaje śpisy partyi na rehijanalnych vybarach: «jaho fota — na pieršych pałosach partyjnych haziet, a padčas prezidenckich jašče i teleefir padčas debataŭ dadasca».

Surazmoŭca, blizki da palityčnaha błoku Kramla, situacyju z vyłučeńniem Słuckaha apisaŭ tak: «Jon całkam padychodzić — surjozny mužčyna, pry pasadzie, u pinžaku. Nichto nie skaža, što heta čysty spojler. Ale asabisty rejtynh Słuckaha nizki, a sam jon jak publičny palityk — nu takoje … »

Kandydatam ad «Novych ludziej» usio bolš składana. U Kramli chacieli b, kab ad partyi vyłučyŭsia jaje staršynia, biznesoviec Alaksiej Niačajeŭ.

«Łohika taja ž, što sa Słuckim: surjozny mužčyna ŭ pinžaku, pavažny, pravilny. Ale małaviadomy i nie vielmi charyzmatyčny. Kab rejtynh nie vybiŭsia [napierad] i nie staŭ pahražać KPI pa Pucinie», — rastłumačyŭ adzin z surazmoŭcaŭ, blizkich da AP.

Adnak z samim Niačajevym hety płan pakul uzhadnić nie ŭdałosia. Sa słoŭ dźviuch krynic, blizkich da Kramla, toj razumieje, što «šmat adsotkaŭ jamu nabrać nie daduć, a atrymlivać drobiaź i być Locham 2% jon nie choča».

«Niačajeŭ choča, kab NŁ vyjšli jak minimum na treciaje miesca na vybarach u Dziarždumu ŭ 2026 hodzie. Jon dumaje, što jaho nizki vynik na prezidenckich vybarach pieraškodzić hetaj mecie», — patłumačyła blizkaja da AP krynica «Mieduzy».

Pavodle infarmacyi surazmoŭcaŭ «Mieduzy», zamiest siabie Niačajeŭ prapanuje vice-śpikiera Dziarždumy Uładzisłava Davankova, jaki ciapier bałatujecca ŭ mery Maskvy.

Adnak AP hetaja kandydatura nie zadavalniaje. Kreml praciahvaje nastojvać na ŭdziele Niačajeva, choć Davankoŭ — całkam sistemny palityk.

Sprava va ŭzroście. Davankovu 39 hadoŭ, jon lubić pijar, moža narmalna vystupać publična. Zrazumieła, što jon nie atrymaje vialikaha pracenta, ale małady i aktyŭny kandydat moža prymusić vybarščyka padumać pra ŭzrost prezidenta. Heta budzie niavyhadny kantrast. Havorka nie pra vynik [Pucina] na samich vybarach, a pra pierśpiektyvu pary-trojki hadoŭ, kali dumki pra toje, što Pucin, viadoma, małajčyna, ale čas pryjści kamuści maładziejšamu, źjaviacca. Udzieł maładych kandydataŭ moža stać katalizataram takich dumak.

Pavodle apytańnia kampanii Russian Field, praviedzienaha ŭ mai hetaha hoda, uzrost źjaŭlajecca trecim pa papularnaści adkazam na pytańnie ab tym, što rasijanam «nie padabajecca» ŭ dziejnym prezidencie, — vyšej tolki «miakkaść» Pucina (u čym vyjaŭlajecca hetaja «miakkaść» — zusim niezrazumieła) i jaho niaŭvažlivaść da ŭnutranych spraŭ krainy.

Adrazu niekalki rehijanalnych čynoŭnikaŭ i adzinarosaŭ, apytanych «Mieduzaj», paćvierdzili, što ŭ apošnija niekalki hadoŭ rasijan sapraŭdy pačaŭ turbavać uzrost Pucina.

«Ci nie čas pra pierajemnika padumać, moža, užo čas adpačyć, patrebny novy pohlad?» — pieraličvaje pytańni žycharoŭ adzin z vysokapastaŭlenych rehijanalnych adzinarosaŭ.

Sami čynoŭniki taksama pačali inakš stavicca da Pucina paśla jaho siamidziesiacihodździa.

Kali raniej surazmoŭcy «Mieduzy» ź liku čynoŭnikaŭ, adzinarosaŭ, łajalnych da ŭłady biznesoŭcaŭ i palittechnołahaŭ nazyvali dziejnaha prezidenta «pieršym», «hałoŭnym», «viarchoŭnym» abo «baćkam», to ciapier čaściej za ŭsio nazyvajuć jaho «dziedam».

Adzin z surazmoŭcaŭ, blizkich da Kramla, na pytańnie ab pryčynach hetaha adkazaŭ tak: «Nu dzied i dzied, heta ž bieź niehatyvu. Uzrost u jaho taki».

• 9
• 46
• 7
• 7
• 13