Z hetaha hodu zamiežnikaŭ prymajuć u biełaruskaje hramadzianstva «va ŭračystaj abstanoŭcy». Pahladzieli, jak heta adbyvajecca

U teoryi praces pryniaćcia hramadzianstva pavinien adbyvacca ŭ znakavych dla našaha naroda miescach u prysutnaści pradstaŭnikoŭ miascovych orhanaŭ ułady, orhanaŭ unutranych spraŭ. Zvyčajna cyrymonija prachodzić u vykankamie ci ZAHSie.

U tyktoku možna znajści videa z cyrymonij. Davoli časta jany nahadvajuć typovaje viasielle — tym bolš, što čas ad času mierapryjemstvy sapraŭdy pravodziać u śviatočnaj zali ZAHSu. Roźnicca ŭ tym, što na miescy damy z načosam staić siłavik u formie. A zamiest historyj pra dva karabli ŭ akijanie kachańnia hučać inšyja, nie mienš pafasnyja słovy pra toje, jak Biełaruś zaŭždy dapamahaje ludziam ź inšych krain i hatovaja ich pryniać.

Pramović klatvu dazvalajecca na adnoj ź dźviuch dziaržaŭnych moŭ — ale na ŭsich videa, jakija jość u adkrytym dostupie, ludzi havorać na ruskaj:

«Ja, dobraachvotna i śviadoma nabyvajučy hramadzianstva Respubliki Biełaruś, uračysta prysiahaju: vykonvać i pavažać Kanstytucyju Respubliki Biełaruś i inšyja akty zakanadaŭstva; abaraniać niezaležnaść, suvierenitet i terytaryjalnuju cełasnaść Respubliki Biełaruś, być patryjotam Respubliki Biełaruś, pavažać jaje dziaržaŭnyja simvały, duchoŭnyja, histaryčnyja, kulturnyja i nacyjanalnyja tradycyi, zachoŭvać histaryčnuju pamiać ab hieraičnym minułym biełaruskaha naroda, pavažać hodnaść, pravy, svabody i zakonnyja intaresy inšych asob».

Fakt taho, što prysiaha pryniesiena, pavinny paćvierdzić pradstaŭniki MUS i orhana dypłamatyčnaj słužby z adpaviednym błankam, zavieranym piačatkaj z hierbam.

Paśla hetaha čynoŭniki lubiać dać dadać niešta kštałtu «Ja vielmi rady, što vy vybrali svajoj radzimaj našu Respublika Biełaruś» ci «Zaraz i vašyja imiony buduć upisanyja na staronki historyi Biełarusi».

Šmat chto z tych, chto atrymaŭ biełaruskaje hramadzianstva, kaža, što ŭžo daŭno žyvie ŭ krainie — havorka idzie navat pra 20-30 hadoŭ. A na pytańnie, čamu vyrašyli atrymać biełaruski pašpart, ludzi prosta kažuć: «Nu jak heta tak — žyvu ŭ Biełarusi, a nie hramadzianin». Pra toje, što bolš za ŭsio padabajecca ŭ krainie, ščyra adkazvajuć: «Bulba, jabłyki».

Vital Astankovič, namieśnik kiraŭnika ŭpraŭleńnia pa hramadzianstvie i mihracyi UUS Mahiloŭskaha abłvykankama, u efiry telekanała «Biełaruś 4», adznačyŭ: «Navat kali pryniata rašeńnie pra toje, što zamiežnik staŭ biełarusam, biez pryniaćcia prysiahi jon nie stanovicca hramadzianinam. Admova prynieści prysiahu stanovicca padstavaj dla taho, kab heta rašeńnie anulavać, jon užo nie stanie hramadzianinam».

• 1
• 0
• 21
• 6
• 3
• 1
• 3
• 0