Livan, Teneryfie, Azija. Ajcišniki raskazali, kudy jeździać zimoj, kab pahrecca
Vydańnie Devby.io raskazała, kudy niekatoryja biełaruskija ajcišniki adpraŭlajucca ź Jeŭropy na zimovy adpačynak ci addalenuju pracu. Niekatoryja miescy dastatkova ekzatyčnyja.
Alaksandr, zimavaŭ na Teneryfie miesiac
Ja zaŭsiody lubiŭ padarožničać, i mnie ŭvieś čas nie chapała adpačynku. U 2020 hodzie pierajechali razam ź dziaŭčynaj u Šviejcaryju i mnie ŭdałosia znajści addalenuju pracu.
Tady ja zrazumieŭ — budu padarožničać i pracavać addalena jak maha čaściej. Bo adna sprava pračynacca chaj navat i ŭ Šviejcaryi, ale zimoj, kali nadvorje šeraje i zołka. Inšaja — na soniečnych Kanarach.
U śniežni 2021 hoda razam ź siabram pajechaŭ adpačyvać na 4 tydni na Teneryfie. Dziaŭčyna zastałasia ŭ Šviejcaryi — nie atrymałasia vyrvacca z pracy. Vybrali Kanarskija astravy z-za vydatnaha nadvorja zimoj i pryrody. Zručna, što amal adnolkavy hadzinny pojas sa Šviejcaryjaj, jeŭrapiejski ŭkład žyćcia, adčuvaješ siabie jak doma.
Dla addalenaj pracy nieabchodnyja dobraja samaarhanizacyja, matyvacyja i dyscyplina. Treba ŭmieć chutka vyrašać prablemy: šukać dobraje miesca ź jakasnym internetam, chutka fakusavacca. Biez hetaha pradukcyjnaść mocna padaje. Tamu časam pracavać u ofisie praściej.
Na Teneryfie jość kavorkinhi, ale ja imi nie karystaŭsia, addavaŭ pieravahu pracy z kaviarni z kłasnym vyhladam na akijan. Nie atrymajecca ŭ abied paserfić, a potym narmalna papracavać. Pakul pieraapraniešsia, pakul pakataješsia, pakul vysachnieš — patraciš paŭdnia, stomišsia i pierachočaš pracavać. Tak što takija zabavy tolki na vychadnych.
Ceny. Ja pravioŭ na Teneryfie 4 tydni, ni razu ničoha nie hatavaŭ — tolki jeŭ u kaviarni. Prystojnyja śniadanki kaštujuć kala 10 jeŭra, dobry abied — 15 jeŭra. Viačera taksama ŭ hetym dyjapazonie. Za dzień na ježu sychodziła 30-40 jeŭra. Razam ja vydatkavaŭ kala 1200 jeŭra na ježu. Na žyllo vydatkavaŭ prykładna 1500 jeŭra za ŭvieś pieryjad. I jašče prykładna 300 jeŭra syšło na roznyja vydatki.
Razam ja vydatkavaŭ 3000 jeŭra, nie ekanomiačy ni na čym. U Šviejcaryi ja ŭ miesiac vydatkoŭvaju bolš, tak što zimavać na Teneryfie — vyhadna. Hałoŭnaje, nie pryjazdžajcie na Kalady — usio budzie daražej u 2-3 razy.
Raju studzień: siezon užo zakančvajecca, ale nadvorje dobraje i vada dosyć ciopłaja.
Łajfchaki dla biełarusaŭ! Usiudy kažycie, što vy ź Biełarusi, nie davajcie vašyja jeŭrapiejskija telefonnyja numary — ceny na zabavy buduć u dva razy nižejšyja.
Raju naviedać hałoŭnuju słavutaść vostrava — vułkan Tejde. Naviersie dosyć choładna — vyšynia hary 3770 mietraŭ. Pryhožy ŭzdym, pryroda jak byccam na Marsie. Jość i funikulor, varyjant dla lanivych.
Teneryfie vielmi raznastajny vostraŭ! Ja žyŭ u Kosta-Adesie, na ŭźbiarežžy, dzie niama drennaha nadvorja z-za vułkana Tejde. A ŭ inšych častkach vostrava časta iduć daždžy i z-za hetaha vielmi zialona.
Na Kanarskich astravach šmat siorf-škoł, tamu kali chočacie navučycca łavić chvalu — heta cudoŭnaje dla hetaha miesca. Jašče mnie spadabałasia ŭ Anazie, vielmi pryhožym nacyjanalnym parku z raznastajnymi ściežkami dla chajkinhu.
