«Ciapier stała jasna, čyje byli miljony». Chto toj biełarus, jakoha aryštavali ŭ ZŠA za parušeńnie sankcyj
Niadaŭna paviedamlałasia, što aryštavany ŭ ZŠA hramadzianin Biełarusi Siarhiej Karpuškin pajšoŭ na ździełku sa śledstvam, kab źmienšyć termin źniavoleńnia. «Naša Niva» raspytała pra jaho ŭ biełaruskich biznesoŭcaŭ.
Siarhiej Karpuškin pryznaŭ vinu ŭ dapamozie abychodu amierykanskich sankcyj suprać źviazanaha z Rasijaj ukrainskaha biznesmiena Siarhieja Kurčanki.
A mienavita Karpuškin pryznaŭ, što ŭdzielničaŭ u schiemie z zakupkaj mietału ŭ kampanij padsankcyjnaha ŭkrainca na 140 miljonaŭ dołaraŭ.
Karpuškin maje kampiensavać 4,7 miljona prybytku.
U schiemach Karpuškin dziejničaŭ pad ściaham svajoj amierykanskaj kampanii Cogentra — dystrybjutara Biełaruskaha mietałurhičnaha zavoda ŭ ZŠA.
Siarhiej Kurčanka — 38-hadovy ŭkrainski biznesoviec, źviazany ź Viktaram Janukovičam i jaho kłanam. Va Ukrainie jaho nazyvali «hałoŭnym finansistam siamji Janukoviča», jakomu addavali vyhadnyja dzialanki biznesu. Ën byŭ nie prosta kašalkom siamji, jon byŭ jašče čałaviekam, na jakoha «Maskva pakazała palcam», jakomu dazvolili zarabić kapitał na handli rasijskim hazam i naftapraduktami. Kurčanka ŭciok z Ukrainy ŭ 2014 hodzie razam ź Janukovičam i jaho nabližanymi. Suprać jaho va Ukrainie zaviedziena kryminalnaja sprava, jaho šukaje i Interpał. Dzie žyvie Kurčanka paśla 2014-ha — nieviadoma, ale možna mierkavać, što ŭ Rasii, dzie atabarylisia i sam Viktar Janukovič, i jaho śvita.
Što Karpuškin za čałaviek i jak los źvioŭ jaho z Kurčankam?
«Naša Niva» znajšła surazmoŭcaŭ, jakija ŭ ahulnych rysach patłumačyli sens siabroŭstva Karpuškina z Kurčankam, a taksama ich matyvy.
U 2014-m suprać Kurčanki byli ŭviedzienyja sankcyi Jeŭrasajuza, ZŠA i Kanady.
U Kurčanki źnikła mahčymaść dziejničaść u biznesie ad svajho imia.
Los Karpuškina, viadoma, raźvivaŭsia inačaj.
Hety 47-hadovy ŭradženiec Karahandzinskaj vobłaści Kazachstana z talentam da finansaŭ u 2000-ch apynuŭsia na BMZ, dzie adpracavaŭ usiaho paru hod i zvolniŭsia. Ale daloka ad BMZ užo nikoli nie adychodziŭ, bo zrazumieŭ, jak možna zarablać na siabroŭstvie z zavodam.
Karpuškin damoviŭsia na dystrybjucyju pradukcyi BMZ — a heta vielmi sałodkaja śfiera.
«Zakupačnaja cana na łom u Biełarusi ŭdvaja nižejšaja za ceny ŭ siarednim pa śviecie, ale jość niuans — zakuplać u Biełarusi łom moža tolki toj, u kaho jość licenzija. Takich u nas tolki dźvie kampanii, u pryvatnaści, BMZ. Adpaviedna, kuplajučy łom tańniej, maješ nižejšy sabiekošt.
Pradukcyja BMZ supiertannaja, i sens bolšaści schiematozaŭ vakoł zavoda ŭ tym, kab uziać hetuju tannuju pradukcyju pa takoj canie i zarabić na pieraprodažy.
Kab tabie dziaržaŭny zavod adpuściŭ pradukcyju, treba mieć adnosiny z tymi, chto prymaje rašeńni. Vielmi časta — karupcyjnyja adnosiny», — raskazaŭ surazmoŭca «Našaj Nivy».
Adpracavaŭšy na BMZ, Karpuškin pajšoŭ u trejdynh mietałaŭ i braŭ pradukcyju na zavodzie, raskazali nam prafiesijnuju historyju Karpuškina znajomyja ź situacyjaj.
«Jon staŭ prafiesijnym trejdaram, praciahvaŭ raści, handlavać nie tolki beemzešnym mietałam. Ale ŭ hetym biznesie sens u tym, što ty nie možaš stać bujnym trejdaram biez bujnoha kapitału. Trejdynh mietałaŭ — heta vielmi kapitałajomisty biznes, i tvoj prybytak vahajecca ŭ miežach 1—3% ad sumy kantrakta. Ty kuplaješ tańniej, pradaješ daražej, na roźnicu žyvieš», — tłumačyć insajdar.
Pošuk tych, u kaho jość hrošy, i vyvieŭ Karpuškina na Kurčanku. Tak jany i zblizilisia, choć dakładnaj historyi, jak heta adbyłosia, nichto, aproč ich, nie raskaža.
Kurčanka jak minimum razumieŭ sens biznesu Karpuškina, tamu što sam zajmaŭsia trejdynham. Razumieŭ, što trejdynh — heta taja historyja, kudy nie strašna zasunuć hrošy i adkul ich možna imhnienna dastać. A Karpuškin — prafiesijanał svajho biznesu.
«Karpuškin, ja liču, handlavaŭ na hrošy Kurčanki. Heta, pa-mojmu, i jość toje, što ich źviazvaje», — skazaŭ «Našaj Nivie» biełaruski biznesoviec.
Pry hetym, jak kažuć insajdary, Karpuškin aktyŭna šukaŭ, kudy možna zasunuć hrošy jašče.
«Nakolki ja viedaju, biełarusy i jeŭrapiejcy z Karpuškinym supracoŭničać aścierahalisia, tamu što nie jasna było, adkul u jaho dziasiatki miljonaŭ dołaraŭ — zarabić ich sam jon nie moh, ale kazaŭ, što hrošy jahonyja, što vyhladała padazrona. Ciapier stała badaj jasna, čyje nasamreč heta byli miljony», — dadaŭ abaznany surazmoŭca.
«Naša Niva» — bastyjon biełaruščyny
PADTRYMAĆAkno ŭ Jeŭropu dla «Hrodna Azotu». Jak Uźbiekistan dapamahaje Biełarusi abychodzić zabaronu i pradavać u ES uhnajeńni padsankcyjnaha pradpryjemstva
10 hadoŭ «Štadleru»: raboty niama, a inžynieraŭ vyvoziać u Jeŭropu i Kazachstan
Biełaruś z hrupaj dyktatarskich režymaŭ sprabavała praz AAN asudzić sankcyi suprać siabie. Ale navat Kitaj nie padtrymaŭ
«Nie spadabajecca — nazad pajedu»: palitźniavoleny pamočnik prakurora Babak z‘javiŭsia ŭ sacsietkach FOTA2
Kamientary
Ja adhadaju adkul jaho prodki)))