Vinšuju. Za 15 hod aničoha nie zrazumieŭ, aničamu nie navučyŭsia. Praciahvaje raźvivać russkij mir, navat uciekšy ad jaho na čužynu. 

Adna ź vielmi častych častych i nadzvyčaj typovych mantraŭ śviadomych spadaroŭ RPCšnaha vieravyznańnia abo pachodžańnia – heta mantra pra isnavańnie kaliści, daŭniša-razdaŭniša, ŭ niedatavanyja časy, niemaskoŭskaha bieła-ruskaha pravasłaŭja. Chodziać sabie luccy da Lemiašonka "akarmlacca", i niešta pra "niemaskoŭskaść" marmyčuć... Dazvolcie nievialički krytyčny razbor vašaj mantry.

Na jaki kankretna pieryjad vy spasyłajeciesia? Najbolš niemaskoŭskim tutejšaje pravasłaŭje było ŭ 15-16 st. Pieradusim paśla Fłarentyjskaj unii 1438 h., jakaja akurat pieraviała hetaje pravasłaŭje, chaj sabie i farmalna… ŭ Uniju! Roznyja mitrapality pa-roznamu stavilisia da svaich abaviazkaŭ pierad Unijaj, a bolšaść šarahovych viernikaŭ, mabyć, i ŭvohule pra jaje nie padazravała, ale tym nie mienš… takoje trochi “sapsavanaje” pravasłaŭje, nie znachodzicie? A kali biskupy vyrašyli ŭziacca za spravu Unii ŭsurjoz (1596 h.), tady i tym bolš… U hety momant ułasna pravasłaŭnyja (dyzunity, abo schizmatyki, ŭ terminałohii palityčnaha kłasu VKŁ) jakraz i źviartajucca za padtrymkaj mienavita da Maskvy, jakaja ž tut “niemaskoŭskaść”? Prrytym mienavita biełyja rusy, ŭ paraŭnańni z ukraincami, najbolš paśladoŭna aryjentujucca na Maskvu. Kali siarod ukraincaŭ doŭhi čas, hruba, paroŭnu prychilnikaŭ aryjentacyi na Maskvu i , alternatyŭna, składanaj (i naiŭnaj stratehična) hulni ź joj u “chaŭrus čysta palityčny”, ale ŭ składzie Kanstantynopalskaha Patryjarchatu, dyk jepiskapija Bieła-Ruskaja (mścisłaŭska-aršanskaja) pieršaj pierachodzić u faktyčnaje kiravańnie z Maskvy, i robicca płacdarmam dla zachopu ŭłady nad usioj Kijeŭskaj mitrapolijaj.

  Kali zahadkavaje “niemaskoŭskaje pravasłaŭje” niekali isnavała, dyk dzie jaho znakavyja teksty? Dziejačy? Zvyčai? Charakternyja prykmiety adroźnieńnia. Heta, spadary, jak i z Krambambulaj. Usie śviadomyja spadary «viedajuć» što jana była ŭ biełarusoŭ spradvieku. Ale nichto nie moža pryvieści nivodnaha kankretnaha histaryčnaha prykładu z dataj i miescam, kab jaje niechta vyrablaŭ ci spažyvaŭ . Kankretnyja vypadki vašamu mifałahičnamu myśleńniu niecikavyja, tamu što ich pošuk razburaje mif. Usie my viedajem pierabiežčykaŭ z Unii Simiaona Połackaha, Babroŭskaha i Siamašku, viedajem Hryhoryja Kaniskaha, Hryharoviča, Špileŭskaha i Kajałoviča – chto ź ich “niemaskoŭski”? Ci kaho z “niemaskoŭskich” možacie pastavić ź imi pobač?

Abo takich dziejačoŭ, tekstaŭ, zvyčajaŭ, etałonnych pieryjadaŭ nikoli nie isnavała, i tady vy prosta chłusicie. A kali isnavali, i vy nie parupilisia kab napisać pra ich narmalny ŭciamny tekst, nie toje što knihu, ale chacia b artykuł, - tady vy łajdaki i ludzi ź nieachajnym, niearhanizavanym myśleńniem. I toje i druhoje – ŭłaścivaści akurat Ruskich Pravasłaŭnych Ludziej, całkam sabie maskoŭskich, maniłaŭska-abłomaŭskich.

A adzinaje jaskravaje “niemaskoŭskaje pravasłaŭje”, jakoje ja asabista viedaju – heta, prabačcie, Unija…