U raskošy minskaha hatela Crown Plaza adbyŭsia sieminar «Univiersitet XXI stahodździa: idei i realizacyja», pryśviečany abmierkavańniu roli i miesca univiersiteta ŭ sučasnym hramadstvie. Arhanizatarami mierapryjemstva vystupili «Centr sacyjalnych inavacyj», prajektnaja hrupa Ahienctva humanitarnych technałohij, «Adukacyjny centr «POST», Centr pravavoj transfarmacyi, «Fond imia Lva Sapiehi» i inš.
Sieminar byŭ padzieleny na dźvie častki. Pieršaja była pryśviečana abmierkavańniu samoj idei sučasnaha univiersiteta, druhaja – arhanizacyjnym aśpiektam stvareńnia sučasnaj VNU.
Padčas pieršaj častki prahučaŭ dakład Uładzimira Mackieviča «Dumać Biełaruś» jak ideałohija sučasnaha biełaruskaha univiersiteta». U. Mackievič zaznačyŭ, što sučasny univiersitet pavinien uličvać i vykarystoŭvać usie sučasnyja dasiahnieńni i tendencyi, prymianiać adukacyjnyja prahramy, jakija buduć kardynalna adroźnivacca ad tych, što prymianiajucca ŭ Biełarusi zaraz.
«My stvorym univiersitet. Inšaja sprava, što stvaryć idealny univiersitet niemahčyma. Adnak mahčyma nablizicca da hetaha. BDU zaraz nie źjaŭlajecca univiersitetam. My taksama nie stvorym idealnaha, ale budziem da hetaha iści», – zaznačyŭ sp.Mackievič.
Padčas dyskusii, što pačałasia paśla vystupu U.Mackieviča, prahučali krytyčnyja vodhuki na prapanavanyja idei. U pryvatnaści, historyk Zachar Šybieka adznačyŭ, što
«stvaryć taki univiersitet (prapanavany U.Mackievičam) u Biełarusi zaraz niemahčyma. Treba šukać inšyja srodki. Adzin univiersitet nie moža być panacejaj. Zaraz samaja važnaja prablema – prablema viartańnia pryvatnaj ułasnaści».
U druhoj častcy sieminara Śviatłana Mackievič prezientavała arhanizacyjnyja aśpiekty prajektu univiersiteta. Jana adznačyła, što «zaraz arhanizoŭvajecca kalektyŭ, jaki budzie stvarać univiersitet. Kab realizavać takuju prahramu. Treba złučyć vialikuju kolkaść ludziej, jakija buduć heta rabić».
