Biełpoł: Vahnieraŭcaŭ u Biełarusi źbirajucca pryniać na słužbu pa kantrakcie
Z hetaj metaj u najbližejšy čas buduć uniesienyja źmieny ŭ zakanadaŭstva, jakoje rehłamientuje chod vajskovaj słužby.
Arhanizacyja byłych siłavikoŭ «Biełpoł» piša, što atrymała ź niekalkich krynic infarmacyju ab namierach aficyjnaha Minska lehalizavać prysutnaść najmitaŭ PVK «Vahnier» (jakaja aficyjna nie isnuje ŭ Rasii) i anałahičnych im u našaj krainie šlacham uklučeńnia źviestak zamiežnych bajevikoŭ u sistemu vajskovych častak Minabarony i MUS.
Z hetaj metaj u najbližejšy čas buduć uniesienyja źmieny ŭ zakanadaŭstva, jakoje rehłamientuje chod vajskovaj słužby, zhodna ź jakimi zamiežnyja hramadzianie i asoby biez hramadzianstva atrymajuć prava pastupać na vajennuju słužbu pa kantrakcie va Uzbrojenyja siły, transpartnyja siły, a taksama vajskoŭcy, siaržanty i staršyny MUS. Pieršy kantrakt budzie zaklučany na adzin hod, druhi — na termin da piaci hadoŭ.
Akramia taho, vyšejzhadanaja katehoryja vajskoŭcaŭ pavinna zamiest vajennaj prysiahi dać abaviazacielstva vykonvać Kanstytucyju Respubliki Biełaruś, vajennyja statuty, patrabavańni biełaruskaha zakanadaŭstva, zahady kamandziraŭ i načalnikaŭ, pavažać «dziaržaŭnyja simvały» Biełarusi i sumlenna vykonvać umovy damovy, piša «Biełpoł».
Nahadajem, što niekalki tysiač vahnieraŭcaŭ akazałasia ŭ Biełarusi paśla sprobu buntu Jaŭhiena Pryhožyna ŭ Rasii ŭ 22-23 červienia 2023 hoda, jany atabarylisia pieravažna ŭ vioscy Cel Asipovickaha rajona. Tady nazyvalisia ličby ad šaści da vaśmi tysiač.
Bajcy časam instruktavali biełaruskich vajskoŭcaŭ, pravodzili ź imi zaniatki. Paśla avijakatastrofy 23 žniŭnia, u jakoj zahinuŭ Pryhožyn, vahnieraŭcy stali pakidać Biełaruś. Brytanskaja raźviedka acaniła ich kolkaść u pačatku lutaha 2024 hoda ŭ mienš za 1000 čałaviek, a instruktar Alaksiej Biarhovin (pazyŭny «Brest») pisaŭ, što ŭ Biełarusi pa hety dzień pracujuć bolš za 300 instruktaraŭ u niekalkich navučalnych centrach.
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy8
Kamientary