«Ja trochi nie razumieju, dziela čaho?» Alimpijskaja čempijonka pa bijatłonie zadumałasia pra zaviaršeńnie karjery
Viadomaja biełaruskaja bijatłanistka, alimpijskaja čempijonka 2018 hoda ŭ estafiecie Iryna Leščanka (dziavočaje proźvišča Kryŭko) staić pierad vybaram, ci varta joj zastavacca ŭ sporcie va ŭmovach, kali ŭsie mahčymaści ŭdzielničać u spabornictvam zvuzilisia da ŭnutrybiełaruskich i rasijskich startaŭ. Pra heta spartsmienka raskazała ŭ intervju Sport5.by.
«Kali my ŭdzielničali na etapach Kubka śvietu, heta było značna cikaviej. Stajali niejkija mety…
Pamiataju, my rychtavalisia da Alimpijady 2018-ha hoda… Usio, ty prosta skancentravanaja była na hetym, ty viedała, dziela čaho vychodziš na zaradku, na pieršuju, druhuju, treciuju, čaćviortuju, piatuju treniroŭku…
Potym była nastupnaja Alimpijada, ty taksama viedała, da čaho idzieš… Dalej ja pajšła ŭ dekret, Ania Soła pajšła ŭ dekret.
My viarnulisia na Kubak Rasii, nu, a što dalej? A jakija mety? Mnohija maładyja spartsmieny nie znachodziać matyvacyju. Tak, jość niejkija pryzavyja, mahčymaść zarabić. Heta taksama peŭnaja matyvacyja, ale ŭsio adno nie niejkaja hłabalnaja meta, jakaja stajała pierad taboj raniej. I, adpaviedna, ty dumaješ, što dzieści mienš uvahi nadasi dziciaci. A dziela čaho?
Pastajanna adsutničaješ doma, usio adno byvajuć momanty, što ty nie možaš dačku z saboj uziać. Tamu pavinna być meta».
Tamu spartsmienka choćki-niachoćki zadumvajecca pra sychod sa sportu, choć kančatkovaje rašeńnie jašče nie pryniataje.
«Mianie paprasili źlotać na mora, adpačyć i padumać — nie rabić niejkich śpiešnych vysnoŭ. Ja prysłuchajusia. Na adpačynku abmiarkuju i potym užo prymiem niejkaje rašeńnie», — skazała Iryna Leščanka.
Siarod zatrymanych pa spravie pažaru ŭ viciebskim handlovym centry, vierahodna, jahony ŭładalnik2
Kamientary