Tak ličyć Viktar Janukovič, kandydat u prezidenty Ukrainy.
Małady prychilnik Janukoviča całuje ruku svajmu lideru.
U čaćvier 28 studzienia ŭ efiry dziaržteleradyjokampanii «Krym» Viktar Janukovič zajaviŭ, što pamiataje pra jubilej Čechava. Pry hetym kandydat u prezidenty ad Partyi rehijonaŭ nazvaŭ Čechava jaho spačatku «ŭkrainskim, ruskim piśmieńnikam», a zatym — paetam. «Ja viedaju i pamiataju ab tym, što ŭ hetyja dni adznačajecca 150-hodździe tvorčaści Čechava — ukrainskaha, rasiejskaha piśmieńnika, nu, a ŭvohule bolš pravilna budzie skazać: dziejača suśvietnaj kultury», — skazaŭ Janukovič. «Jałcincy pavinny viedać, zapišycie: u 2010 hodzie ŭ abaviazkovym paradku budzie ŭkaz prezidenta ab restaŭracyi i adnaŭleńni doma-muzieja Čechava», — zajaviŭ jon.
«Ja jaho padpišu, hety ŭkaz, i my z vami budziem mieć dom-muziej, za jaki nam nie soramna budzie, kab i žychary Ukrainy, i inšych krain, pryjechaŭšy ŭ Jałtu, pryjechaŭšy ŭ Krym, mahli ŭbačyć mahli pabačyć pamiatnyja miaściny źviazanyja i ź bijahrafijaj, i z historyjaj hetaha cudoŭnaha paeta, vialikaha paeta Antona Paŭłaviča Čechava», — skazaŭ Janukovič.
29 studzienia adznačajecca 150-hodździe z dnia naradžeńnia rasiejskaha piśmieńnika, dramaturha Čechava.
Heta nie pieršy kurjozny vypadak ź lideram Partyi rehijonaŭ. «Ukrajinśka pravda» padrychtavała ceły chit-parad kanfuzaŭ Viktara Janukoviča.
7 lutaha adbudziecca druhi tur prezidenckich vybaraŭ va Ukrainie. Viktar Janukovič u im budzie supierničać ź ciapierašniaj premjer-ministarkaj krainy Julijaj Cimašenka. Janukovič abapirajecca na ŭschodnieŭkrainski, rasiejskamoŭny elektarat. Jahonaja supiernica maje padtrymku zachadu i centru krainy i ŭkrainskamoŭnych vybarcaŭ. Janukovič ciesna źviazany z uschodnieŭkrainskimi aliharchami, tady jak Cimašenka maje reputacyju papulistki.
