Biełarusam u Vilni zvoniać i prosiać pakinuć Litvu. Što adbyvajecca?
Rankam 28 lutaha biełarusam, jakija žyvuć u Vilni, stali zvanić byccam ź litoŭskaj mihracyi. Usim kazali adno i toje ž — vy pryznanyja pahrozaj nacyjanalnaj biaśpiecy Litvy i musicie pakinuć krainu. Ale ci mihracyjnyja słužby za hetym stajać?
Adnoj z tych, chto atrymaŭ zvanok, była 18-hadovaja Alisa. Dziaŭčynie pazvanili ź nieviadomaha numara:
«Ja nie źviarnuła ŭvahu na ličby, voś i adkazała. Mužčyna na tym baku nazvaŭsia pa-litoŭsku i skazaŭ, što jon — supracoŭnik mihracyi. Potym jon pačaŭ vielmi chutka taratoryć pa-litoŭsku i ihnaravaŭ maje prośby pierajści na ruskuju movu.
Ja pačała pavyšać hołas, kab jon mianie pačuŭ. Čałaviek pierajšoŭ na ruskuju i pačaŭ kryčać na mianie, što ja budu departavanaja ŭ sakaviku, bo majo znachodžańnie ŭ krainie niepažadanaje».
Alisa skazała nieznajomcu, što kali heta padman, to heta nie śmiešna i niachaj jon šukaje kahości inšaha, toj adkazaŭ joj niešta siardzita i kinuŭ trubku. Dziaŭčyna vyrašyła źviarnucca ŭ palicyju, bo viedaje, što ź jaje dakumientami ŭsio dobra, i napisała zajavu.
Alisa adznačaje, što nie parušała litoŭskich zakonaŭ i nie jeździła ŭ Biełaruś, chiba što maje štraf za bieźbiletny prajezd, ale apłočvała jaho na miescy. U Litvie jana zajmajecca sportam i vystupaje na spabornictvach, to-bok zusim nie padobnaja da pahrozy nacyjanalnaj biaśpiecy.
U inšaj paciarpiełaj, Miły, atrymałasia anałahičnaja hutarka: «Chłopiec nie nazvaŭ siabie, adrazu pačaŭ hutaryć pa-litoŭsku. Jon nazvaŭ majo imia i imia pa-baćku, a potym skazaŭ, što jon z departamientu mihracyi, i ŭdakładniŭ, ci razumieju ja litoŭskuju. Paprasiła jaho hutaryć pa-rusku.
Jamu heta nie zusim spadabałasia, i potym jon zrabiŭ vyhlad, byccam čytaje niejki aficyjny dakumient. Skazaŭ, što mnie pryjšoŭ list, i nibyta pa niejkim artykule ja pradstaŭlaju nacyjanalnuju pahrozu Litoŭskaj respublicy, tamu ja mušu pakinuć krainu da 4 sakavika, a z usimi pytańniami mahu źviartacca ŭ departamient mihracyi».
Surazmoŭca Miły taksama nazvaŭ adras departamienta mihracyi, i paśla hetaha pakłaŭ trubku. Hutarka zaniała kala dźviuch chvilin, chłopiec nie davaŭ Mile zadavać pytańni, prosta vydaŭ paviedamleńnie i skončyŭ razmovu.
U departamiencie mihracyi Mile skazali, što jany nie majuć prava razhałošvać jaje status, a ŭsiu infarmacyju jana moža pabačyć u svaim asabistym kabiniecie na sajcie departamienta. Dziaŭčyna zajšła tudy i nie znajšła nijakich listoŭ pra departacyju, ale pry hetym supracoŭniki departamientu joj skazali, što jana musić vykonvać instrukcyi taho, chto joj zvaniŭ.
Taksama, zaŭvažaje Miła, tyja, chto joj zvaniŭ, čamuści viedali, što raniej u jaje była viza, ale jaje termin skončyŭsia. Ciapier biełaruska znachodzicca ŭ Litvie lehalna, pa DNŽ.
U čacie biełarusaŭ Vilni aktyŭna abmiarkoŭvajuć tajamničyja zvanki. Miła kaža, što, miarkujučy pa čacie, zvanili zbolšaha dziaŭčatam.
Kiraŭnik fondu «Bajsoł» Andrej Stryžak viedaje pra niekalki vypadkaŭ ź niezrazumiełymi zvankami. Voś jak jon kamientuje situacyju:
«My ŭ poŭnaj kamunikacyi z našymi litoŭskimi kalehami, hetaj situacyjaj zajmajucca ludzi, jakija kamunikujuć z departamientam mihracyi. Vysokaja imaviernaść taho, što heta pravakacyja. Dla nacyjanalnaj telefonnaj sistemy vykarystoŭvajucca numary, jakija pačynajucca na 8. Z takoha numaru i zvanili, ale ž napieradzie tam stajaŭ plusik — heta navodzić na dumki, što zvanili ź niesapraŭdnaha numaru.
Kali ludzi sumniavajucca nakont svajho statusu ŭ Litvie, treba abaviazkova zachodzić u asabisty akaŭnt na sajcie departamienta mihracyi i ŭdakładniać svoj status. Tolki takim čynam možna daviedacca, ci jość u vas niejkija źmieny».
Stryžak miarkuje, što kali za zvankami staić nie departamient mihracyi, spam-ataka takoha kštałtu moža być vyhadnaja tolki śpiecsłužbam i zacikaŭlenaść tut moža być tolki ŭ biełaruskaha i rasijskaha bakoŭ.
Departamient mihracyi Litvy ŭ kamientary «Radyjo Svaboda» adkazaŭ, što nie maje nijakaha dačynieńnia da takich zvankoŭ i ŭvohule nie apaviaščaje ludziej ab takich rečach pa telefonie.
«Heta sproba dezynfarmacyi i sproba pasiejać paniku, heta dakładna nie Departamient mihracyi, my takich zvankoŭ, tym bolš z takimi paviedamleńniami, nie robim», — raskazaŭ pradstaŭnik departamienta Rokas Pukinskas.
Učora litoŭskija ŭłady zajavili, što źbirajucca pravieryć 18 tysiač biełarusaŭ, jakija atrymali DNŽ da ŭviadzieńnia śpiecyjalnych ankiet. Ich paprosiać zapoŭnić ankietu, u jakoj paprosiać paznačyć svaje adnosiny da vajny va Ukrainie i niekatoruju inšuju infarmacyju.
«Naša Niva» — bastyjon biełaruščyny
PADTRYMAĆČytajcie taksama:
Milicyjant, jaki viadzie kanał viciebskaha HUBAZiKa, vypadkova vydaŭ siabie11
Kamientary
A ludi vsie jeŝio nie ponimajut, počiemu ich vyhoniajut. Skažu srazu, v Polšie dievuškie budiet jeŝio tiažieleje