«Pakul dzieci ŭ baćkoŭ zabojcy»: Narodnaja ambasada Biełarusi ŭ Italii raskazała, što z synami zabitaj biełaruski
U Modenie były muž zabiŭ biełarusku Hannu Śvirydzienka praz toje, što sud pieradaŭ asnoŭnuju apieku nad dziećmi maci. «Naša Niva» vyśvietliła, što ciapier z chłopčykami i ci pajeduć jany žyć na radzimu Hanny.
U trahična zahinułaj biełaruski zastalisia dva maleńkija syny — im ciapier 3 i 5 hadoŭ.
— Dzieci pakul u baćkoŭ zabojcy, to-bok taty. Rašeńnie ab apiecy budzie vyrašacca ŭ sudzie, bo chłopčyki — hramadzianie Italii, — raspaviała «Našaj Nivie» Julija Juchno, pradstaŭnica Narodnaj ambasady Biełarusi ŭ Italii. — Čaściej za ŭsio dziaciej addajuć baćkam maci, ale tut buduć zychodzić ź intaresaŭ dziaciej. Kali jany ŭsio žyćcio žyli ŭ Italii, chutčej za ŭsio ich pakinuć tut. Kali nie z baćkam taty, dyk u dziciačym domie. Pakul nijakich padrabiaznaściaŭ niama akramia taho, što prapucinskaja asacyjacyja ŭ Modenie šukaje mahčymaści zabrać dziaciej pad svaju apieku. Hetaha my dakładna nie dazvolim zrabić, tamu adsočvajem situacyju i zastajomsia na suviazi z administracyjaj horada.
Nahadajem: niekalki dzion tamu stała viadoma pra zabojstva Hanny Śvirydzienka. 48-hadovy inžynier Andrea Pałtryńjery sam pryvioz cieła svajoj byłoj žonki ŭ palicyju.
«Ja zabiŭ jaje, cieła lažyć u mašynie na vulicy», — zajaviŭ jon palicejskim. Palicejskija ŭ bahažniku pabačyli cieła žančyny, na jaje hałavie byŭ zaviazany provadam čorny pakiet. Źniaŭšy pakiet, palicyjanty ŭbačyli ramień na šyi žančyny. Mužčyna byŭ zatrymany, idzie śledstva. Pa pieršapačatkovaj viersii, jon pierakanaŭ byłuju žonku sieści ŭ svoj furhon i tam zadušyŭ.
Hanna daŭno atrymała hramadzianstva Italii. Žančyna była doktaram i mieła dźvie adukacyi, pracavała ŭ aŭstryjskaj klinicy ŭ Insbruku, była daśledčycaj i publicystkaj i zakančvała śpiecyjalizacyju pa radyjałohii ŭ Modenie. Hanna rabiła ŭsio mahčymaje, kab sumiaščać pracu i vychavańnie dziaciej, jakija byli ź joj pa try tydni ŭ miesiac.
Dyrektar adździaleńnia balnicy, u jakim z 2022 hoda pracavała Hanna, raspavioŭ, što jana była vielmi prafiesijnaj i metanakiravanaj, pracavała zaŭsiody z uśmieškaj.
Niekatoryja padrabiaznaści siamiejnaj dramy źjavilisia ŭ italjanskich ŚMI.
U paniadziełak 10 červienia sud u Insbruku, dzie žyła achviara, vynies rašeńnie na karyść ahulnaj apieki dla baćkoŭ dvuch dziaciej, ale taksama ŭstanaviŭ, što jany pavinny buduć zastavacca ŭ asnoŭnym sa svajoj maci.
Sajt ansa.it cytuje słovy Frančeski Abičy, advakatki Hanny:
— U paniadziełak my razmaŭlali nieŭzabavie paśla apošniaha vierdyktu aŭstryjskaha suda, i jana była vielmi ščaślivaja (Hannu zabili ŭ aŭtorak 11 červienia — «NN»). My pavinny byli chutka sustrecca, kab padsumavać vyniki pytańnia apieki.
Adna ź siabrovak Hanny raspaviała Fanpage.it, što dva hady tamu žančyna śpiecyjalna znajšła sabie druhuju pracu ŭ Italii (Hanna pracavała i ŭ Aŭstryi), bo ŭ aŭstryjskim sudzie joj paraili być zhavorlivaj i staracca spraŭlacca z prośbami i pahrozami byłoha muža.
— Jana jeździła tudy i nazad. Z paniadziełka pa piatnicu pracavała ŭ Modenie, a na vychodnych jeździła pracavać u Insbruk (tam byŭ niapoŭny pracoŭny dzień).
Siabry kažuć, što adnosiny pamiž Hannaj i jaje byłym mužam Andrea (para była ŭ šlubie 5 hadoŭ), sapraŭdy byli vielmi napružanymi. Kab apłačvać biaskoncyja sudy, žančynie navat pryjšłosia pradać dom — były muž padavaŭ skarhu za skarhaj, bo baćka dziaciej pryncypova chacieŭ tolki adnaasobnuju apieku.
Apošnim, chto razmaŭlaŭ z Hannaj pierad tym, jak jana pajechała ŭ Modenu, kab zabrać dziaciej u taty, była jaje kalažanka z aŭstryjskaj balnicy:
— Jana była vielmi ŭschvalavanaja, uvieś čas kazała, što były muž jaje nienavidzić. Jon kazaŭ joj pra heta hadami, pakul jana paźmienna pracavała ŭ balnicy i vučyłasia. Ja sprabavała jaje supakoić, — raspaviała žančyna Resto del Carlino.
U efiry kanała Canale 5 prahučali hałasavyja paviedamleńni, jakija Hanna dasyłała siabram pierad trahiedyjaj.
— Ja ŭ adčai, ja nie viedaju, kolki jašče vytrymaju. Ja vieru, što hetaja vajna nikoli nie skončycca, — kazała jana ŭ adnym ź ich. — Jon tak mianie nienavidzić.
U inšym hałasavym paviedamleńni žančyna skardzicca, što były muž moža niekudy pavieźci dziaciej, a jaje nikoli nie infarmuje pra heta.
— Mnie vielmi škada, što Andrea robić što choča. Ja daviedałasia, što jon advioz dziaciej u Nieapal, ale daviedałasia ad inšych ludziej — jon nie raspavioŭ mnie. Mnie zdajecca, takuju infarmacyju treba paviedamlać spačatku maci, a ja zaŭsiody daviedvajusia vakolnymi šlachami.
Asacyjacyi Modeny i San-Fieliče arhanizavali akcyi ŭ pamiać pra Hannu Śvirydzienka. Jany prajšli tam, dzie žyła zabitaja biełaruska, i byli pryśviečanyja ŭ tym liku prablemie hvałtu nad žančynami.
Siabry Hanny adkryli zbor, srodki jakoha pojduć na pieravozku cieła ŭ Biełaruś, a taksama na inšyja vydatki, źviazanyja z pachavańniem.
«Naša Niva» — bastyjon biełaruščyny
PADTRYMAĆ
Kamientary