Zapazyčanaść błohierki Aleny Januškoŭskaj u siem z pałovaj razoŭ mienšaja, čym startavy košt jaje chaty na aŭkcyjonie
Ułady pradajuć z aŭkcyjonu chatu viciebskaj błohierki Aleny Januškoŭskaj. Sama haspadynia nieruchomaści — u vymušanaj emihracyi, u Biełarusi suprać jaje raspačatyja dźvie kryminalnyja spravy.
Alena Januškoŭskaja kaža dla BAŽ, što niečaha padobnaha ŭžo čakała: u lutym na jaje chatu ŭ vioscy Sujkava Viciebskaha rajona nakłali aryšt. Ciapier žytło vystavili na aŭkcyjon, kab srodkami z prodažu pakryć zapazyčanaść błohierki pa štrafach i padatkach.
Aŭkcyjon pryznačany na 30 traŭnia, abvieščanaja cana majomaści — 10 700 rubloŭ. Na dumku błohierki, Biuro techničnaj invientaryzacyi acaniła nieruchomaść našmat nižej za rynkavy košt:
«Na pačatku 2000‑ch, kali ja kuplała hetuju chatu, ja zapłaciła amal 9 tysiač dołaraŭ. Budynak nie novy, ale dosyć prastorny, 56 kvadratnych mietraŭ, čatyry pakoi. Pobač ułasnaja studnia, na padvorku — haspadarčyja pabudovy, łaźnia, litaralna za chataj — sažałka. Terytoryja «majontka» — 25 sotak. A samaje hałoŭnaje, chata staić na ŭskrajku vioski, tam vielmi zacišna, jak na asobnym chutary. Aciapleńnie piačnoje, ale vioska hazifikavanaja, padvieści haz pry žadańni — nie prablema. Inšaja sprava, što ŭ mianie nie było na heta lišnich hrošaj… Uvohule ž vioska Sujkava mieścicca za try kiłamietry ad Viciebska, siudy chodziać haradskija maršrutki. Usio vielmi zručna».
Suma zapazyčanaści Aleny Januškoŭskaj składaje 1436 rubloŭ 60 kapiejek, ź ich 856 rubloŭ — heta niaspłočanyja štrafy. Astatniaje — padatki, jakija žančyna nie mieła mahčymaści zapłacić z‑za miažy. Ludzi, na jakich jana paspadziavałasia ŭ hetaj spravie, padviali. Svajakoŭ u Biełarusi ŭ jaje praktyčna nie zastałosia.
Kali chatu pradaduć i zapazyčanaść budzie pahašanaja, ci možna budzie niejkim čynam atrymać astatnija hrošy za svaju majomaść? Adkazu na hetaje pytańnie Alena Januškoŭskaja nie viedaje. I nie vyklučaje, što hetyja hrošy vykarystajuć jak «prynadu», kab zaachvocić jaje viarnucca z‑za miažy.
«Susiedzi majoj dački raspaviadali, što da ich dniami prychodziŭ milicyjant i raspytvaŭ, kudy my ŭsie źjechali. Kazaŭ, kab mnie pieradali, što suprać mianie raspačatyja dźvie kryminalnyja spravy — za abrazu Łukašenki i za spryjańnie ekstremisckaj dziejnaści. I što mnie, maŭlaŭ, praściej pryjechać i «adsiadzieć» za svaje praviny. Maŭlaŭ, «daduć» mnie hady try kałonii, i praz paŭtara ja vyjdu pa amnistyi. Vielmi im chočacca, kab ja viarnułasia», — kaža Alena Januškoŭskaja.
U Biełarusi i pieradusim na Viciebščynie žančynu viedajuć jak stvaralnicu šerahu hrup u sacyjalnych sietkach i videakanała «Nastojaŝaja Biełaruś», dzie błohierka jašče z 2018 hoda raspaviadała pra nialohkaje žyćcio viaskoŭcaŭ. U listapadzie 2021 hoda Ministerstva infarmacyi ŭklučyła ŭ Respublikanski śpis ekstremisckich materyjałaŭ niekalki videarolikaŭ, raźmieščanych na hetym YouTube-kanale, u śniežni 2022-ha ŭ hety śpis unieśli hrupu «Nastojaŝaja Biełaruś» u sacyjalnaj sietcy «VKontaktie», u krasaviku 2023-ha — hrupu z takoj samaj nazvaj u «Odnokłaśśnikach», u lutym 2024 hoda — hrupu «Nastojaŝaja Biełaruś» u Facebook.
Alena Januškoŭskaja pakinuła Biełaruś u lutym 2021 hoda. Pryčynaj staŭ cisk za błohierskuju dziejnaść: z 2020 hoda błohierku nieadnarazova karali aryštami i štrafami za jaje strymy z važnych hramadska-palityčnych padziej u Viciebsku i ŭ Minsku. Aryšty davodziłasia adbyvać, niahledziačy na istotnyja prablemy sa zdaroŭjem: žančyna pakutuje na astmu, maje invalidnaść. Cisnuli na błohierku i praz represii ŭ dačynieńni da jaje blizkich: dačku Juliju nieadnarazova štrafavali za ŭdzieł u tak zvanych niesankcyjanavanych akcyjach, sacyjalnyja słužby pahražali adabrać u jaje dźviuch niepaŭnaletnich dačok. Ciapier Julija Ułasienka razam ź dziećmi taksama znachodzicca pa-za miežami Biełarusi.
«Biełarusy buduć cichieńka dumać svajo. A vada kamień točyć, dyj Łukašenka fizična nie viečny». Hłyboki manałoh byłoha mytnika Alesia Jurkojcia5
Kamientary