U Chakasii piłotu-piensijanieru, jaki chacieŭ źjechać va Ukrainu, dali vosiem hadoŭ kałonii. Prakuror prasiŭ mieniej
U sakaviku 2022 hoda Ihar Pakusin abliŭ žoŭtaj i siniaj farbaj banier ź litaraj «Z» i napisaŭ «Słava Ukrainie» na ścianie krajaznaŭčaha muzieja ŭ Abakanie.
U Abakanie (Paŭdniovaja Sibir, Rasija) sud pryznaŭ 61-hadovaha Ihara Pakusina vinavatym u «padrychtoŭcy da dziaržaŭnaj zdrady ŭ formie pierachodu na bok praciŭnika» i prysudziŭ vosiem hadoŭ i adzin miesiac pazbaŭleńnia voli, piša Bi-bi-si.
Prakuratura prasiła na hod mienš. Abarona maje namier abskardzić prysud.
Pakusin — uradženiec Adesy. Jašče ŭ saviecki čas jon skončyŭ Kiravahradskuju lotnuju vučelniu, dzie rychtavali lotčykaŭ dalokaj avijacyi. Paźniej pa raźmierkavańni jon trapiŭ u Abakan i zastaŭsia žyć u Rasii.
Budučy piensijanieram, jon praciahvaŭ pracavać piłotam hramadzianskaj avijacyi. Paśla rasijskaha ŭvarvańnia va Ukrainu Pakusin zaniaŭ antyvajennuju pazicyju i chacieŭ viarnucca na radzimu, hetyja płany jon abmiarkoŭvaŭ sa svaimi znajomymi.
Pavodle viersii rasijskich śpiecsłužbaŭ, jon źbiraŭsia źviazacca z ukrainskim bokam i dałučycca da USU — «kab, vykarystoŭvajučy svaje lotnyja navyki, vajavać suprać rasiejskich vojskaŭ u avijacyi».
U sakaviku 2022 hoda Ihar Pakusin abliŭ žoŭtaj i siniaj farbaj banier ź litaraj «Z» i napisaŭ «Słava Ukrainie» na ścianie krajaznaŭčaha muzieja ŭ Abakanie.
Za heta na jaho zaviali spravu ab vandaliźmie i ŭ śniežni taho ž hoda prysudzili da šaści miesiacaŭ abmiežavańnia voli.
Na nastupny dzień paśla vyniasieńnia prysudu supracoŭniki śpiecsłužbaŭ znoŭ zatrymali Pakusina, abvinavaciŭšy hetym razam u dziaržaŭnaj zdradzie.
U spravie fihuruje videazapis, zrobleny ŭ miascovym adździele FSB, na jakim zatrymany pramaŭlaje nastupnaje: «U dalejšym, patrapiŭšy na Ukrainu, byli dumki dapamahać svajoj radzimie ŭ supraćdziejańni śpiecyjalnaj vajennaj apieracyi, nu, z metaj pavyšeńnia bajazdolnaści, vyciahvać paranienych, dapamahać lačyć. U dadzieny momant byŭ zatrymany, i liču, što ja paharačyŭsia. U zroblenym raskajvajusia. I chaču skazać, što až da mirnaha pahadnieńnia pamiž dźviuma krainami ja nie budu paŭtarać hety ŭčynak».
Pa słovach pravaabaroncaŭ, Pakusin nie chavaŭ svaich antyvajennych pohladaŭ, ale nie źbiraŭsia vajavać suprać Rasii, a pakazańnie z pryznańniem viny było vybita pad katavańniami.
Jak kažuć jaho znajomyja i žonka, Pakusin nie moh udzielničać u bajavych dziejańniach praz stan zdaroŭja: u jaho zamiest dvuch sustavaŭ — pratezy, a ŭ sercy — stent.
Pa rašeńni suda adbyvać pakarańnie jon budzie ŭ kałonii strohaha režymu.
Kamientary