Niečakanyja parady, jak atrymać asałodu ad zastolla i nie dadać lišnich santymietraŭ da talii
Aliŭje, sieladziec pad šubaj i inšyja majaneznyja stravy — bieź ich niemahčyma ŭjavić zimovaje śviatočnaje zastolle. Kab u studzieni nie pryjšłosia pazbaŭlacca ad nastupstvaŭ takoj «navahodniaj dyjety», prysłuchajciesia da parad daśviedčanaha nutrycyjołaha.
Čamu my pierajadajem
«Navahodnija śviaty jak łakmusavaja papierka — pakazvajuć usie niavyrašanyja psichałahičnyja momanty, — kaža Volha, urač-hastraenterołah, dyjetołah ź piacihadovym stažam. — Bo pierajadańnie, čaściej za ŭsio, — prablema psichałahičnaja, a nie fizijałahičnaja».
Śpiecyjalist praciahvaje:
«Padčas zastolla ŭ nas časta spracoŭvajuć tryhiery: my jadzim za kampaniju, ad nudy ci prosta tamu, što nie možam admović nastojlivaj haspadyni. Heta ŭsio pytańni asabistych miežaŭ, ź jakimi treba pracavać. Tak što, źbirajučysia ŭ hości ci ŭ restaran, zahadzia pradumajcie, jak možna vietliva admovicca ad lišnich straŭ».
Paradaksalna, ale pryčynaj, čamu my bolš jadzim na śviaty, moža stać dyjeta. Hetaja prablema asabliva charakterna dla žančyn.
«Mnohija damy sadziacca na strohuju dyjetu, kab lepš hladziecca ŭ viačernim ubory. U vyniku ŭ dzień Ch u ich adbyvajecca zryŭ — jany sprabujuć kampiensavać doŭhuju niastaču smačnaha i, siedziačy ŭ toj samaj sukiency, jaduć usio zapar. Takija pavodziny škodnyja nie tolki dla fihury — jany mohuć pryvieści da surjoznych zachvorvańniaŭ ŽKT», — adznačaje doktarka.
Jak nie admaŭlacca ad smačnaha i zastacca ŭ formie
Volha padzialiłasia łajfchakami, jakija dapamohuć zachavać pryhožuju fihuru i pry hetym nie prymusiać admaŭlacca ad zvykłaha navahodniaha mieniu.
Atrymlivajcie asałodu ad ježy. U śviaty my možam pabałavać siabie stravami, jakija nie jadzim u zvyčajnym žyćci. Padychodziačy da stała, padumajcie, čym chacicie paradavać smakavyja receptary i abirajcie mienavita hetyja stravy. Chleb i bulbu vy možacie pajeści ŭ inšyja dni.
Nievialikija porcyi. Kali ŭ vas jość mahčymaść zamianić vialikuju talerku na desiertnuju — zrabicie heta. Ježy na jaje źmiaščajecca značna mienš, ale vizualna taki posud vyhladaje zapoŭnienym — hety pryjom padmanvaje mozh i dapamahaje ŭ vyniku źjeści mienš.
Nie zabyvajcie pra abied. U śviatočnaj mituśni lohka zabycca pra zvykły hrafik pryjomu ježy. Pastarajciesia pakłapacicca pra siabie i nie chadzicie hałodnymi da viačery. A kali vy ŭsio-tki prapuścili abied, vypicie šklanku niehazavanaj vady pierad tym, jak sadzicca za stoł — tak vy adčujecie sytaść i nie zabjacie pusty straŭnik niepadychodziačymi praduktami.
Žujcie. Časta, sabraŭšysia ŭ kampaniju, ludzi jaduć chutčej zvyčajnaha, kab nie ŭpuścić čahości smačnaha. Pasprabujcie nie źlivacca z ahulnaj chutkaściu pajadańnia, a pavolna smakujcie kožny kavałačak abranaj stravy. Pačućcio nasyčeńnia prychodzić praz 15-20 chvilin paśla pačatku trapiezy — staranna pražoŭvajučy ježu, vy dajacie mozhu mahčymaść acanić, kolki svabodnaha miesta zastałosia ŭ žyvacie.
Rabicie paŭzy. Navahodni stoł poŭny białkovych praduktaŭ, a jany pry źmiešvańni vyklikajuć pačućcio ciažaru. Tamu pamiž kurycaj, ikroj, syrami, krevietkami i inšymi białkovymi stravami varta rabić paŭzu.
Časovyja intervały treba brać i pry pačućci sytaści — zamiest taho, kab zapichvać u siabie čarhovy buterbrod, adciahniciesia ad stała i pahutarycie z haściami.
Viesialiciesia! Prydumajcie aktyŭnyja konkursy ci starajciesia bolš tančyć. Fizičnaja aktyŭnaść zrušyć fokus uvahi ź ježy i ŭraŭnavažyć kałaryjny bałans.
Pamiatajcie pra harmoniju pamiž sytaściu i kłopatam pra svajo zdaroŭje — i navahodnija śviaty projduć cudoŭna.
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier77
Kamientary