Va Ukrainie rezka ŭzrasła kolkaść šlubaŭ z žančynami ź invalidnaściu. Čamu tak? 

Z pačatkam vajny va Ukrainie zvyčajnaj źjavaj stali roznyja lehalnyja i kryminalnyja schiemy, jakija vykarystoŭvajuć ukraincy dla taho, kab paźbiehnuć mabilizacyi. Ab adnoj ź ich — fiktyŭnych šlubach z žančynami-invalidami — piša vydańnie NGL.media.

Zhodna z ukrainskim zakanadaŭstvam, najaŭnaść blizkaha svajaka-invalida — zakonny sposab vyzvalicca ad vajskovaj słužby abo atrymać adterminoŭku ad mabilizacyi. Heta taksama całkam zakonnaja pryčyna dla vyjezdu z krainy.

Rynak takich pasłuh u krainie kvitnieje. U Facebook i Telegram jość šmat hrup, pryśviečanych mahčymaściam falšyvaha šlubu. Bolšaść ź ich tak i nazyvajucca — «Fiktyŭny šlub», «Fiktyŭny šlub Adesa», «Znajomstva Kijeŭ» i inšyja. Pieryjadyčna zjaŭlajucca abjavy ab pošuku žančyn z abmiežavanymi mahčymaściami ci naadvarot — šukajuć mužčyn, jakija chočuć vyjechać za miažu dla šlubu.

Pavialičyć

Žurnalisty vydańnia biez prablem znajšli ŭdzielnikaŭ hetych schiem, jakija zarablajuć ad 1500 da 7000 dołaraŭ na arhanizacyi šlubaŭ. Biezumoŭna, nijakich harantyj niama. Pry hetym na raźmieščanyja ŭ sacyjalnych sietkach žurnalistami fejkavyja abviestki adhuknulisia jak niepasredna sami žančyny-invalidy, tak i pasiaredniki — «svaty».

Niahledziačy na toje, što «svaty» pišuć z ananimnych akauntaŭ i nie raskryvajuć svaich telefonaŭ, ludzi nie pierastajuć karystacca ich pasłuhami. «Svaty» abiacajuć klijentam dapamohu ŭ afarmleńni dakumientaŭ i ich chutkaje atrymańnie biez čarhi i navat biez prysutnaści muža. Za apieratyŭny šlub žurnalistam prapanavali ŭnieści 5 tysiač hryŭniaŭ pieradapłaty (kala 50 jeŭra) dla vyrašeńnia pytańniaŭ rehistracyi šlubu i 2 tysiačy jeŭra «žoncy» užo paśla vyjezdu z krainy.

Niaredkija vypadki, kali paśla atrymańnia pieradapłaty, takija «svaty» źnikajuć. A ich achviary pa zrazumiełych pryčynach nie źviartajucca ŭ milicyju.

Žurnalisty adznačajuć, što praktyčna niemahčyma dakazać fiktyŭnaść šlubu. Tym nie mienš milicyi i SBU časam udajecca zatrymlivać ludziej, jakija zarablajuć na arhanizacyi takich šlubaŭ. Ale takija vypadki vielmi redkija, a pakarańnie nie zanadta suvoraje. Tak adna z zatrymanych žančyn atrymała 2 hady ŭmoŭna.

Aŭtary rasśledavańnia padkreślivajuć, što ŭkrainskaje zakanadaŭstva nie praduhledžvaje pakarańnia mienavita za zaklučeńnie fiktyŭnaha šlubu. A samo paniaćcie fiktyŭnaha šlubu choć i vyznačana Siamiejnym kodeksam, ale dakazać heta davoli składana — dla hetaha nieabchodna adpaviednaje rašeńnie suda. A ŭ sud pavinien źviarnucca adzin z sužencaŭ.

Tamu ŭ takich situacyjach milicyja zavodzić kryminalnyja spravy pa artykule ab niezakonnym pierapraŭleńni asob praź dziaržaŭnuju miažu. Dla hetaha śledstvu jašče treba dakazać, što kančatkovaj metaj u kožnaj takoj historyi było pierasiačeńnie miažy — a heta vielmi składana.

Aŭtary pišuć, što časam ukrainskim pamiežnikam atrymlivajecca damahčysia ad muža i žonki pryznańnia, što ich šlub zarehistravany tolki dla pierasiačeńnia miažy. Jakija pytańni zadajuć takim «maładym» na miažy, nie rassakrečvajecca. Ale heta tolki niaznačnaja kolkaść vypadkaŭ. Tak što šluby pa damoŭlenaści zjaŭlajucca ŭmoŭna lehalnaj schiemaj atrymańnia adterminoŭki i vyjezdu z Ukrainy.

Dla taho, kab pieraduchilić taki šlach sychodu ad mabilizacyi, płanujuć admianić invalidnaść člena siamji jak padstavu dla adterminoŭki. U parłamiencie Ukrainy pavinny pryniać u druhim čytańni źmieny ŭ zakon «Ab mabilizacyjnaj padrychtoŭcy i mabilizacyi». Paśla ŭstupleńnia zakonu ŭ siłu pavinny być uniesieny źmieny ŭ praviły pierasiačeńnia miažy.

Čytajcie jašče:

Pajechać u Hruziju ci ažanicca anłajn. Raskazvajem, jak biełarusam pabracca šlubam za miažoj (i navat biez daviedki z krainy)

Zamiest žanicha ŭ ZAHS pryjšła milicyja: dziaŭčyna chacieła vyjaznuju rehistracyju šlubu, ale ledź nie atrymała administratyŭku

Zialenski raskazaŭ pra paŭmiljonnuju mabilizacyju i adnosiny z Załužnym

• 0
• 3
• 0
• 4
• 5
• 11
• 13