Iosif Siaredzič: Ja prapanoŭvaŭ uznačalić sajt inšym ludziam, ale ŭsie admovilisia
Były redaktar «Narodnaj Voli» Iosif Siaredzič praciahvaje kamientavać niadaŭniuju spravu pieradačy sajta vydańnia inšamu ŭładalniku i jaho nastupnaha «pieraradžeńnia». Hetym razam u intervju błohu «Hałasy» jon vykazaŭsia adnosna taho, ci była ŭ jaho alternatyva pieradačy sajta nie Mikałaju Zinieviču, a inšym, bolš vartym davieru ludziam.
Siaredzič padkreślivaje, što prapanoŭvaŭ uznačalić sajt usim svaim byłym padnačalenym.
«Na žal, usie supracoŭniki «Narodnaj Voli», ź jakimi ja pracavaŭ na praciahu 28 hadoŭ, praź situacyju, jakaja siońnia skłałasia ŭ Biełarusi, pabajalisia ŭziać na siabie adkaznaść za dalejšuju dziejnaść sajta. Admovilisia ŭsie. Pahadziŭsia tolki pradstaŭnik hetaj kampanii «Hipier PK», i ŭsio było vyrašana. Ja nie tolki supracoŭnikam «Narodnaj Voli» prapanoŭvaŭ sajt, ja prapanoŭvaŭ jaho i byłym supracoŭnikam «Kamsamolskaj praŭdy», inšych vydańniaŭ. Usie admovilisia», — razvodzić rukami Siaredzič.
Pavodle jaho, novaja redakcyja nie pracuje ŭ ścienach staroha ofisa, jaki raźmiaščaŭsia na vulicy Enhielsa ŭ Minsku.
«Ja nie mieŭ mahčymaści vydavać hazietu ni ŭ drukavanym vyhladzie, ni ŭ elektronnym. I mnie chutka 75-y hod. Tamu i paŭstała pytańnie pieradačy. Ciapier treba čakać, kali zakonnaść va ŭsich sensach budzie adnoŭlenaja ŭ Biełarusi».
Ci nie maje ciapier da sajta «NV-Anłajn» dačynieńnia eks-kandydat na pasadu prezidenta ŭ 2020 hodzie Siarhiej Čeračań, bo apošnim časam pra jaho źjaŭlajecca šmat navin?
«Ja nie viedaju, ci maje dačynieńnie Čeračań da sajta. Ja papiaredžvaŭ kaliści, što heta vielmi cikavy typ, na jaho treba hladzieć z usich bakoŭ. Moža, sam vyjšaŭ na redakcyju, a mo chtości z žurnalistaŭ. Ja nie viedaju», — adkazaŭ Siaredzič.
Mikałaj Zinievič ža i kampanija «Hipier PK» nie namalavalisia ź niadkul, «Narodnaja vola» mieła ź imi daŭniuju historyju ŭzajemaadnosin.
«Jany časta akazvali nam techničnyja pasłuhi. Kali išli ataki na naš sajt, to pravodzili peŭnyja raboty. Kali my mianiali na sajcie padychod, farmaty, afarmleńnie, to taksama dapamahali. Zinievič mieŭ suviaź z UP «Narodnaja Vola» na praciahu mnohich hadoŭ. My kožny dzień uzajemadziejničali, davali im niejkija zadańni, kab vyrašyli techničnyja pytańni».
Što tyčycca byłych supracoŭnikaŭ «Narodnaj Voli», to nichto ź ich u novaj redakcyi nie pracuje:
«U «Narodnaj voli» ničoha nie adbyvajecca, usie supracoŭniki byli zvolnienyja jašče 3 žniŭnia. Reč u tym, što Ministerstva infarmacyi anulavała paśviedčańnie ab rehistracyi haziety daŭnym-daŭno».
Ja staviŭ umovy, kab žurnalisty «Narodnaj Voli» mahli tvorča pracavać u novaj redakcyi, ale, nakolki mnie viadoma, byłych žurnalistaŭ adchilili ad supracoŭnictva z sajtam «NV-Anłajn». Havorka pra Marynu Koktyš, Śviatłanu Kalinkinu, Alesia Sivaha», — skazaŭ Siaredzič.
Čytajcie taksama:
Iosif Siaredzič: Mnie niezrazumiełyja dziejańni tych, kamu ja biaspłatna pamyłkova pieradaŭ sajt
Łukašenka prapanavaŭ rasiejcam i ŭkraincam skuplać za kapiejki biełaruskija vioski1
Kamientary