Bajevik ad Śpiłbierha, drama pra narkabaranesu z Kałumbii, mini-sieryjał ź Nikol Kidman u hałoŭnaj roli. Raskazvajem, jakija sieryjały čakajuć nas hetaj zimoj.
«Złačyncy» (Culprits), Hulu
8 śniežnia studyja Hulu dadaść nam u žyćcio trochi ekšnu. «Złačyncy» — zmročny, ale paciešny brytanski sieryjał pra bandu złodziejaŭ, jakija płanujuć vialikaje rabavańnie. Usio prachodzić vydatna, i jany raźbiahajucca pa roznych kutkach śvietu, pakul niechta nie pačynaje zabivać ich adnaho za adnym. Chto hety zabojca i što jamu viadoma?
Budzie šmat strachu i paranoi, ale ŭ toj ža čas abiacajuć i dobry intelektualny humar. Chto budzie nastupnym, ci zdolejuć byłyja złačyncy papiaredzić adzin adnaho — jość vielmi šmat pytańniaŭ, na jakija ciaham vaśmi sieryj vy budziecie šukać adkaz.
«Piersi Džeksan i alimpijcy» (Percy Jackson and the Olympians), Disney
Amataraŭ fentezi-sah čakaje hodny pieradkaladny padarunak. 20 śniežnia studyja Disney źbirajecca pradstavić sieryjał pra junaha paŭboha Piersi Džeksana, jaki skraŭ małanki boha Zieŭsa, chacia nasamreč jon hetaha nie rabiŭ. Chłopčyk musić dać rady čaroŭnym vyklikam i zvyknucca sa svajoj lehiendarnaj sutnaściu, bo jon sam ličyŭ siabie prosta prablemnym čałaviečym dziciom z dyśleksijaj i SDUH, a zaadno i pieraduchilić vajnu pamiž bahami na Alimpie.
Hety sieryjał — adaptacyja ramana amierykanca Ryka Ryjardana, jon ža vystupaje adnym z pradziusaraŭ. Zapłanavana piać siezonaŭ sieryjała, pa adnym na kožnuju z knih cykła «Piersi Džeksan i alimpijcy».
«Pašyranaja siamja» (Extended Family), NBC
Kali chočacie prosty sitkom pra žyćcio i pačućci, 23 śniežnia źviartajcie ŭvahu na amierykanski NBC. U «Pašyranaj siamji» nas paznajomiać z Džymam i jaho eks-žonkaj Džulijaj, jakija praciahvajuć žyć razam paśla razvodu i vychoŭvajuć dvaich dziaciej.
Jany pa čarzie dahladajuć małych i vučacca razumieć adno adnaho ŭ novym statusie, ale źjaŭlajucca novyja pytańni: Džulija pačynaje sustrakacca z uładalnikam ulubionaj spartovaj kamandy Džyma. Razvod, vychavańnie dziaciej, novaje kachańnie — stvaralniki «Pašyranaj siamji» biarucca za składanyja i aktualnyja temy, ale budzie i prosty sitkomaŭski humar.
«Braty San» (The Brothers Sun), Netflix
Usio prosta: bačym Mišel Jea — i sieryjał užo adnoj nahoj u našym śpisie. 4 studzienia vychodziać «Braty San», u jakich hetaja askaranosnaja azijatka hraje maci viadomaha zabojcy Čarlza Sana. Niekali San, tajvański hanhstar, zarablaŭ na žyćcio biaźlitasnymi zabojstvami, ale pryjšoŭ čas pastaleć.
Ciapier Čarlz jedzie ŭ Łos-Andželes, dzie niadaŭna zabili jaho baćku. Jon musić adnavić adnosiny z maci i małodšym bratam, a taksama abaranić ich ad śmiarotnaj niebiaśpieki, bo tajvańskaja mafija zmahajecca za lidarstva i heta moža zabić usich u siamji San.
«Ted» (Ted), Peacock
U 2012-m komik Set Mak-Farlejn źniaŭ niebłahuju kamiedyju «Ted» (Ted) pra vielizarnaha plušavaha miadźviedzia, jaki ažyvaje i robicca siabram vaśmihadovaha Džona Bieneta. Praz try hady vyjšaŭ sikveł stužki, jaki atrymaŭ źmiešanyja vodhuki. Ale ciapier Mak-Farlejn i kampanija dajuć Tedu jašče adzin šaniec.
11 studzienia pabačym, što ŭ ich atrymałasia. A pakul što adznačym, što za minułyja hady Mak-Farlejn zrabiŭ topavy fantastyčna-kamiedyjny sieryjał «Orvił», dzie ź im adpalvaŭ ciapierašni naparnik pa «Tedzie» Skot Hrajms. Dumajem, chłopcy i ciapier nie rasčarujuć.
