Урад ухваліў канцэпцыю праекта стварэння дзелавога гандлёвага цэнтра ў Мінску
Урад ухваліў канцэпцыю праекта стварэння дзелавога гандлёвага цэнтра ў Мінску на плошчах аб’яднання «Белрэсурсы»,
паведаміў на прэс‑канферэнцыі ў Мінску 11 снежня дырэктар дэпартамента па прадпрымальніцтве Мінэканомікі Аляксандр Ліхачэўскі.
Паводле яго слоў, канцэпцыя праекта была распрацаваная спецыялістамі «Белрэсурсаў» і Беларускай універсальнай таварнай біржы.
Мяркуецца, што гандлёвы цэнтр размесціцца на вул. Казінца.
Зацікаўленасць ва ўдзеле ў гэтым праекце праявілі «Беларуснафта», Хойніцкая фабрыка мастацкіх вырабаў, Калінкавіцкі завод бытавой хіміі, «Мазырдрэў», «Рэчыцадрэў», «Купалінка» і шэраг іншых прадпрыемстваў.
«Нам неабходна такая пляцоўка аптовага і дробнааптовага гандлю, каб суб’екты малога прадпрымальніцтва атрымалі магчымасць доступу да ўсёй гамы прадукцыі спажывецкага прызначэння і яе наступнай рэалізацыі як унутры краіны, так і за яе межамі», — адзначыў Ліхачэўскі.
У рэгіёнах ужо працуюць пляцоўкі дробнааптовага гандлю таварамі. У кастрычніку выстава‑кірмаш беларускіх тавараў адкрыта на Мінскім аптовым рынку. Паводле інфармацыі Ліхачэўскага, тут рэалізавана прадукцыі на суму каля 75 млн. рублёў.
Для павышэння эфектыўнасці пляцоўкі на рынку прынята рашэнне замяніць неэфектыўна працуючыя прадпрыемствы «Беллегпрама» іншымі прадпрыемствамі. У прыватнасці, вызваленыя гандлёвыя месцы мяркуецца аддаць Барысаўскай швейнай фабрыцы, ААТ «Рэчыцкі тэкстыль» і Барысаўскаму хрустальнаму заводу.
Падводзячы папярэднія вынікі работы прадпрыемстваў з прадпрымальнікамі, Ліхачэўскі адзначыў, што доля малога бізнесу ў рэалізацыі тавараў айчынных вытворцаў па выніках маніторынгу за першы тыдзень снежня павялічылася да 11,4%.
У лістападзе доля малога бізнесу ў рэалізацыі складскіх запасаў склала 9,9%, у кастрычніку — 8,3%, у верасні — 8%. «Можна смела гаварыць, што ў Беларусі захоўваецца станоўчая дынаміка рэалізацыі тавараў суб’ектамі малога прадпрымальніцтва», — падкрэсліў кіраўнік дэпартамента.
Цяпер чытаюць
Разведка ЗША: Беларусь стала перадавым вайсковым плацдармам Расіі25
Каментары