Ideja stvaryć «AntiBAG Tachohraf» uźnikła, kali Maksim sam pracavaŭ kiroŭcam-mižnarodnikam. Za rulom vielikahruza jon sutyknuŭsia z šeraham niazručnaściaŭ.
— Mnie było niezrazumieła, čamu ŭ mižnarodnych pieravozkach — nastolki technałahičnaj śfiery — litaralna ŭsie kiroŭcy ličać režym pracy i adpačynku na papierkach. Jany ŭvieś čas pamylajucca ŭ padlikach i płaciać niemaleńkija štrafy, — raspaviadaje Maksim. — Dalnabojščykam treba pamiatać, kali pačaŭsia ich tydzień, kolki doŭžyŭsia pracoŭny dzień i inšyja niuansy, jakija rehłamientujucca pastanovaj ES № 561/2006. Transpartnaja inśpiekcyja sčytvaje danyja z ustanoŭlenaha ŭnutry mašyny tachohrafa i praviaraje ŭsio, što rabiŭ kiroŭca apošnija 28 dzion. Kali jon adpačyvaŭ chacia b na chvilinu mienš, to jaho aštrafujuć na sumu ad 500 da 1000 jeŭra.
Tady Maksim stvaryŭ prahramu, jakaja siońnia jość pamočnikam kiroŭcy. Ciapier kolkaść karystalnikaŭ składaje 117 tysiač pa ŭsioj Jeŭropie.
Sutnaść prahramy ŭ tym, što hałasavy asistent u fonavym režymie kaža kiroŭcu, što treba rabić. Akramia taho, prahrama pakazvaje maršrut, projdzienuju adlehłaść i chutkasnyja režymy, jak GPS-trekier. Kiroŭca zaŭsiody moža pahladzieć, dzie i ź jakoj chutkaściu jon prajazdžaŭ navat hod tamu.
Ciapier, jak adznačaje raspracoŭščyk, heta ŭžo vialiki šmatfunkcyjanalny miechanizm. Da taho ž u jaho dadali hałasavy pakiet na niekalkich movach. Ahučvańnie i pierakład asistenta rabili z dapamohaj niejrasietki.
«Maks, ty ž biełarus, čamu nie zrobiš ahučvańnie na biełaruskaj?»
Da niadaŭniaha času karystalniki mahli abrać adnu z čatyroch moŭ: ruskuju, ukrainskuju, anhlijskuju i polskuju. A ciapier prahrama stała i biełaruskamoŭnaj.
— Hałasavy asistent na biełaruskaj movie źjaviŭsia adnosna niadaŭna i zusim vypadkova, — tłumačyć Maksim. — Padčas čarhovaha subotniaha strymu na maim jutub-kanale padpisčyki spytali: «Maks, ty ž biełarus, čamu tady nie zrobiš ahučvańnie asistenta na biełaruskaj?» Hetaje pytańnie pastaviła mianie ŭ niajomkaje stanovišča.
Maksim byŭ nie suprać, chacia ideja nie zdavałasia vidavočnaj. Pa-pieršaje, uźnikła pytańnie: ci šmat ludziej razmaŭlaje na biełaruskaj movie i choča mieć pamočnika mienavita na joj? Pa-druhoje, Maksim sutyknuŭsia z prablemaj — adsutnaściu biełaruskamoŭnaj niejrasietki.
Pieršy čas jon sprabavaŭ znajści prafiesijnaha akciora ahučvańnia, ale paśla prośbaŭ padpisčykaŭ vyrašyŭ, što ŭsie 57 hałasavych błokaŭ ahučyć sam. I nie pamyliŭsia — prodaž prahramy značna vyras.
— Dziŭna, što biełaruskaje ahučvańnie karystajecca papularnaściu navat siarod nośbitaŭ inšych moŭ. Tamu ja chacieŭ by, kab našy mocnyja i talenavityja prahramisty ŭziali ź mianie prykład i rabili biełaruskuju łakalizacyju prahram, — kaža Maksim.
«Razmaŭlajuć try čałavieki, a łakalizacyja kaštuje dziasiatki tysiač dalaraŭ»
Zrešty, pradprymalnik razumieje, što dla hetaha jość zahvazdka — hrošy:
— Kali ŭ kampanijach prachodzić raźlik jakoj-niebudź pracy, śpiecyjalisty ličać umoŭna tak: «Kali my ciapier układziom 20 tysiač jeŭra ŭ łakalizacyju, to ŭ vyniku my nie zmožam na hetym zarabić». Čamu? Tamu što biełarusaŭ nie tak šmat i šmat chto vykarystoŭvaje ruskuju. Tamu ŭ vialikich IT-kampanijach na taki zapyt, vierahodna, adkažuć tak: «Jakaja biełaruskaja? Na hetaj movie razmaŭlajuć try čałavieki, a łakalizacyja kaštuje dziasiatki tysiač dalaraŭ. Ci akupiacca ŭ vyniku hetyja hrošy? Naŭrad ci».
Maksim hetaj łohiki nie padzialaje.
Ciapier jaho nievialikaja kamanda z troch čałaviek rychtuje novaje abnaŭleńnie z navihacyjaj. Jon kaža, što za siem hadoŭ isnavańnia «AntiBAG Tachohraf» kamanda vypuściła bolš za 150 abnaŭleńniaŭ, kožnaje ź jakich kaštuje ad 1 da 10 tysiač jeŭra. Ale zarabili bolš — kala miljona, choć ciapier hrošy ŭkładvajucca ŭ madernizacyju.
