Palitviazień, hramadzianin Rasii, pajechaŭ ź biełaruskaj turmy na vajnu
24-hadovy rasijanin Anton Łysaŭ, jaki byŭ asudžany na 10 hadoŭ pazbaŭleńnia voli za dziejańni na terytoryi Biełarusi, byŭ vyzvaleny z kałonii ŭvosień 2023 hoda i ekstradavany ŭ Rasiju z pryčyny zhody vajavać na baku RF. Pra heta sa spasyłkaju na svaje krynicy, paviedamlaje kanał dissidentby.
Anton Łysaŭ — hramadzianin Rasii, pryjechaŭ u Biełaruś u kastryčniku 2021-ha, kab paŭdzielničać u padpale mašyny staršyni Kamiteta sudovych ekśpiertyz hienierała Alaksieja Vołkava. Mahčyma, toj padpał byŭ zamovaj łukašenkaŭskich śpiecsłužbaŭ.
Jak pisała «Naša Niva» ŭ mai, Anton Łysaŭ, jaki adbyvaŭ pakarańnie ŭ «Vićbie», papraŭčaj kałonii № 3, jašče raniej pisaŭ zajavu na imia Jaŭhiena Pryhožyna z prośbaj uziać jaho ŭ PVK «Vahnier» na vajnu z Ukrainaj, kab vyzvalicca takim čynam ź biełaruskaj kałonii.
Płan chłopca tady nie spracavaŭ.
Jak raskazaŭ «Našaj Nivie» były sukamiernik Łysava, jaki siadzieŭ razam ź im, toj pryznavaŭ, što pajechaŭ palić mašynu za hrošy, jakija jamu prapanavaŭ niechta praz admysłovuju placoŭku ŭ darknecie. «Navat sumu nazyvaŭ — kala $2000».
Łysava sukamiernik charaktaryzavaŭ jak «čałavieka biez tarmazoŭ». Raskazvaje takuju historyju: «Niejak u prahułačnym dvoryku Łysaŭ nakłaŭ kuču, bo prasiŭsia ŭ prybiralniu, a jaho nie vypuskali adnaho. My, zakonapasłuchmianyja biełarusy, takoje i ŭjavić nie mahli».
Sam Łysaŭ da svajho aryštu ŭ Minsku žyŭ u Čebaksarach (rasijskaja aŭtanomija Čuvašyja), jon sirata, sa svajakoŭ u jaho tolki sastarełaja babula.
Razam ź biełarusam Zacharam Tarazievičam jon byŭ zatrymany i asudžany za padpał mašyny staršyni Kamiteta sudovych ekśpiertyz Alaksieja Vołkava.
Spačatku chłopcam inkryminavali teraryzm, ale sudzili ŭ vyniku pa 218 artykule Kryminalnaha kodeksa — za naŭmysnaje źniščeńnie čužoj majomaści.
Łysaŭ atrymaŭ 10 hadoŭ kałonii, byŭ pryznany palitviaźniem.
Vyśvietliłasia, što chłopcam za padpał zapłacili. Zamoŭščyk padpału zatrymany i asudžany nie byŭ, što daje padstavy ličyć, što tym «zamoŭščykam» mahła być asoba z łukašenkaŭskich śpiecsłužbaŭ — mietad pravakacyj šyroka vykarystoŭvajecca ŭładami ŭ «ekstremisckich» złačynstvach.
Ciapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ9
Kamientary