«Hryselda» (Griselda), Netflix
Hetaj historyi była nakanavanaja ekranizacyja. 25 studzienia čakajcie na ekranach šaścisieryjku ad Netflix — dramu pra žyćcio Hryseldy Błanki, narkabaranesy z Kałumbii, jakaja zasnavała adzin z najbolš prybytkovych kartelaŭ u historyi. U Fłarydzie kanca 1970-ch Błanka była najmahutniejšym kryminalnym aŭtarytetam, potym kiravała narkahandlarami z-za krataŭ i dažyvała svoj viek u Kałumbii, pakul jaje nie zastrelili na vychadzie z łaŭki miaśnika.
Hryseldu hraje efiektnaja Safija Vierhara — taksama kałumbijka. Historyja narkabaranesy cikavić nie tolki jaje: u 2018-m Hryseldu Błanku hrała Ketryn Zeta-Džons, a ciapier chodziać čutki, što ŭ filmie pra jaje zdymiecca Dženifier Łopies.
«Ekspaty» (Expats), Prime Video
Mini-sieryjał ź Nikol Kidman u adnoj z hałoŭnych rolaŭ vyjdzie 26 studzienia. Nad prajektam pracavała Łułu Vonh, režysiorka filma «Raźvitańnie» (Farewell), vydatna pryniataha na kinafiestyvalach. Samich «Ekspataŭ» taksama pakazvali na fiestyvalach, i stužka ŭžo maje niebłahija 7,7 bała z 10 u rejtynhu na resursie IMDB.
Siužet prosty: heta historyja troch amierykanak, žyćci jakich pierasiaklisia ŭ Hankonhu, i pra ciažkaści ich adaptacyi da hetaha horada. Sieryjał stvorany pa knizie-biestselery Dženis Li «Ekspatryjanty».
«Uładary nieba» (Masters of the Air), Apple TV+
Pradziusary hetaha vajennaha bajavika — Styvien Śpiłbierh i Tom Chenks, a robić jaho studyja Apple TV+, u jakoj prachadnyja pracy sustrakajucca redka. Siarod asnoŭnych akcioraŭ — Ościn Batler, vykanaŭca roli Ełvisa Preśli ŭ muzyčnym bajapiku «Ełvis», i naminant na «Oskar» Bary Kihan.
«Uładary nieba», jakija vychodziać 26 studzienia, raskažuć pra bambardziroŭščyk «Latučaja krepaść» i 11 śmiełych lotčykaŭ unutry jaho, jakija zmahalisia ŭ Druhuju suśvietnuju. Razam ź imi nam prapanujuć paŭdzielničać u pavietranych bajach z fašysckaj Hiermanijaj. Čakajem epičnaje vidovišča — biudžet u 250-300 miljonaŭ dalaraŭ hetamu spryjaje.
«Ńju łuk» (The New Look), Apple TV+
Ad bambardziroŭščykaŭ — da viaršyń elehantnaści ŭ modzie XX stahodździa. 14 lutaha Apple TV+ paciešyć nas sieryjałam pra Kryścijana Dyjora — hienijalnaha madeljera 1950-ch, jaki pachisnuŭ pazicyi Kako Šanel (jaje, darečy, hraje cudoŭnaja Žuljet Binoš).
Dyjora viedajuć jak raspačynalnika «ńju łuk» — elehantnaha i zahadkavaha stylu, jaki pryjšoŭ na źmienu strohaści i askietyčnaści vajennych 40-ch. Bahata ludziej ličyli novy styl marnatraŭnym, ale śviet zanadta zasumavaŭ pa vytančanaści — i Dyjor viarnuŭ jaje ŭ žanočy vobraz.
«Siohun» (Shōgun), Hulu
U 1600 hodzie ŭ Japoniju trapiŭ anhličanin Uiljam Adams, jon pražyŭ tam 20 hadoŭ i staŭ pavažanym samurajem. Hetaja historyja natchniała šmatlikich piśmieńnikaŭ, u tym liku i amierykanca Džejmsa Kłavieła. «Siohun» ad studyi Hulu — užo druhaja ekranizacyja jaho adnajmiennaha biestselera. Hledziačy pa trejlery, vidovišča budzie vartaje ŭvahi.
24 lutaha my daviedajemsia pra los kapitana Džona Błektarna (mastackaje ŭvasableńnie Adamsa), jaki trapiŭ u Japoniju padčas mižusobnych vojnaŭ. Błektarn, spačatku pałonny, pastupova znajomicca ź japonskaj kulturaj i robicca pravaj rukoj bujnoha vajskovaha fieadała. Razumny i daśviedčany jeŭrapiejec traplaje ŭ centr baraćby za ŭładu ŭ Japonii.
«Naša Niva» — bastyjon biełaruščyny
PADTRYMAĆ«Zabojcy kvietkavaha miesiaca» — epičny film Marcina Skarseze pra kryvavaje naradžeńnie Amieryki
Vosiem filmaŭ, jakija dapamohuć lepš zrazumieć araba-izrailski kanflikt
Kamientary