Z novaha hoda ŭ 2—3 razy vyraśli košty biełaruskich vizaŭ dla zamiežnych hramadzian. Pierš za ŭsio dla tych, chto atrymlivaje vizy ŭ aeraportach.
U Konsulskaj upravie MZS Biełarusi heta patłumačyli ŭvodam u dziejańnie dadatkaŭ da asobnaj častki Padatkovaha kodeksu Respubliki Biełaruś.
Aprača taho z novaha hoda apłata za vizy pieraviedzienaja z dalaraŭ u jeŭra. Źmienienyja i typy viz — ciapier dziejničaje try typy vizaŭ: tranzitnaja, karotkaterminovaja i doŭhaterminovaja, padzieła na turystyčnyja i dziełavyja vizy niama.
Jak patłumačyli ŭ konsulskim punkcie ŭ Nacyjanalnym aeraporcie «Minsk»,
kali raniej patencyjny turyst ź Jeŭrasajuza, zacikaŭleny pryjechać u Biełaruś, moh atrymać tam adnarazovuju karotkaterminovuju biełaruskuju vizu za 60 dalaraŭ, to ciapier — za 180 jeŭra. Doŭhaterminovyja vizy dla hramadzian Jeŭrasajuza i ZŠA kaštujuć bolš za 200 jeŭra.
«U ich jość vybar: abo brać vizu ŭ pasolstvie Biełarusi ŭ svajoj krainie za 60 jeŭra, abo ŭ aeraporcie za 180 jeŭra.
Faktyčna jany płaciać za terminovaść pasłuhi»,‑‑ patłumačyli ŭ konsulskaj upravie MZS Biełarusi. Vyras košt vizavych pasłuh i pry afarmleńni ŭ pasolstvach, ale nie tak kardynalna.
U konsulskim punkcie aeraporta «Minsk‑2» zaznačyli, što zamiežnyja hramadzianie płaciać i pa novych taryfach, i nichto pakul nie admaŭlaŭsia.
Ale ŭ turfirmach kažuć, što
zamiežniki pačynajuć admaŭlacca ad pajezdak u Biełaruś, bo tut adny z samych darahich vizaŭ u cviecie.
Biełaruskija ŭłady štohod prymajuć prahramy pryciahnieńnia zamiežnych turystaŭ u krainu, ale pakul hetyja prahramy nie dziejničajuć, u tym liku i z‑za darahoŭli i składanaści vizavych pracedur.
Lik zamiežnych hramadzian, jakija kuplajuć turystyčnyja pradukty ŭ Biełarusi, składaje kala 50 tysiač na hod.
Amal 5 hadoŭ tamu ź inicyjatyvy prezydenta Viktara Juščanki Ukraina skasavała vizavy režym z krainami Zachadu, i ciapier tudy pryjaždžajuć miljony zachodnich turystaŭ. Pavodle Viktara Juščanki — da 25 miljonaŭ na hod.