«U restaranach tut nievierahodna smačna». Prahramist raskazaŭ, jak z ZŠA byŭ vymušany pierajechać u Mieksiku
Frantend-raspracoŭščyk Alaksandr Taluk kala paŭhoda žyvie ŭ Mieksicy. A datul 1,5 hoda+ prapracavaŭ u ZŠA — pakul dazvalała viza. Ciapier jon praciahvaje pracavać na startap u San-Francyska, ale ŭžo z-za miažy. A jašče buduje ŭłasny startap.U hutarcy z dev.by jon raskazaŭ pra svoj šlach.
Ź Biełarusi Alaksandr vyjechaŭ u San-Francyska, ale potym byŭ vymušany pakinuć ZŠA.
«Adnym z varyjantaŭ było znajści pracu dla žonki, jana 2D-mastak. Ale kryzis zhulaŭ suprać nas: rynak dla mastakoŭ kampjutarnaj hrafiki ŭ ZŠA našmat mienšy, čym dla prahramistaŭ, — raskazaŭ Alaksadr Taluk.
Karaciej, sa Štataŭ treba było źjazdžać — bałazie my padrychtavalisia da takoha scenara. Razhladali ES, Anhliju i Łacinskuju Amieryku. Spynilisia na Mieksicy: pobač z ZŠA, toj ža hadzinny pojas, lohkaja lehalizacyja.
Spačatku my źviarnulisia ŭ pasolstva Mieksiki i atrymali tam vizy časovaha rezidenta. Jana nie daje prava na pracu, ale dazvalaje pražyvańnie.
Padstava dla takoj vizy — najaŭnaść pracy (pa-za Mieksikaj) i dachod ad 1800 dalaraŭ na miesiac +200 dalaraŭ na kožnaha siamiejnika. Ja padaŭ list ad SIEO kampanii z ukazańniem zp i prykłaŭ vypisku z banka.
Pa pryjeździe ŭ Miechika my abmianiali hetyja vizy na DNŽ. Prosta, a 5 ranicy pryjšli ŭ ofis imihracyjnaj słužby i zapisalisia ŭ čarhu, u 10 padali dakumienty, u 12 vyjšli z kartkami. Pieršaja dajecca na hod, potym treba padaŭžać. U sumie časovym rezidentam možna być na praciahu 4 hadoŭ, paśla hetaha atrymać PMŽ, a jašče praz hod padacca na pašpart.
U časie pierajezd i źmiena pracy amal supali, ale nasamreč hetyja padziei nie byli źviazanyja. U ZŠA ja zarehistravaŭ LLC (pa sutnaści, IP) i pierajšoŭ na kantraktnuju pracu sa svaim padradčykam, takim čynam atrymaŭšy mahčymaść pracavać z-za miažy. Novy kantrakt ja zaklučaŭ užo ź Mieksiki.
Pieršy startap byŭ B2B — z umieranym i davoli pradkazalnym režymam pracy. Ciapier ja pracuju ŭ V2S, karystalnickaj prahramie, i sumavać tam niama kali.
U vychodnyja taksama niama kali sumavać, bo letam u mianie źjaviŭsia svoj startap-prajekt.
Usio pačałosia z taho, što siastra-studentka spytała, ci možna vykarystoŭvać ChatGPT dla akademičnych daśledavańniaŭ. U jaje byli materyjały, jakija treba było praanalizavać i zrabić vysnovu.
Ja na kalency niešta sabraŭ, i vynik atrymaŭsia dobry. Ideja! Z hetaha ž možna zrabić pradukt.
Za paru tydniaŭ sabraŭ nievialikuju płatformu i vyviesiŭ linkiedzin-post: voś pahladzicie, što atrymałasia. Paśla hetaha sa mnoj źviazaŭsia były kaleha, biełarus, jaki maje vialiki dośvied u pradukcie i žyvie ŭ Jeŭropie:
— Kłasnaja ideja, ci nie chočaš zakałabaravacca? Ja mahu dapamahčy z markietynham.
Paźniej jon pryvioŭ u prajekt jašče adnaho partniora-biełarusa, jaki adkazvaje za biznes.
Sutnaść prajekta — aŭtamatyčny analiz zapisaŭ zvankoŭ z dapamohaj AI. Vielmi šmatlikija kampanii źbirajuć miedyjamateryjały (videa– i aŭdyjazapisy, teksty), jakija potym davodzicca apracoŭvać uručnuju. Ideja ŭ tym, kab analizavać ich z dapamohaj AI i rabić na asnovie hetych danych spravazdačy. Madel lohka maštabujecca na roznyja damieny, adnak ciapier my sfakusavalisia na analizie sales zvankoŭ.
U nas užo jość MVP i patencyjnyja klijenty. Ciapier stelefanoŭvajemsia ź biznesam i sprabujem intehravać našuju płatformu ŭ ichnija pajpłajny. Hetaj vosieńniu zarehistravali kampaniju ŭ Dełavery. Darečy, heta taksama ŭdałosia zrabić addalena.
Adzinaja prablema była z adkryćciom biznes-rachunku. Mnohija nieabanki, u jakich dobryja ŭmovy dla startapaŭ, nie pracujuć z rezidentami RB. Naohuł, my, troje zasnavalnikaŭ, rezidenty inšych krain, ale pry rehistracyi hladziać tolki na pašpart.