Nie abyšłosia biez pryhod. Vypadkova prapuścili zvarotny rejs — nie ŭsačyli za čarhoj na pasadku — i zastalisia na Teneryfie jašče i na Novy hod. Zatoje paznajomilisia ź cikavymi ludźmi, naprykład, paraj, jakaja nielehalna žyvie na vostravie. U Ispanii možna pražyć nielehalna try hady i potym padavacca na lehalizacyju.
Ja apłačvaŭ kvateru ŭ Šviejcaryi, bo tam zastałasia žyć maja dziaŭčyna. U pryncypie, možna pierazdać kvateru, asabliva, kali vy žyviacie ŭ bujnym horadzie. Ale treba ŭvažliva čytać kantrakt, kab zrazumieć — ci lehalna heta.
Vielmi raju Teneryfie zimoj, ja atrymaŭ vielizarny zarad enierhii i matyvacyi. Kali budzie mahčymaść, pajedu abaviazkova jašče.
Daša, jeździła na dva tydni ŭ Livan
Ja pracuju UX/UI-dyzajnierkaj na fryłansie. Vandroŭki — majo asnoŭnaje chobi. Da pajezdki ŭžo paru hadoŭ dumała nad vandroŭkaj u Livan. Ale pačałasia pandemija. U 2022 hodzie ja žyła ŭ Tbilisi. Razmaŭlała sa znajomym, i mnie pryjšło paviedamleńnie pra źnižki ŭ Pegasus (turecki łaŭkostar). Možna było dalacieć z Tbilisi ŭ Biejrut ź pierasadkaj u Stambule za prystojny košt.
Ja vyrašyła, što heta los, i adrazu kupiła kvitki na luty 2022 hoda. Zima ŭ Tbilisi davoli miakkaja, ale ŭ Biejrucie ŭsio-tki značna ciaplej.
- Ja jeździła nie adna, tamu vydatki časam byli raździelenyja na 2 čałavieki. Pieralot u Biejrut abyšoŭsia ŭ ±360 dalaraŭ za dvaich.
- Žytło my šukali na bukinhu i na kaŭčsiorfinhu. Z-za kavida vielmi mała ludziej zastałosia na kaŭčsiorfinhu, tamu kali nie znachodzili nikoha, to karystalisia bukinham. U siarednim za noč na 2 čałavieki vychodziła 20 dalaraŭ, spynialisia 2 razy ŭ hatelach sa śniadankami, a ŭ kancy źniali pakoj na AirBnB na paru dzion.
- Ježa na dvaich vychodziła ±15 dalaraŭ za pryjom ježy. Ranicaj śniedali ci ŭ hatelach, ci kuplali vypiečku roznuju i rabili štości doma. Na abied i viačeru kudyści chadzili.
- Za simkartu addali kala 3 dalaraŭ za 50hb.
- Prajezd pa krainie vychodziŭ u miežach 1-3 dalary, ale časam jeździli aŭtaspynam.
Ahułam: kala 650 dalaraŭ na 2 čałaviek.
Viza biełarusam stavicca pa prylocie na 30 dzion. Navat ciapier, padčas vajny ŭ Izraili, turystaŭ puskajuć u krainu. Biaśpieka — adkaznaść samich ludziej. Asabista ja dumaju, što kali nie jechać na poŭdzień da izrailskaj miažy (tam časam byvajuć abstreły), to ryzyka mienšaja. Ale ŭličvajcie: štampy Livana ŭ pašparcie aznačajuć dopyt na miažy ŭ Izraili.
Ja pracuju na fryłansie, maim zamoŭnikam vandroŭka nie pieraškodziła. Prablema ŭźnikła tolki adzin raz: prajekt ja rabiła z vykarystańniem płatformy Wix. Ranicaj sieła pracavać, a płatforma nie pracuje. Vyśvietliłasia, što kampanija izrailskaja i abmiažoŭvaje dostup na terytoryi Livana. VPN dapamoh usio vyrašyć
Livan — ciopłaja kraina, ale zimoj tam prachałodna. Śpiecyfika jašče ŭ tym, što va ŭrada niama hrošaj na elektraenierhiju. Tamu ekanomiać — kali niama hienieratara, to ŭklučajuć na paru hadzin unačy i litaralna na hadzinu ŭdzień. Źviartajcie na heta ŭvahu ŭ apisańni hatelaŭ. Taksama ŭ kvaterach jość piečki abo elektryčnyja aciaplalniki. Kaviarni zaŭsiody majuć hienieratary, tamu tam možna pracavać.
