Urad uchvaliŭ kancepcyju prajekta stvareńnia dziełavoha handlovaha centra ŭ Minsku na płoščach abjadnańnia «Biełresursy»,
paviedamiŭ na pres‑kanfierencyi ŭ Minsku 11 śniežnia dyrektar departamienta pa pradprymalnictvie Minekanomiki Alaksandr Lichačeŭski.
Pavodle jaho słoŭ, kancepcyja prajekta była raspracavanaja śpiecyjalistami «Biełresursaŭ» i Biełaruskaj univiersalnaj tavarnaj biržy.
Miarkujecca, što handlovy centr raźmieścicca na vuł. Kazinca.
Zacikaŭlenaść va ŭdziele ŭ hetym prajekcie prajavili «Biełarusnafta», Chojnickaja fabryka mastackich vyrabaŭ, Kalinkavicki zavod bytavoj chimii, «Mazyrdreŭ», «Rečycadreŭ», «Kupalinka» i šerah inšych pradpryjemstvaŭ.
«Nam nieabchodna takaja placoŭka aptovaha i drobnaaptovaha handlu, kab subjekty małoha pradprymalnictva atrymali mahčymaść dostupu da ŭsioj hamy pradukcyi spažyvieckaha pryznačeńnia i jaje nastupnaj realizacyi jak unutry krainy, tak i za jaje miežami», — adznačyŭ Lichačeŭski.
U rehijonach užo pracujuć placoŭki drobnaaptovaha handlu tavarami. U kastryčniku vystava‑kirmaš biełaruskich tavaraŭ adkryta na Minskim aptovym rynku. Pavodle infarmacyi Lichačeŭskaha, tut realizavana pradukcyi na sumu kala 75 młn. rubloŭ.
Dla pavyšeńnia efiektyŭnaści placoŭki na rynku pryniata rašeńnie zamianić nieefiektyŭna pracujučyja pradpryjemstvy «Biellehprama» inšymi pradpryjemstvami. U pryvatnaści, vyzvalenyja handlovyja miescy miarkujecca addać Barysaŭskaj šviejnaj fabrycy, AAT «Rečycki tekstyl» i Barysaŭskamu chrustalnamu zavodu.
Padvodziačy papiarednija vyniki raboty pradpryjemstvaŭ z pradprymalnikami, Lichačeŭski adznačyŭ, što dola małoha biźniesu ŭ realizacyi tavaraŭ ajčynnych vytvorcaŭ pa vynikach manitorynhu za pieršy tydzień śniežnia pavialičyłasia da 11,4%.
U listapadzie dola małoha biźniesu ŭ realizacyi składskich zapasaŭ skłała 9,9%, u kastryčniku — 8,3%, u vieraśni — 8%. «Možna śmieła havaryć, što ŭ Biełarusi zachoŭvajecca stanoŭčaja dynamika realizacyi tavaraŭ subjektami małoha pradprymalnictva», — padkreśliŭ kiraŭnik departamienta.
