Inžynierku «Naftana» pakarali za «ekstremizm u sacyjalnych sietkach»
Sudździa suda Navapołacka Zinaida Bałabołava 14 śniežnia za padpisku ŭ sacyjalnaj sietcy na piać «ekstremisckich» infarmacyjnych resursaŭ pakarała štrafam u pamiery 740 rubloŭ inžyniera pa kaštarysnaj pracy AAT «Naftan» Maryju Hančuk, paviedamlaje «Viciebskaja viasna».
Na sudovym pasiadžeńni byŭ začytany pratakoł ab administratyŭnaj adkaznaści, pavodle jakoha Maryja Hančuk na svajoj piersanalnaj staroncy ŭ instahramie mieła spasyłki na publikacyi kanałaŭ: SYMBAL.BY, «Radyjo Svaboda — Biełaruś», Belsat, «Naša Niva» i NEXTA. Usie hetyja infarmacyjnyja resursy ŭ rozny čas ułady ŭklučyli ŭ respublikanski śpis «ekstremisckich» materyjałaŭ. Žančyna ŭ sudzie vinu pryznała poŭnaściu, na daśledavańni dokazaŭ pa spravie nie nastojvała.
Uličvajučy ŭsie abstaviny spravy, sudździa Bałabołava na padstavie č. 2 art. 19.11 KaAP pakarała Hančuk štrafam u pamiery dvaccaci bazavych vieličyniaŭ na sumu 740 rubloŭ.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady22
Kamientary