U Livanie ja paznajomiłasia z fajnymi ludźmi, jakija mieli suviazi ź Biełaruśsiu.
- Napisała adkryty post na kaŭčsiorfinhu, kab paznajomicca ź miascovymi i daviedacca pra cikavyja miescy. Na jaho adhuknułasia dziaŭčyna ź Italii, jakaja žyvie ŭ Livanie ŭ nievialičkim horadzie bližej da miažy ź Siryjaj. Kali hulali pa hetym haradku, to pabačyli tam kramu biełaruskaj kaśmietyki. Uviečary my sustrelisia ź siabrami našych chastoŭ. Siarod ich byli livancy, brytaniec i jašče adzin italjaniec. U brytanca babula akazałasia biełaruskaj.
- Na moj post taksama adhuknuŭsia chłopiec ź Biejruta, prapanavaŭ sustrecca pahulać pa horadzie. Sustreča była cikavaj i viasiołaj. Jahonaja ciotka — biełaruska, i jana zachacieła z nami sustrecca.
Padčas spatkańnia jana vielmi ciešyłasia, što narešcie čuje biełaruskuju movu siedziačy ŭ Biejrucie, choć i na adzin viečar.
Nikoli nie prychodziłasia tłumačyć, što za kraina Biełaruś i dzie jana znachodzicca.
Mnie bolš padabajucca pryrodnyja miescy i ŭtulnyja maleńkija haradki, dzie možna špacyravać. Ale Livan — vielmi hornaja kraina. A za tydzień da našaha pryjezdu vypaŭ śnieh. Tamu šmat čaho nie atrymałasia naviedać. Ale cikavych miescaŭ šmat — ad načnych kłubaŭ da niezvyčajnych vadaspadaŭ siarod hor.
- U Biejrucie jość Starbaks z najpryhažejšym vidam, dzie ja była. Cudoŭnaje miesca, kab siadzieć i pracavać.
- Horad Baałbiek ź vieličeznym chramam. Taksama možna kupić suvieniry z łahatypam Chiezbały. Pradaŭcy ščyra nie razumieli, čamu my admaŭlajemsia.
- Horad Bibłas — pryhožaja miesca kala mora, dzie pryjemna hulać.
- Vadaspad Baatara — jašče adno fajnaje miesca.
- Dalina Aŭadzi Kadziša.
- Mseilha Walkway — miesca dla chajkinha, za jakim nie treba jechać daloka ŭ hory.
Mnie padabajecca jeździć u miescy, kudy jeździć mała ludziej. U Livanie niašmat turystaŭ, tamu lohka znachodzicca ahulnaja mova ź miascovymi.
Pajechać u Livan — heta niezvyčajna, potym kožny raz možna ŭsich ździŭlać hetym faktam. U dadatak tam adnosna tanna, smačna i pryhoža.
Siarhiej, jeździŭ try razy ŭ Tajłand i adzin raz u Vjetnam
Ja ŭ IT z 2012 hoda. Spačatku pracavaŭ u nievialikaj kampanii, potym pačaŭ zajmacca svaim prajektam razam z žonkaj. Pracavali nad im usio leta i vosień, a sutyknuŭšysia sa stomlenaściu i niajasnymi pierśpiektyvami, vyrašyli pasprabavać zimoŭku ŭ Tajłandzie.
Zabiahajučy napierad, skažu, što ŭ Tajłandzie nam spadabałasia, i na zimoŭku my jeździli ŭ 2016, 2018 i 2019 hodzie. Na toj momant (padčas usich zimovak) my žyli z baćkami žonki, tamu prablem z žytłom nie było: prosta vyzvalili pakoj.
Jeździli pa turystyčnaj paŭhadavoj vizie. Treba było mieć na rachunku 5000 dalaraŭ na čałavieka. Vizu možna było praciahnuć na 30 dzion za dadatkovuju płatu. Važna było padtrymlivać patrebny bałans na praciahu kožnaha miesiaca pierad praciahvańniem.
Niahledziačy na paŭhadavuju vizu, u krainie možna było znachodzicca bieśpierapynna tolki 60 dzion. Hety termin možna było praciahnuć z dapamohaj viza-rana.
Tady my zarablali pa 2-3 tysiačy dalaraŭ kožny, plus byli nievialikija aščadžeńni. Padčas zimovak zdymali adnapakajoŭku ŭ žyłym kompleksie z achovaj, trenažornaj załaj i basiejnam — nam chapała. Žyllo šukali na miascovych sajtach i hrupach u Facebook.
