Pamiatajecie biełaruskaha repiera Džoni Haci, jakomu dali 19 hadoŭ za raspaŭsiud narkotykaŭ? Voś što ź im ciapier
Siabar repiera vyjšaŭ z kałonii i praź videa ŭ tyktoku sprabuje dahrukacca da Łukašenki.
Sprava repiera Džoni Haci (sapraŭdnaje imia — Jaŭhien Zyl) u svoj čas była vielmi hučnaj. U 2015 hodzie 33-hadovaha muzyku abvinavacili ŭ tym, što jon sa svaimi znajomymi arhanizavaŭ internet-kramu pa prodažy psichatropaŭ. Tady niekalki čałaviek zatrymali, ale sam Džoni, spałochaŭšysia pakarańnia, uciok u Rasiju.
U susiedniaj krainie, jak śćviardžałasia potym u materyjałach kryminalnaj spravy, repier praciahnuŭ zajmacca raspaŭsiudam narkotykaŭ: jon kiravaŭ čatyrma internet-kramami. Repier vykarystoŭvaŭ miesiendžary, praź jakija najmaŭ na pracu maderataraŭ, kurjeraŭ i zakładčykaŭ.
Ale ž heta było nie adzinaje, u čym abvinavačvali Jaŭhiena Zyla. Jamu taksama inkryminavali 19 vypadkaŭ raspaŭsiudžańnia parnahrafičnych materyjałaŭ.
U 2017 hodzie biełarusa zatrymali ŭ rasijskim Saratavie i ekstradavali na radzimu. Sud adbyŭsia ŭ 2019 hodzie. Spačatku repieru dali 21 hod źniavoleńnia z kanfiskacyjaj majomaści. Ale paśla abskardžańnia ŭsio ž źmiakčyli prysud: 19 hadoŭ źniavoleńnia biez kanfiskacyi. Adbyvać pakarańnie mužčynu adpravili ŭ kałoniju ŭ Mahiloŭ.
Letaś u studzieni na svabodu vyjšaŭ siabar Džoni Haci, jaki siadzieŭ ź im u adnoj kałonii. Ihar Dźmitryjeŭ (jon taksama repier, byŭ viadomy jak Kendys) pravioŭ u niavoli 9 hadoŭ, pieršapačatkova atrymaŭšy 12 hadoŭ.
U tyktoku Ihar raspaviadaje, što pierapisvajecca ź siabram, i čytaje ŭsłych listy ad taho.
— «Karamba, bratka. U mianie ni dnia biez chadajnictvaŭ, skarhaŭ i zajaŭ. Siońnia pryjšoŭ adkaz sa Śledčaha kamiteta ab tym, što zakryvajuć vytvorčaść praź niedastatkovuju kolkaść sabranych dokazaŭ. I adpaviedna, ja im adrazu daŭ adkaz, dakładniej, u Hienieralnuju prakuraturu na ich dziejańni. Tamu ŭsio roŭna im daviadziecca hetaje rašeńnie admianić i pačać usio nanova. Ja ad ich nie adstanu, bo tut nichto znachodzicca nie choča. Kali ty pierastaŭ zmahacca za svabodu, značyć, ciabie złamała hetaja sistema».
Džoni Haci śćviardžaje, što ŭžo daŭno skarystaŭsia mahčymaściu pierahladzieć svaje pohlady. Ciapier jon choča jak maha chutčej apynucca na voli, kab pačać zajmacca tym, što «ŭ jaho sapraŭdy ŭ žyćci atrymlivajecca lepš za ŭsio» — pisać muzyku i rabić biełaruskaje mastactva bolš kankurentazdolnym na suśvietnym uzroŭni.
Džoni taksama paviedamlaje, što za kratami atrymaŭ zarad dla svajoj tvorčaści i ciapier jamu jość, što skazać, ab čym pisać, ab čym zdymać. Jon raspaviadaje, što piša knihu — svaju bijahrafiju — i ŭžo dajšoŭ amal da siaredziny. Spadziajecca, što paśla publikacyi tvor budzie karystacca šalonaj papularnaściu, bo heta historyja sapraŭdnaha čałavieka.
Ihar za spravu ŭziaŭsia rašuča: jon pačaŭ publikavać u tyktoku zvaroty da Łukašenki z prośbaj razabracca ŭ niespraviadlivaści ŭ dačynieńni Jaŭhiena Zyla.
Sam ža Džoni Haci vielmi spadziajecca na dapamohu siabra i navat pisaŭ tamu, što raźličvaje na zvarot Ihara da «šanoŭnaha prezidenta»:
— «U našaha prezidenta ŭsio zvyčajna dakładna, jasna i zrazumieła. Zakon pavinien vykonvacca, tyja, chto parušajuć zakon, pavinny być pakaranyja. U hetym vypadku ja, jaki parušyŭ zakon, pakarany. Ale jość jašče i tyja, chto prymaje złačynnyja rašeńni, padpisvajučy złačynnyja dakumienty, staviačy piačatki, prykryvajučysia imiem Respubliki Biełaruś», — čytaje Ihar list siabra.
Ale ž sprava nie idzie: ułady nijak nie reahujuć na roliki Ihara, a kamientatary daloka nie zaŭsiody spačuvajuć Jaŭhienu i navat zaklikajuć da bolš žorstkich pakarańniaŭ za złačynstvy, źviazanyja z narkotykami.
Ihar spakojna i ciarpliva adkazvaje chejtaram. U svaich videa jon padymaje pytańni taho, jakoje surovaje ŭ Biełarusi pakarańnie pa narkatyčnych artykułach. A taksama sprabuje tłumačyć moładzi, čamu nikoli nie atrymajecca stać samym chitrym i zarabić šmat hrošaj na narkotykach.
Ciapier čytajuć
«My jamu daviarajem». Čamu źnikłuju Mielnikavu zamianiŭ mienavita eks-vajskoviec Paciechin?1
Kamientary