Transpłantacyja nyrki ŭ čarnahorskaj klinicy
«My ludzi kala dźviarej morhu, tolki statystyčna žyvyja», — havoryć Tania Stajanavič z asacyjacyi «Mužnaść dla novaha žyćcia», apisvajučy stan svajho zdaroŭja i zdaroŭja svaich tavaryšaŭ pa biadzie.
Jana raskazała, što była na dyjalizie try razy na tydzień na praciahu 5 hadoŭ. «U kahości niama prablem, a ŭ mianie ad jaho surjoznyja ŭskładnieńni», — kaža žančyna. Pavodle jaje słoŭ, paśla praciahłaha dyjalizu jana zachvareła na asteaparoz, taksama ŭ jaje pačalisia prablemy z sercam, paraščytapadobnymi załozami i mozham.
«Žyvoha donara ŭ nas niama, i času čakać u nas niama. Praktyčna kožny dzień u paśviedčańniach ab śmierci my bačym niekaha z našych susiedziaŭ pa pakoi z dyjaliznaj zały, ź jakim my pravodzili hadziny. Vy nie ŭjaŭlajecie, jak heta składana», — kaža jana.
Ciapier atrymać novuju nyrku ŭ Biełarusi pacyjenty z Čarnahoryi mohuć tolki płatna.
«Za piać hadoŭ dyjalizu ja abyšłasia dziaržavie ŭ 125 000 jeŭra. A stolki ludziej siadziać na dyjalizie ŭžo dziesiać hadoŭ. Transpłantacyja ŭ Minsku ź inšymi vydatkami — heta kala 100 000 jeŭra», — kaža Tania. Jana spadziajecca, što ŭrad Čarnahoryi znojdzie niejkaje rašeńnie.
Chvoryja pacyjenty vyrašyli prasić urad ab transpłantacyi ŭ Biełarusi, bo,
zhodna z zakonam ab donarstvie orhanaŭ, u Biełarusi ŭsie hramadzianie, jakija pieražyli śmierć mozhu, źjaŭlajucca donarami, za vyklučeńniem vypadkaŭ, kali sam čałaviek pry žyćci abo jaho rodnyja napišuć zajavu, što jany suprać hetaha.
Adnak Čarnahoryja nie maje supracoŭnictva ź Biełaruśsiu ŭ śfiery miedycyny, da taho ž u 2021 hodzie dałučyłasia da sankcyj Jeŭrasajuza.
U Ministerstvie zdaroŭja Čarnahoryi «Radyjo Svaboda» paviedamili, što pačali dypłamatyčnuju pracu pa vyvučeńni supracoŭnictva z klinikaj u Minsku z ulikam sankcyjaŭ, uviedzienych Čarnahoryjaj u dačynieńni da Biełarusi.
Ministr Voisłaŭ Šymun taksama ŭdakładniŭ, što adpraŭka pacyjentaŭ u inšuju krainu dla pierasadki orhanaŭ ad pamierłaha čałavieka žyvomu nie praktykujecca z pryčyny sumnievaŭ u pachodžańni orhanaŭ.
Čarnahoryja źjaŭlajecca ŭdzielnicaj Kanviencyi Rady Jeŭropy ab baraćbie z handlem orhanami i Stambulskaj kanviencyi ab praduchileńni nabyćcia i prodažu orhanaŭ i transpłantacyjnaha turyzmu. Z pryčyny mahčymych złoŭžyvańniaŭ Rada Jeŭropy stvaryła płatformu dla manitorynhu vyjezdaŭ na transpłantacyju orhanaŭ u inšyja krainy. Čarnahoryja taksama źjaŭlajecca častkaj hetaj płatformy.
Čytajcie taksama:
Kitajskija daktary zajavili, što ŭpieršyniu vylečyli chvoraha na dyjabiet
Viečny dyktatar. Jak chutka tyrany zmohuć skarystacca pieršymi lekami ad stareńnia?
Jakija biełaruskija kliniki najbolš zapatrabavanyja ŭ zamiežnikaŭ
