Ihar Siečyn i Uładzimir Pucin.
Dakumienty pa pastaŭkach i tranzicie ŭ Biełaruś nafty pakul nie padpisanyja, ale pastaŭki syraviny na biełaruskija naftapierapracoŭčyja zavody iduć. Pra heta zajaviŭ 4 studzienia vice‑premjer RF Ihar Siečyn.
Siečyn nahadaŭ, što z 1 studzienia spyniłasia dziejańnie panižalnych kaeficyjentaŭ pry pastaŭkach u Biełaruś nafty. Adnak z ulikam «ekskluziŭnaha staŭleńnia» da biełaruskich partnioraŭ Rasija prapanavała zachavać ilhotny — biaspošlinny — režym na pastaŭki nafty dla ŭnutranaha karystańnia ŭ abjomie da 6 młn. ton. Hetyja prapanovy pieradadzieny biełaruskim partnioram, dadaŭ vice‑premjer.
Siečyn taksama paviedamiŭ, što ŭ najbližejšyja miesiacy pavinny być padpisanyja dakumienty pa pastaŭkach nafty ŭ ramkach Mytnaha sajuza Rasii, Biełarusi i Kazachstana.
Kamientujučy pazicyju Minska, jaki nastojvaje na lhotnych umovach pastaŭki nafty ŭ suviazi sa stvaranym Mytnym sajuzam, Siečyn zajaviŭ:
«My zychodzim z padpisanych dakumientaŭ. Pytańni pieramiaščeńnia vuhlevadarodaŭ pavinny być vyznačanyja dadatkovym pahadnieńniem».
4 studzienia premjer‑ministr Rasii Uładzimir Pucin daručyŭ Iharu Siečynu pradoŭžyć pieramovy ź Minskam ab umovach pastaŭki i tranzitu nafty. «Spadziajusia, što damoŭlenaści buduć dasiahnutyja ŭ samy najbližejšy čas», — cytuje Pucina RIA Novosti.
Aficyjny pradstaŭnik Ministerstva enierhietyki RF Iryna Jesipava abvierhła infarmacyju, što źjaviłasia ŭ ŚMI, ab tym, što biełaruska‑rasijskija pieramovy 4 studzienia nie adnaŭlalisia. «Pieramoŭny praces ź biełaruskim bokam praciahvajecca i nie spyniaŭsia», — padkreśliła pradstaŭnik Minenierha.