Samaja darahaja častka kamunałki — elektryčnaść. Kali pracuje kandycyjanier bolš, čym paŭdnia, moža lohka vyjści bolš za 100 dalaraŭ. My pracavali ŭ ahulnym pakoi i kandycyjanier u nas uklučaŭsia tolki na noč. Adzin raz zabylisia apłacić kamunałku (termin byŭ da 12:00) i vadu nam adklučyli litaralna ŭ 12:05.
Charčavacca lepš za ŭsio (tańniej i smačniej) u tajskich miescach. Vychodzić ad 3 da 6 dalaraŭ za porcyju. My časta chadzili na ekskursii (ad 50 da 300 dalaraŭ) i ŭ muziei (byvajuć navat biaspłatnyja). Naviedvali majstar-kłasy: vielmi spadabaŭsia ŭrok tajskaj kulinaryi. Z tych časoŭ ja praktyčna nie hatuju inšyja stravy, akramia samych prostych.
Z transpartam situacyja takaja:
- Hramadski transpart: aŭtobus ź dźviuma łaŭkami, bieź dźviarej i vyraznaha raskładu. Zatoje tanna — 1 dalar.
- Taksi: cana zaležyć ad adlehłaści. Padčas žyćcia na Pchukiecie my zvyčajna žyli ŭ centry vostrava, davoli daloka ad plažu. Vychodziła ad 30 dalaraŭ.
- Motabajk-taksi — heta ludzi na bajkach, u kamizelkach peŭnaha koleru, u zaležnaści ad horada. Kaštuje kala 6 dalaraŭ. Biaruć da 3-ch pasažyraŭ, u zaležnaści ad kamplekcyi. Samy chutki sposab, ale daloka nie jeździać. Naprykład, u Pchukiet — nie.
Hałoŭnaja asablivaść tajskaj movy — tanalnaść, dzie adnolkavaja fanietyka moža mieć roznyja značeńni ŭ zaležnaści ad tonu. Heta pryvodzić da paciešnych situacyj, nakštałt błytaniny pamiž luboŭju da słanoŭ i «słanovym dziarmom».
Z-za hetaha ŭ tajcaŭ paciešny akcent u anhlijskaj movie. Kuplaŭ Apple Pencil, pytaŭsia z našym standartnym vymaŭleńniem Do you have Apple Pencil in stock?. Nichto nie zrazumieŭ. Kali ja pierajmaŭ tajcaŭ i pramaŭlaŭ appl-e-e penc-i-i-il (praciahvajučy huki), pradaviec adrazu mianie zrazumieŭ.
Hałoŭnaja parada: zrabicie strachoŭku. Kožny raz padčas zimoŭki my źviartalisia lekara. Aščadzili kala 2000 dalaraŭ. Pieršy raz — nastupili na ržavy ćvik, druhi raz — u žonki była viatranka, a treci — z urałahičnymi prablemami z-za siadziačaj pracy.
U 2019 hodzie prosta z Tajłanda my pajechali ŭ biaźvizavy dla biełarusaŭ Vjetnam. Spadabaŭsia mienš: nie takaja smačnaja ježa, nižejšy ŭzrovień žyćcia. Ale šmat ludziej dobra havoryć pa-rusku, dobraje staŭleńnie da ruskamoŭnych, asabliva ŭ kurortnych haradach.
Adnak bolš złačynnaści. Nas navat papiaredžvali, kab nie nasili sumki, jakija lohka sarvać — šmat vypadkaŭ, kali vyryvali sumku ci telefon z ruk i źjazdžali. Sam z hetym nie sutykaŭsia.
Raju ŭsim pryjezdžym razumieć — dla miascovych žycharoŭ heta nie kurort, a zvyčajny dom i miesca pracy. Prystojnaje adzieńnie i vietlivaść zrobiać vaša znachodžańnie bolš pryjemnym, i miascovyja buduć stavicca da vas ź vialikaj pavahaj.
«Možna było za 200 dalaraŭ źniać viłu z basiejnam la akijana i žyć, jak miljanier». Biełarus raskazaŭ pra plusy i minusy žyćcia na vostravie Bali
Kraina «akuna mataty» i tvorčych ludziej. Jak biełaruski ajcišnik pracavaŭ u Tanzanii
Bojki «rajon na rajon» i mocnaja kłasavaść. Jak biełarus paŭhoda pracavaŭ u Papua — Novaj Hviniei
Svajak Viktara Łukašenki zajmaje vysokija pasady ŭ KDB. Heta vyśvietliłasia, kali zabrali budynak dziciačaj palikliniki7
Kamientary