Pryjšłosia adkryć rachunak u bujnym amierykanskim banku. Zhulała na ruku toje, što ŭ mianie ŭžo byŭ tam adzin.
Jak jano ŭ Mieksicy i što dalej
Ź pierajezdam u Mieksiku i atrymańniem DNŽ my zmahli «zaziamlicca». U ZŠA, niahledziačy na našyja namahańni i nadziei, fonam zaŭsiody prysutničała dumka, što, mahčyma, pryjdziecca źjechać.
Ci možna było prykłaści bolš namahańniaŭ, kab hetaha nie zdaryłasia? Viadoma, ale žyćcio časam unosić karektyvy. Apošnija niekalki hadoŭ byli nievierahodna składanymi dla ŭsich, i, ščyra kažučy, nie zaŭsiody chapała resursu paŭsiul paśpiavać.
Ale padstaŭ chvalavacca niama, žyćcio — heta pryhoda. Ci moh ja jašče niekalki hadoŭ tamu padumać, što apynusia ŭ ZŠA? Nie, moh tolki maryć. A što ja budu žyć u Mieksicy? Tym bolš nie. I heta biascenny dośvied, jaki nie pražyvieš u čužych apoviedach. Kali pierajezd u ZŠA byŭ składanym: novaja kraina, novyja ludzi, novyja paradki, — to pierajezd u Mieksiku byŭ na paradak praściejšy. My ŭžo zdahadvalisia, ź jakimi składanaściami možam sutyknucca, i viedali, jak nie zhubić siabie.
Adziny vyklik, jakomu pakul nie ŭdałosia dać rady, — heta ispanskaja mova. Adnak u Miechika heta nie vielmi krytyčna: tut šmat mihrantaŭ z ZŠA, tamu mnohija śpiecyjalisty (daktary, cyrulniki, aficyjanty, časam taksisty) razmaŭlajuć pa-anhlijsku.
Darečy, u restaranach nievierahodna smačna. Kali ŭ Štatach treba było pastaracca, kab znajści smačnuju ježu (Ńju-Jork — vyklučeńnie, tam hastranomija na vysokim uzroŭni), to tut bahata krutych restaranaŭ z kłasnaj kuchniaj i absłuhoŭvańniem. Kožny raz, kali špacyrujem, bačym pryhožaje miesca i paznačajem na kartach, kab schadzić inšym razam. Jakim inšym, što praŭda, nie vielmi zrazumieła: na karcie adznačana ŭžo niekalki dziasiatkaŭ kaviarniaŭ i restaranaŭ.
Mieksikancy hanaracca tym, što da ich pryjazdžajuć mihranty. Kali ŭ smoł-tokach ź miascovymi zaŭvažajem, što my ź Biełarusi, pieršaje pytańnie ad ich: «Jak vam Mieksika?»
Pobyt tut taki ž, jak i ŭ inšych krainach: tyja ž kramy, kaviarni, bary, ludzi, jakija vyhulvajuć sabak. Internet tut vydatny, kaštuje jak u ZŠA. Moj pravajdar za hihabitny optavałakonny internet biare $80.
Arendnaje žytło vielmi roznaje: jość i drennyja varyjanty za $500, i nievierahodnyja kvatery za $5K. My vybrali niešta siaredniaje — kvateru na 160 «kvadrataŭ» na 30-m paviersie, adkul adkryvajecca nadzvyčajny vid na hory.
Mnohija našyja siabry, daviedaŭšysia, što my ŭ Mieksicy, dzivilisia: «Tam ža vielmi niebiaśpiečna, tam narkakarteli.Jak vy tudy pajechali?»
Tak, tut jość narkakarteli, jość niebiaśpiečnyja miescy, kudy navat miascovyja nie rekamiendujuć jeździć na mašynie praz ryzyki rabavańnia. Ale jany skancentravanyja ŭ peŭnych štatach, a bolšaja častka krainy biaśpiečnaja. Kankretna ŭ Miechika nočču na vulicy nie adčuvaješ niebiaśpieki.
Ź niezvyčajnaha: pakul ja adkazvaŭ na vašyja pytańni, u nas zdaryŭsia ziemlatrus u 5,8 bała. Było vielmi strašna, choć apisać hetaje pačućcio składana.
My ŭžo pieražyli adzin ziemlatrus u San-Francyska z takoj ža mahnitudaj: ty prosta nie razumieješ, što rabić, kali dom chistajecca. Žyćcio ŭ Biełarusi padrychtavała da mnohaha, ale nie da takoha. Mabyć, čas prajści instruktaž i na vypadak takich uzrušeńniaŭ.
Što dalej? Žyćcio pakaža. U płanach najbližejšymi hodam-dvuma zajmacca startapam: my prykładajem vialikija namahańni, kab zrabić jaho paśpiachovym biznesam. A jašče — šmat padarožničać. Pajeździm pa Mieksicy, pierš za ŭsio chočam u Tułum (pašukajcie fatahrafii — heta rajskaje miesca), jość płany na pajezdku ŭ Pieru, a taksama spadziajemsia źjeździć u Paŭdniovuju Kareju i Japoniju. Tamu składana skazać, dzie my budziem praź niekalki hadoŭ. Ale ŭpeŭnieny, heta budzie štości cikavaje».
Kamientary