23-hadovaja biełaruska vyžyła ŭ žudasnym DTZ, ale ciapier nie moža chadzić. Jaje historyja dakazvaje, što kachańnie isnuje
Niekalki hadoŭ tamu Ina Stefanovič trapiła ŭ DTZ i ciapier pierasoŭvajecca ŭ invalidnym vazku. Jaje kachany dapamahaje joj adnaŭlacca.
Naradziłasia Ina ŭ Brasłavie. Paśla škoły pajechała skarać stalicu — pastupiła ŭ piedahahičny ŭniviersitet. Płanavała stać defiektołaham. Jana katałasia na skiejtbordzie i kańkach, vandravała i šmat paśmichałasia…
Było i kachańnie: maładaja dziaŭčyna padpracoŭvała ŭ restaranie barmienšaj i tam paznajomiłasia sa svaim budučym chłopcam Kiryłam, jaki byŭ aficyjantam. Ale ŭsio raptam źmianiłasia ŭ mai 2023 hoda — Ina była jakraz na apošnim kursie ŭniviersiteta.
Razam ź siamjoj dziaŭčyna pajechała na śviata — u jaje dziadźki byŭ dzień naradžeńnia. Ale sieści za śviatočny stoł nichto z tych, chto byŭ u mašynie, nie zmoh. Adbyłosia žudasnaje DTZ. Kiroŭca fury pavaročvaŭ naleva i nie prapuściŭ «Fijat» ź siamjoj Iny.
Ina siadzieła na pasažyrskim siadzieńni i čamuści nie pryšpiliłasia — choć zvyčajna robić heta.
U adnym ź intervju dziaŭčyna raspaviadała, što pamiataje trahiedyju ŭryŭkami, bo nie ŭvieś čas była ŭ prytomnaści.
— Dobra zachavałasia ŭ pamiaci toje, jak mianie pryvieźli ŭ pryjomnaje adździaleńnie Brasłaŭskaj centralnaj rajonnaj balnicy, jak zašyvali rany na hałavie, jak vyzvalali ad adzieńnia. Mnie stała škada, što razrezali maju novuju pryhožuju spadnicu.
Dziaŭčyna atrymała traŭmy roznaj stupieni ciažkaści i łakacyi, ale samaj surjoznaj akazaŭsia pierałom šyjnych pazvankoŭ.
U Brasłaŭskuju balnicu terminova vyklikali niejrachirurha ź Minska, jaki praapieryravaŭ dziaŭčynu. Usie tyja, chto byŭ u mašynie razam ź Inaj, trapili ŭ balnicu ŭ roznym stanie. Kali Kirył apynuŭsia ŭ zvyčajnym adździaleńni i adnosna chutka adnaviŭsia, to mama dziaŭčyny zahinuła. U toj ža avaryi zahinuŭ i jašče adzin svajak Iny.
U balnicach dziaŭčyna praviała šmat času, bo była paralizavana na 80%. Ale na videa taho pieryjadu Ina paśmichajecca. Kaža, hałoŭnuju rolu ŭ hetym syhrali svajaki i siabry, jakija kožny dzień prychodzili i dapamahali nie zdavacca.
Kirył taksama nie kinuŭ kachanuju. U intervju jon kazaŭ:
— Kali ŭsio zdaryłasia, ja taksama trapiŭ u balnicu, ale ŭ zvyčajnaje adździaleńnie. Ina ž znachodziłasia 9 dzion u reanimacyi. Ja nie bačyŭ jaje i nie viedaŭ, u jakim jana stanie. Daktary kazali: usio narmalna, stan stabilny. Ale kožny razumieje, što kali čałaviek u reanimacyi, to stanovišča nie samaje lepšaje, — uspaminaje Kirył. — Tady ja prosta čakaŭ i vieryŭ u toje, što ŭsio budzie dobra. Dy i naohuł: dziakuj Bohu, što žyvaja.
Kali skazali, što ŭ Iny złamanaja šyja, mianie heta nie napałochała. Pa-pieršaje, u mianie stryječny brat voś užo 8 hadoŭ pierasoŭvajecca ŭ invalidnaj kalascy, tamu ja ŭsio heta ŭžo bačyŭ i pražyvaŭ. Pa-druhoje, Ina zastałasia toj ža dziaŭčynaj, jakuju ja pakachaŭ. U jaje hałavie i dušy ničoha ž nie źmianiłasia. Kali jana pryjšła ŭ prytomnaść, heta mianie padbadzioryła. Usio taja ž maja Ina, a pierałom chrybietnika — sprava druhasnaja.
Tata Iny chacieŭ, kab dačka zastałasia ŭ rodnym Brasłavie — usio ž tam svajaki pobač. Ale para vyrašyła viarnucca da svajho zvykłaha žyćcia ŭ Minsku. U Iny drenna varušacca palcy, joj daviałosia nanova vučycca takim prostym rečam, jak trymać stałovyja prybory i čyścić zuby.
Watch on TikTok
Dziaŭčyna pakazvaje ŭ tyktoku svaje budni. Bačna, ź jakoj piaščotaj Kirył kłapocicca pra jaje. Chłopiec taksama supravadžaje Inu padčas jaje reabilitacyj u roznych centrach Biełarusi i Rasii.
Daktary pakul nie dajuć nijakich prahnozaŭ: prosta rajać kožny dzień vykonvać fizičnyja praktykavańni.
Časam Ina nie moža ŭstrymacca ad paraŭnańnia taho, jakoj jana była i jakoj stała. Naprykład, vykłała videa svajho špacyru la płoščy Pieramohi — kaža, što niekali ličyła, što ŭ jaje «žudasnaja chada». Tamu ciapier zaklikaje ŭsich lubić siabie i nie šukać niedachopy.
Watch on TikTok
Dziaŭčyna žartuje sa svajho stanovišča i robić šmat iraničnych rolikaŭ. Najbolš papularnaje jaje videa nabrała 1,5 miljona prahladaŭ — u im Ina pakazvaje, jak prachodzić jaje dzień.
«Usie buduć pisać: «Biedny chłopiec, navošta jamu heta treba», — ci surjozna, ci žartujučy kaža jana ŭ roliku.
Bolšaść ludziej u kamientarach pišuć joj słovy padtrymki i kažuć, što takaja historyja prymušaje pavieryć u toje, što sapraŭdnaje kachańnie isnuje.
«Naša Niva» — bastyjon biełaruščyny
PADTRYMAĆ50 tysiač dalaraŭ za kvitki: biełaruska nie moža trapić na lačeńnie ŭ Kitaj praz šalony ceńnik avijakampanii
Videa dziaŭčyny z adnoj nahoj zavirusilisia ŭ tyktoku. U jaje kranalnaja historyja
29 kiłahram u try hady: minčanka haduje dačku ź ciažkaj chvarobaj, a chiejtary prapanujuć pierastać davać ježu viodrami
Filipienka raskazaŭ, ad kolkich svaich knih admoviŭsia b i čamu pradaŭ «Tesłu»2
Kamientary