Pajechać u Hruziju ci ažanicca anłajn. Raskazvajem, jak biełarusam pabracca šlubam za miažoj (i navat biez daviedki z krainy)

Nie majecie daviedki z Radzimy? Tady šlach da šlubu ŭskładnicca

I ŭ Polščy, i ŭ Litvie pieršapačatkovy nabor dakumientaŭ dla šlubu padobny. Pra toje, jakija papiery dla hetaha rychtavać u Litvie, «Našaj Nivie» raskazała Ijałanta Kuźmienie, zahadčyca Vilenskaha ZAHSa: «Kab zarehistravać u nas šlub, treba pryjści da nas z aryhinałami pašpartoŭ i prynieści daviedku, što niama pieraškodaŭ dla zaklučeńnia šlubu.

Vydadzienaja ŭ Biełarusi daviedka pavinna być z apastylem i pierakładam na litoŭskuju movu. Kali dla čałavieka heta budzie nie pieršy šlub, pavinny być dakumient ab razvodzie z apastylem i pierakładam na litoŭskuju. Kali ž ludzi nie mohuć padać daviedku ab tym, što niama pieraškodaŭ dla zaklučeńnia šlubu, jon nie moža być zarehistravany».

Što da Polščy, u tamtejšych ZAHSach ad vas, akramia pašparta, paprosiać pakazać paśviedčańnie ab naradžeńni z apastylem i pierakładam na polskuju movu. Kali heta pieršy šlub, bolš dakumientaŭ i nie treba. Kali ž vy ŭ razvodzie, rychtujcie adpaviedny dakumient — i tak, usio heta treba pierakłaści na movu krainy pražyvańnia i apastylavać.

Ale jość važny niuans.

U abiedźviuch krainach biełarusam, kab pabracca šlubam, patrebnaja daviedka pra adsutnaść pieraškodaŭ dla šlubu za miažoj — praściej kažučy, pra toje, što vy nie žanatyja ŭ Biełarusi.

Raniej jaje možna było atrymać u lubym konsulstvie, ale paśla ŭkaza №278 za takoj daviedkaj pryjdziecca jechać dachaty — abo pieradavać kamuści davieranaść, zroblenuju ŭ Biełarusi, kab hety čałaviek uziaŭ dla vas adpaviednuju daviedku.

Nie možacie viartacca ŭ Biełaruś? Kali vy ŭ Litvie i atrymali status uciekača, možna ažanicca i biez daviedki ź Biełarusi. Mienavita tak pabralisia šlubam były palitviazień Źmicier Furmanaŭ i jaho dziaŭčyna Volha Karakina.

Źmicier apisaŭ dla nas hetuju praceduru: «Spačatku my padalisia na ŭciakactva. Kali atrymali stały dazvoł na žycharstva z kartkami, pajšli ŭ vilenski ZAHS. Tamaka napisali zajavu, apłacili 20 jeŭra i pačali čakać naznačany dzień. Na viasielli z nami byli śviedki ź biełaruskimi pašpartami».

Pra toje, jak abyścisia biez zapavietnaj daviedki ŭ Polščy, nam raskazała Volha Dabravolskaja, kiraŭnica adździeła pravavoj dapamohi Centra biełaruskaj salidarnaści. Pavodle jaje, u standartnaj situacyi, kali biełarusy mohuć pajechać na Radzimu, treba ŭziać u ZAHSie daviedku pra toje, što ty nie znachodzišsia ŭ šlubie ŭ Biełarusi, abo dać zroblenuju ŭ Biełarusi davieranaść inšamu čałavieku, kab jon uziaŭ hetuju daviedku za vas. Potym z hetaj daviedkaj treba źviarnucca ŭ ambasadu Biełarusi, kab tam vydali paśviedčańnie pra toje, što ŭ vas na padstavie biełaruskaha zakanadaŭstva niama pieraškodaŭ dla zaklučeńnia šlubu.

Kali čałaviek nie moža atrymać takuju daviedku ŭ ZAHSie, jon nie atrymaje i adpaviednaje paśviedčańnie ŭ ambasadzie, tłumačyć Volha: «Biełarusy, jakija apynulisia ŭ takoj situacyi, mohuć źviarnucca ŭ rajonny sud pa miescy žycharstva ŭ Polščy i paprasić, kab sud zvolniŭ ich ad pradastaŭleńnia hetaj daviedki. Treba budzie abhruntavać, čamu vy nie možacie pajści ŭ ambasadu ci pajechać u Biełaruś — naprykład, tamu što vy baiciesia represij ci pieraśledu.

