Bild apublikavała novuju kartu «płanaŭ Pucina nakont Ukrainy»

Pucin raźličvaje na źnižeńnie padtrymki Ukrainy z boku Zachadu. Akramia taho, rasijskija ŭłady płanujuć imitavać imknieńnie pieramovaŭ, ale napraŭdu Kreml nie źbirajecca damaŭlacca z ukrainskim kiraŭnictvam i raspracoŭvaje novy siarednieterminovy płan vajny, analizuje artykuł Bi-bi-si — Ukraina.

Pavialičyć

Niamieckaje vydańnie apisała jaho tak:

• Da kanca 2024 hoda całkam zachapić Danieckuju i Łuhanskuju vobłaści i dajści da raki Askoł u Charkaŭskaj vobłaści.
• Da kanca 2026 hoda dajści da Dniapra, zachapiŭšy značnuju častku Zaparožskaj, Dnieprapiatroŭskaj i Charkaŭskaj abłaściej, u tym liku Charkaŭ, Dniapro i Zaparožža.

«Usie ŭschodnija terytoryi źleva ad Dniapra RF płanuje zachapić na praciahu troch hadoŭ, — zajaviła krynica Bild. — Paśla čaho raka stanie novaj linijaj frontu».

Ciapier Rasija kantraluje kala pałovy Danieckaj i 95% Łuhanskaj abłaściej. Bujnyja harady, takija jak Kramatorsk, Słaviansk i Pakroŭsk, zastajucca pad kantrolem Ukrainy. U Kramli čakajuć, što da kanca 2024 hoda situacyja źmienicca.

Pavodle tych ža źviestak, na poŭdni Ukrainy Rasija maje davoli nizkija ambicyi.

Na Chiersonskim kirunku płanujecca ŭtrymlivać abaronu pa Dniapry, nie nastupajučy na pravy bierah na Chierson abo Adesu, piša Bild, adznačajučy, što adziny kłopat Maskvy tut: nie dapuścić prasoŭvańnia Ukrainy ŭ Krym.

Pavodle źviestak raźviedki, rasijski płan hruntujecca, miž inšym, na zdahadkach, što rasijskaja vajskovaja ekanomika budzie raści i budzie bolš efiektyŭnaj.

Pucin hatovy štohod hublać va Ukrainie da 100 tysiač vajskoŭcaŭ. Jon taksama raźličvaje, što ŭ ZŠA da ŭłady pryjdzie prezident, jaki rezka skarocić abo całkam spynić vajennuju padtrymku Ukrainy.

Akramia taho, pavodle apošnich raźvieddanych, Rasija nie bačyć roznahałośsiaŭ pamiž pieramovami z Ukrainaj i nastupnym vajskovym prasoŭvańniem.

«Jak i ŭ 2015 hodzie, Kreml spadziajecca na fiktyŭnyja pieramovy», — papiaredžvaje aŭtar artykuła sa spasyłkaj na svaju krynicu.

Jon nahadvaje, što tady Pucin damaŭlaŭsia pra «mir» z Anhiełaj Mierkiel u Minsku, a ŭ hety čas jahonaje vojska zachapiła dziesiać viosak i stratehična važny horad Debalcava.

«Kali ŭkraincy nie buduć atrymlivać zbroju i bojeprypasy ad Zachadu, rasiejcy zmohuć realizavać svaje nadzvyčaj ambicyjnyja mety», — paćvierdziŭ Bild italjanski vajskovy ekśpiert Tomas Tajnier.

Jon nahadaŭ, što Rasija nikoli nie adchilałasia ad svajho pieršapačatkovaha płana ŭziaćcia pad kantrol značnaj častki Ukrainy.

Niamiecki vajskovy ekśpiert Nika Łanhie taksama ŭpeŭnieny, što vajskovaja meta Rasii palahaje ŭ tym, kab prasunucca dalej i ŭ doŭhaterminovaj pierśpiektyvie zachapić vialikija častki Ukrainy.

«Spynić hety płan ukraincy zmohuć tolki pry ŭmovie bieśpierabojnaj pastaŭki zbroi», — padkreślivaje jon.

Mirnyja prapanovy — tolki imitacyja

Aŭtar artykuła nahadvaje, što litaralna na vychodnych pradstaŭnica rasijskaha MZS Maryja Zacharava zaklikała Ukrainu «pryznać novyja terytaryjalnyja realii», spynić bajavyja dziejańni i «syści z rasiejskich terytoryj».

Heta aznačaje admovu ad tysiač kvadratnych kiłamietraŭ ukrainskich ziamiel, jakija, zhodna z rasijskaj interpretacyjaj, ciapier naležać Rasiei paśla niezakonnaj anieksii minułaj vosieńniu.

Ale novyja źviestki raźviedki pakazvajuć, što pucinskaja «praha novych ziamiel» vychodzić daloka za miežy hetych piaci rehijonaŭ. Takim čynam, słovy Zacharavaj byli tolki chitrym krokam, zaklikanym paabiacać Ukrainie i Zachadu «spynieńnie bajavych dziejańniaŭ» paśla zadavalnieńnia hetych terytaryjalnych pretenzij RF, reziumuje vydańnie.

14 śniežnia na pres-kanfierencyi i pramoj linii prezident Rasii nazvaŭ Adesu rasijskim horadam. Taksama Pucin padkreśliŭ, što paŭdniovy ŭschod ukrainskich terytoryj zaŭsiody byŭ prarasijskim i ni Krym, ni Pryčarnamorje nie majuć dačynieńnia da Ukrainy.

Pavialičyć

• 7
• 0
• 7
• 4
• 3
• 3
• 62
• 0