«Siońnia kuplajuć tyja, chto staŭ u čarhu ŭ žniŭni-vieraśni». Što ŭ dyleraŭ z najaŭnaściu papularnych madelej Geely
Letaś na biełaruskim aŭtamabilnym rynku ŭtvaryłasia ŭnikalnaja dla sučasnaha śvietu situacyja. Kab nabyć aŭtamabili marki Geely, u zaležnaści ad madeli treba było čakać ad adnaho da šaści miesiacaŭ. «Naša Niva» daviedałasia, ci zachavaŭsia minułahodni deficyt.
Hod novy — čerhi staryja
Jak vyśvietliłasia, prablemy z asartymientam zachavalisia i ŭ 2024 hodzie.
Asabliva składana tym, chto nie hatovy iści na kampramisy pa kolery i kamplektacyi. Tak, naprykład, u Minsku časam možna adšukać Geely Emgrand abo X50 u topavych kamplektacyjach ź niepapularnym koleram. Z mašynami ŭ bolš prostych kamplektacyjach i papularnych kolerach — składaniej, daviadziecca čakać ad niekalkich tydniaŭ da niekalkich miesiacaŭ.
U Breście Geely Emgrand u najaŭnaści niama ad słova «zusim». Roŭna, jak i parkietnikaŭ Belgee X50 (byłaja Geely Coolray) i Geely Atlas Pro.
Papularny siedan čakaje rebrendynh i restajlinh
Raźličvać na chutkija pastaŭki Geely Emgrand u sałony dyleraŭ nie vypadaje. Zavod rychtujecca da zapusku vyrabu restajlinhavaj madeli. Pačatak vytvorčaści abnoŭlenaha Emgrand zapłanavany na sakavik.
Restajlinhavaja madel budzie niamocna adroźnivacca ad ciapierašniaj. Musić źjavicca bolš varyjacyj pa kamplektacyi, źjaviacca kaśmietyčnyja źmieny ŭ źniešnaści. Cana na abnoŭleny aŭtamabil dyleram pakul nieviadomaja.
Kali zmohuć nabyć aŭtamabili tyja, chto zapisvajecca ŭ čarhu zaraz — pradkazać składana. Na ciapierašni momant Geely Emgrand kuplajuć tyja, chto zapisaŭsia ŭ čarhu ŭ žniŭni-vieraśni minułaha hoda.
U najaŭnaści jość tolki darahija madeli
Emgrand u najaŭnaści taksama niama ŭ Homieli, taksama jak i dźviuch nastupnych pa darahaviźnie madelaŭ X50 i Atlas Pro.
Kali niechta zachoča pryjści ŭ sałon i adrazu nabyć aŭtamabil, usie pradaŭcy nazyvajuć dźvie madeli: Geely Tugella pa cenach ad 111 600 rubloŭ (kala 35 tysiač dalaraŭ) i Geely Monjaro, ceny na jakija pačynajucca z 141 900 rubloŭ (kala 45 tysiač dalaraŭ).
Pry hetym, prynamsi niekatoryja dylery spadziajucca, što paśla taho, jak zavod «Biełdžy» zapuścić vypusk abnoŭlenaj Geely Emgrand, jakaja paśla restajlinhu budzie mieć nazvu Belgee, situacyja palepšaje.
Pakul ža, jak atrymałasia vyśvietlić, nabyć siedan biełaruska-kitajskaj vytvorčaści amal niemahčyma. Za vyklučeńniem vypadkaŭ, kali niechta, dačakaŭšysia svajoj čarhi, admovicca ad kupli. Heta adziny mahčymy šaniec paskoryć nabyćcio aŭto biełaruskaj zborki.
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi4
Kamientary