Biełarusy, jakija źviartajucca z zapytam ab nadańni mižnarodnaj achovy (dadatkovaj achovy ci statusu ŭciekača), mohuć arhumientavać hetym u sudzie niemahčymaść atrymańnia daviedki. Pakul što prosta humanitarnaja viza ci časovy dazvoł na žycharstva na jaje padstavie nie dajuć arhumientavanaj padstavy na toje, kab ažanicca biez daviedki — i pa vizie, i pa DNŽ možna vyjazdžać u Biełaruś. Tamu treba budzie dadatkova patłumačyć, čamu vy nie možacie źviarnucca ŭ ambasadu ci pajechać u Biełaruś, kab atrymać nieabchodnyja dakumienty».

Takaja zajava ŭ sud, raskazvaje jurystka, maje być napisanaja pa-polsku, da jaje treba prykłaści dakumienty, jakija paćviardžajuć hetuju zajavu: naprykład, rašeńnie ab nadańni statusu ŭciekača ci dadatkovaj achovy, taksama treba dadać paśviedčańnie ab naradžeńni. Kali ŭ vas niama paśviedčańnia ab naradžeńni i vy nie možacie jaho pryvieźci, možna źviarnucca ŭ sud, kab vas vyzvalili ad nieabchodnaści pradastaŭlać abodva dakumienty dla zaklučeńnia šlubu.

Jurystka papiaredžvaje, što sudovaja pracedura moža zaciahnucca. Naprykład, u Varšavie možna čakać rašeńnia pa vašaj spravie da šaści miesiacaŭ.

Ale jość i inšyja varyjanty.

Viasielle ŭ Hruzii — ramantyčna i prosta

Vyhladaje, što ŭ hetaj situacyi łajfchakam dla biełarusaŭ moža stać cyrymonija ŭ Hruzii. «Našaj Nivie» napisali dziasiatki čytačoŭ, jakija mienavita tak pabralisia šlubam. Plusoŭ šmat: adnosna prostaja arhanizacyja, mahčymaść zładzić viasielle ŭ ramantyčnym vysakahornym rehijonie, paraŭnalna nievysokija ceny.

Voś vytrymki z historyj našych čytačoŭ:

«…Usio, što spatrebiłasia — heta zrabić nataryjalny pierakład našych pašpartoŭ i znajści dvuch śviedkaŭ. Potym my ŭdvaich pajšli ŭ Dom justycyi [ŭ Tbilisi] z pašpartami ŭsich 4 čałaviek (my i śviedki) i pierakładami našych pašpartoŭ. Čarha na pryjom zaniała ŭ nas kala 10 chvilin. Dalej u akiency nas unieśli ŭ bazu i skazali pačakać, pakul budzie hatova paćviardžeńnie. U cełym jano robicca niekalki hadzin i zarehistravać šlub možna navat u toj ža dzień. My pryjšli na nastupny [dzień] sa śviedkami, padpisali papiery, i nas aformili za ličanyja chviliny. Dalej my prykładna pałovu hadziny ŭtrasali pytańni z apastylem, jaki mohuć zrabić prosta tam za asobnuju płatu. Supracoŭniki ŭ cełym vietlivyja. Usio było vielmi prosta i chutka».

«Jakraz šmat ludziej ź Litvy dy Polščy pryjazdžajuć mienavita ŭ Hruziju, kab tut raśpisacca i lehalizavać šlub, a potym viartajucca ŭ svaje krainy i kažuć, što z paśviedčańniami hruzinskaha ŭzoru praściej vyrašać «siamiejnuju biurakratyju» ŭ svaich krainach».

Adnak navat u samyja ščaślivyja chviliny nie varta hublać aściarožnaść:

«Horad Poci. Usio było zroblena za 2 dni, sama pracedura zaniała 10 chvilin. Ale nas padmanuli na 50$ u nataryjalnym ahienctvie (mienavita pamočnica nataryusa). I, viadoma, pamylilisia ŭ napisańni proźvišča. Tamu nataryjalny pierakład byŭ zrobleny ź dźviuma pamyłkami, što ŭ vyniku dało pravilny vynik».

«Zaklučali šlub u Hruzii viasnoj hetaha hoda. Nijakich asablivych dakumientaŭ nie treba — tolki nataryjalna zavieranyja pierakłady pašpartoŭ na hruzinskuju movu (svaich i 2 śviedkaŭ). Śviedkam moža być chto zaŭhodna, u nas heta byli našy siabry ź Biełarusi, jakija žyvuć u Tbilisi. Pierakłady kaštujuć nie vielmi doraha — štości kštałtu 50-60 łary (~20$) za 1 pašpart. 

Praŭda, kali my pryjechali na rehistracyju, akazałasia, što ŭ pierakładach jość para drobnych pamyłak, tamu tam ža ŭ nataryjalnaj kantory za 15 chvilin ich vypravili. Paśla čaho naš šlub paśpiachova zarehistravali, praz paru hadzin addali paśviedčańnie. Staŭleńnie čynoŭnikaŭ vielmi zyčlivaje — nas pavinšavali i pažadali ŭsiaho najlepšaha, ale mnie zdajecca, u Hruzii inšaje ŭvohule redka sustrakajecca. Nakolki ja viedaju, rehistracyja šlubu ŭ Hruzii — adzin z samych prostych varyjantaŭ, kali vy nie možacie pajechać u Biełaruś».

Pavialičyć

Daśviedčanyja čytačy navat raskazvajuć, dzie ŭ Hruzii lepš zładzić cyrymoniju, a jakich łakacyj varta paźbiahać. Voś jak heta apisvaje čytač Maksim:

«Najpraściejšaje miesca, dzie možna ŭziać šlub u Hruzii, — heta tak zvany Dom justycyi ŭ centry Tbilisi. Ale, ščyra kažučy, hetaje miesca nie vielmi ramantyčnaje, chacia tam i možna ažanicca vielmi chutka. Ale heta vialiki administracyjny budynak z roznymi biurakratami, elektronnymi čerhami i hetak dalej. Tam u adnym miescy možna zrabić absalutna ŭsio i navat znajści śviedkaŭ dla vašaha šlubu».

Zamiest hetaha Maksim ź niaviestaj pajechali ŭ miastečka Sihnachi, što znachodzicca na zachadzie Hruzii. Biełarus apisvaje jaho jak vielmi malaŭničaje, vakoł jaho — hory. Tam i prajšła cyrymonija. Za jaje para zapłaciła kala 70 łary — prykładna 25-30 dalaraŭ.

Pavialičyć

Jašče adzin varyjant — ažanicca anłajn

Jašče adzin varyjant — ažanicca anłajn, kab vaš šlub byŭ zarehistravany na terytoryi ZŠA. U internecie niamała sajtaŭ, jakija pradastaŭlajuć hetuju pasłuhu, i adnym ź ich skarystaŭsia syn adnaho z čytačoŭ «Našaj Nivy». Mužčyna zarehistravaŭ šlub na terytoryi amierykanskaha štata Men, a sama cyrymonija prajšła praz Zoom. Akramia žanicha i niaviesty, na joj mohuć «prysutničać» i rodnyja dy blizkija.

Za rehistracyju šlubu takim čynam daviadziecca zapłacić niedzie 200—300 dalaraŭ. Vy atrymajecie pa pošcie adpaviedny siertyfikat, ź jakim možna budzie lehalizavać šlub u krainie pražyvańnia. Adzinaja prablema — skasavać taki šlub anłajn nielha, razvodzicca, kali što, daviadziecca jechać u ZŠA.

«Kožny emihrant pražyvaje sacyjalnuju śmierć». Jak zachavać adnosiny ŭ vymušanaj emihracyi?

«Možna skazać, dziacinstva nie było». Siamiejnaja para ŭdvaich pabudavała dom, žyvie tam u ščaści ŭžo 62 hady i haniaje na matacykle

«Pačućciu humaru i pryhažości dziciaci buduć zajzdrościć vašy siabroŭki i čužyja dzieci». Jak ja šukała donara, kab zaciažaryć

• 7
• 0
• 1
• 1
• 2
• 1
• 3
• 0